Rama dhe Veliaj në heshtje/ Asnjë fjalë për akuzat e Ahmetajt

2 Shkurt 2024, 11:47, Politikë CNA

Rama dhe Veliaj në heshtje/ Asnjë fjalë për akuzat e

Edi Rama dhe Erion Veliaj

Kryeministri Edi Rama dhe kreu i Bashkisë së Tiranës, Erion Veliaj, bëjnë sikur nuk kanë dëgjuar gjë dhe sikur nuk ka ndodhur gjë.

E kemi fjalën për deklaratat e ish-zv/kryeministrit Arben Ahmetajt në intervistën me Çim Pekën, ku theksoi se kryeministri dhe kryebashkiaku janë ideatorët e inceneratorit të Tiranës.

Ahmetaj theksoi se kryebashkiaku Veliaj është pronari faktik i inceneratorit të Tiranës.

Po kështu, Ahmetaj dha edhe një mesazh të qartë për kryeministrin Edi Rama, duke theksuar se nuk do të lejojë që të bëhet “kokë turku” për të.

Për të gjitha këto akuza, deri më tani nuk ka pasur asnjë reagim nga Rama dhe Veliaj apo ndonjë socialist tjetër, edhe pse vijnë nga një person që ka mbajtur postin e zv-kryeministrit, ministrit të Financave dhe ka qenë i besuari i kreut të qeverisë.

Të gjithë në heshtje dhe bëjnë sikur punojnë.

Mëngjesin e sotëm, Rama ka publikuar disa foto nga shkolla “Kostandin Kristoforidhi” në Elbasan, ku thekson se është një tjetër investim i Ministrisë së Arsimit dhe Sportit, në bashkëpunim me bashkinë. Asnjë fjalë për akuzat e drejtpërdrejta të ish-bashkëpunëtorit të tij.

"Pritet të përfundojë së shpejti, për të garantuar kushtet më të mira për 650 nxënësit dhe mësuesit e kësaj shkolle.Në këtë vit, përmes programit të rehabilitimit të shkollave dhe terreneve sportive të Ministrisë së Arsimit dhe Sportit, pushtetit vendor dhe së bashku me Programin e Rindërtimit, përfundojmë ndërtimin dhe rehabilitimin e shkollave në të gjithë vendin", shprehet Rama.

Postimi Ramës në rrjetet sociale

Ndërsa, Veliaj ka publikuar në "Facebook" vizitën në Tiranë të nënkryetares së Bashkisë së Parisit, Anouch Toranian.

Postimi Veliajt në rrjetet sociale

Pra, asnjë reagim për akuzat e forta, asnjë kundërpërgjigje, asnjë polemikë për aferën me incneratorin e Tiranës, i cili u ka kushtuar shqiptarëve qindra miliona euro.

Rama dhe Veliaj u detyrohen shqiptarëve që të reagojnë për akuzat e Ahmetajt, pasi bëhet fjalë për para të vjedhura nga xhepat e qytetarëve.

Ndërkohë rrjeti "zien" nga komentet, e shqiptarët presin reagime nga qeveria.

Pyetjet që na lindin janë: Deri kur Rama dhe Veliaj do të qëndrojnë në heshtje? A do të ketë një lëvizje tjetër nga SPAK me hetimet për inceneratorët?/CNA