web counter
LEXO PA REKLAMA!

SHKARKO APP

App Store
Google Play

E fundit!

x

Thellohet skandali/ Zhduket kontrata origjinale e Sterilizimit, SPAK: Nuk gjendet në arkivat e Ministrisë së Shëndetësisë

19 Gusht 2023, 15:50, Aktualitet CNA
Thellohet skandali/ Zhduket kontrata origjinale e Sterilizimit, SPAK: Nuk
Foto ilustruese

Sipas Prokurorisë së Posaçme e Antikorrupsionit kontrata origjinale e koncesionit të sterilizimit është zhdukur dhe nuk gjendet as në arkivat e Ministrisë së Shëndetësisë.

Ky skandal pritet të zgjerojë edhe më tej hetimet për aferën me koncensionin e sterilizimit.

Dokumenti i SPAK është publikuar këtë të shtunë nga ëeblajme dhe nxjerr në pah një situatë të pabesueshme dhe po ashtu të dënueshme penalisht.

“Në zbatim të këtij vendimi, oficerët e policisë gjyqësore kanë sekuestruar dosjen e koncensionit pranë Ministrisë së Shëndetësisë. Gjithashtu duhet theksuar se me gjithë kërkimet në institucion dhe arkivën e ministrisë së Shëndetësisë, zyrtarët e këtij institucioni nuk gjetën dhe nuk venë në dispozicion kontratën origjinale të koncensionit dhe as anekset përkatëse. Dokumentacioni i sekuestruar është origjinal i kopjes së njehsuar të dërguar nga ministria e Shëndetësisë përsa i përket procedurës së dhënies së koncensionit me shkresën numër 910/ 1 datë 19 shkurt 2020.”

Me urdhër të SPAK janë lëshuar tetë urdhër-arreste lidhur me koncensionin e sterilizimit, tender me vlerë 100 milionë euro. Dy persona kanë rënë në prangat e policisë lidhur me këtë koncension. Siç edhe e kishte paralajmëruar më parë CNA, janë arrestuar ish-zv.ministri i Shëndetësisë, Klodian Rjepaj dhe biznesmeni Ilir Rrapaj.

Por çfarë është kontrata e sterilizimit me vlerë 100 milionë euro?

Bëhet fjalë pikërisht për një projekt PPP me mbështetje buxhetore në shëndetësi.

Kontrata për koncensionin e sterilizimit u firmos në vitin 2015 mes ish-ministrit të Shëndetësisë, Ilir Beqaj dhe kompanisë koncesionare SaniService aksionerët e së cilës janë Investital LLC dhe kompanitë italiane “Servizi Italia”, “Tecnosanimed” dhe “U.Jet S.r.l”.

Kompania, Investital LLC në këtë kontratë zotëronte pjesën më të madhe të aksioneve. Kjo kompani është themeluar me kapital 1 mijë euro në Kosovë nga Ilir Rrapaj.

Më herët BIRN ka publikuar një artikull në të cilin flitej për themeluesin e kësaj kompanie dhe thuhej se Rrapaj u kthye në Shqipëri pas zgjedhjeve të vitit 2013. Sipas kësaj medie para se të fitonte koncesionin Rrapaj vendosi kontakte të shpeshta me ministrin e Shëndetësisë në atë kohë, Ilir Beqaj.

BIRN intervistoi mjekë dhe kirurgë të spitave të ndryshme të Tiranës, të cilat pohuan se formula e zgjedhur i rrit shpeshherë kostot edhe fiktivisht. Mjekët pranuan se kishin përdorur sete të shtrenjta për mikrokirurgjitë dhe ishin detyruar shpeshherë që të hapnin dy ose tri sete gjatë një operacioni, për të gjetur instrumentin kirurgjikal që u nevojitej. Ish-ministri i Shëndetësisë, Ilir Beqaj, e mbrojti kontratën në një përgjigje me shkrim për BIRN, pavarësisht kostove të rritura dhe akuzave të regjistruara nga Prokuroria, shkruan BIRN.

Qendra e sterilizimit ishte ndërtuar në vitin 2009 përmes një kredie që qeveria shqiptare kishte marrë në Bankën e Këshillit të Europës –CEB. Transferimi i saj nën administrimin e koncesionarit u bë pjesë e hetimit të kryer nga Prokuroria e Tiranës –i cili u pushua në shtator 2016 pa pasoja, shkruan BIRN.

Kompania koncesionare “SaniService” i ka shitur Ministrisë së Shëndetësisë sete kirurgjikale për çmime që variojnë nga 16 mijë lekë deri në 45 mijë lekë (me TVSH)./ CNA





Lajmet e fundit nga