web counter
LEXO PA REKLAMA!

SHKARKO APP

App Store
Google Play

E fundit!

x

Ekskluzive - Vera përvëluese e SPAK-ut që po djeg qeverinë dhe opozitën

11 Korrik 2023, 13:48, Editorial Elvi FUNDO

Ekskluzive - Vera përvëluese e SPAK-ut që po djeg qeverinë

SPAK-u së fundi ka kërkuar arrestimin e ish-zëvendëskryeministrit Arben Ahmetaj dhe e ka akuzuar këtë të fundit për lidhje me Mirel Mërtirin dhe Klodian Zoton e inceneratorëve, për përfitime pagesash, vila e të tjera si këto.

Ahmetaj e ka mohuar dhe pretendon se nuk ka asnjë lidhje me këta persona, s’ka marrë përfitime dhe s’ka vënë kurrë asnjë firmë pro tyre, gjithsesi kjo i përket hetimit të prokurorëve dhe gjykatës për ta vendosur.

Por, SPAK-u tashmë po merr një nga krerët më të lartë të shtetit shqiptar. Pas Saimir Tahirit, Lefter Kokës dhe Alqi Bllakos është Arben Ahmetaj, por në institucionin që po heton korrupsionin ka dhe shumë dosje të tjera, të cilat pritet të sjellin një verë të nxehtë, përvëluese, për politikën shqiptare dhe mund të trondisin opinionin publik, dosje, të cilat mund të çojnë deri në rrëzimin e qeverisë, mund të çojnë deri në zgjedhje të parakohshme të vendit apo të hanë dhe kokën e Presidentit të Republikës.

Sipas të dhënave zyrtare të siguruara nga burime brenda SPAK-ut, një dosje mjaft voluminoze është ajo e Sarandës, një koncensioni të marrë nga dy kompani private dhënë nga Ministria e Mbrojtjes në lidhje me bazën ushtarake në këtë zonë.

Nga të dhënat dhe kallëzimet e bëra, dyshohet se veprimet e kryera janë në shkelje të ligjit dhe në këtë hetim është përfshirë dhe një objekt, i cili është pjesë e bazës ushtarake që nuk duhej dhënë në fakt me koncension.

Gjithashtu, mësohet se dhënien e kësaj sipërfaqeje në përdorim për dy subjekte private e ka firmosur ish-Shefi i Shtabit të Ushtrisë, Z. Bajram Begaj, sot President i Republikës.

Ushtria, në fakt, dhe komanda e saj drejtuese është e pavarur nga Ministria e Mbrojtjes, pretendohet që është përfshirë edhe Olta Xhaçka, por gjithsesi, sipas hetimeve të SPAK-ut, në dosje ndodhet edhe Presidenti i Republikës. Thellimi i hetimeve mund të çonte në përfundimin se Presidenti mund të akuzohej për korrupsion, çka do të çonte në një impiçment, pra një shkarkim të Presidentit të Republikës.

Nga ana tjetër, fraksionet e dosjes së inceneratorëve janë të shumta, pra nuk është vetëm Arben Ahmetaj që përmendëm më lart, por ka hetime sipas dokumenteve që kanë dalë nga institucionet dhe informacionet e mbledhura nga SPAK-u edhe për dy ministra të tjerë që kanë ndjekur procedurën ligjore të asaj kohe, z. Damian Gjiknuri dhe Z. Nasip Naço.

Sërish tek inceneratorët është marrë në hetim edhe shtetasi Ëngjëll Agaçi, litari i të cilit ndodhet “në qafë” për procedurën e dhjetorit të 2014-ës ku brenda ditës 14 institucione dhanë “OK”-in me shpejtësi për të dhënë “koncensionin për ndërtimin” e inceneratorit të Elbasanit me vlerë 22 milionë euro.

Agaçi, sekretari i përgjithshëm i Kryeministrisë, është njeriu përgjegjës për vendimet e qeverisë, për përgatitjen e tyre dhe zbardhjen.

Një dosje tjetër që përflitet në SPAK është edhe ajo për ish-ministrin Ilir Beqaj, ish-ministër i Shëndetësisë, i cili është akuzuar në lidhje me disa koncensione gjatë kohës që ka qenë në këtë detyrë, siç është ajo e “check up”-it dhe ajo e sterilizimit.

Ilir Beqaj vazhdon detyrën si drejtor i një agjencie i qeverisë shqiptare.

Pra, sipas të dhënave që ka SPAK-u janë shumë ministra dhe njerëz, zyrtarë të shtetit, nën hetim apo edhe nën akuzë. Dy ministra janë arrestuar, një i tretë është zëvendëskryeministri, i cili është kërkuar të arrestohet, ka ministra të tjerë në hetim, zyrtarë të lartë e deri te presidenti dhe këta i përkasin pjesës së mazhorancës.

Nga ana tjetër, mësohet se edhe opozita ka problematika që lidhen me hetimet brenda SPAK-ut.

Së pari, është dosja e Gërdecit, ku Fatmir Mediu vazhdon të ndjekë gjyq pas gjyqi, seancë pas seance, shtyrje pas shtyrje, akuzën ndaj tij për çështjen e Gërdecit.

Pas Mediut, mësohet se një person në hetim është edhe z. Arben Imami në lidhje me privatizimin e klubit Partizani, ku pretendohet se SPAK-u mund të thërrasë si person në dijeni dhe ish-kryeministrin Sali Berisha.

Një emër tjetër në hetim nga SPAK-ku është ish-kreu i Kuvendit, ish-kryeministri, ish-presidenti Ilir Meta, i cili është në hetim nga ky institucion dhe përflitet në qarqet politike dhe mediatike se dhe ndaj këtij të fundit mund të ketë një ngritje akuze.

Pra, nuk janë pak, por 10 apo 15 raste, zyrtarësh të lartë, Presidentë, ish-Presidentë, ish-Kryeministra, ministra apo edhe ish-ministra, të cilët ndodhen nën hetim, nën akuzë dhe “goditja” e tyre mund të sjellë të fortë në opinionin politik, por edhe publik.

Ndoshta largimi i Presidentit, Ahmetajt, ministra të tjerë të qeverisë apo bashkëpunëtorë të Ramës pas hekurave do ta detyronin kryeministrin në një situatë të tillë që ta çonte vendin drejt zgjedhjeve të parakohshme dhe nuk do të ishte çudi që t’i rifitonte prapë ato, edhe pse shumica e bashkëpunëtorëve që ka pasur në këto 10 vite mund t’i ketë pas hekurave për afera dhe denoncime të bëra, qoftë nga opozita, qoftë nga mediat që fatkeqësisht vetë kryeministri Rama i ka mbrojtur në publik me pathos të madh, ndërkohë që kanë rezultuar afera korruptive, bëma dhe gjëma në kurriz të qytetarëve shqiptarë./ CNA.al





17:15 Editorial Ardi Stefa

Urat...

Kur pret ura pa ndonjë arsye të veçantë, ndonjëherë bie në...

Lajmet e fundit nga