E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Disa fakte dhe argumente për humbjen e PD-së dhe opozitës

18 Maj 2023, 14:30, Editorial CNA

Disa fakte dhe argumente për humbjen e PD-së dhe opozitës

Foto ilustruese

14 maji regjistroi një rezultat shumë të dobët për koalicionin opozitar.

Ka shumë fakte dhe argumente: përçarja, rrëmbimi i vulës, mosbashkimi, moskrijimi i frymës, Ilir Meta në njërin krah, rikthimi i Berishës, servilët e Bashës që kaluan te Doktori, s’ka figura të reja, s’ka shpresë, shitblerja e votës e me qindra të tilla fakte dhe argumente mund të gjesh për të justifikuar, por do të përpiqemi që të sjellim shkurt me një analizë disa argumente dhe fakte kokëforta.

Së pari, opozita nuk solli kandidatët më të mirë.

Edhe pse u tha se po luhet me pesha të rënda, nuk ishin pesha të rënda kandidatët e zgjedhjeve lokale që ofroi koalicioni i Berishës, pa folur pastaj për shërbimin që Alibeaj dhe PD-ja e vulës i bënë kryeministrit Rama.

Qëllimi i tyre ishte të ulnin përqindjen e votave që do të merrte çdo kandidat i opozitës, që të mos dilnin mbi 40%, mbi 45%, për të mos krijuar frymë e kështu me radhë.

Gjithsesi, ia arritën qëllimit.

Pse nuk ishin kandidatët më të mirë?

Së pari, Luçiano Boçi është një kandidat i ricikluar nga kandidatura në 2007, ka humbur Bashkinë e Elbasanit, është bërë për 2-3 mandate deputet dhe rikthehet në Elbasan për të kandiduar prapë, pasi e quajti veten të fortë, sepse theu listën brenda opozitës.

Luçiano Boçi

Në fakt, thyerja e listës brenda opozitës, nuk është mbështetje totale qytetare. Thyerja e listës së opozitës në një qark është një mbështetje që të jep partia dhe demokratët në të gjithë qarkun tënd nga një padrejtësi që të bën kryetari.

Pra, Luçiano Boçi kishte 16 vjet në politikën e Elbasanit dhe pas një dekade e gjysmë demokratët i dhanë të njëjtin emër dhe figurë.

Ai mund të jetë një njeri i nderuar dhe i respektuar, por lind pyetja: 16 vjet PD-ja nuk prodhoi një emër për Bashkinë e Elbasanit që mund të rivalizonte me socialistët?

I kujt është deformimi? E kujt është paaftësia? E kujt është mungesa e zhvillimit politik?

Shkojmë në Durrës, tek Igli Cara, ish-kryetar PD-je, ish-deputet.

E nxorën nga zyra, i shqyen derën, i morën dhe çelësat. Po, ia mori çelësat ai që humbi zgjedhjet në Shkodër, Bardh Spahia, me të tjerë.

Zgjedhje të dështuara në Durrës. Nuk kishte kandidat më të mirë se Igli, ndoshta. Por lind pyetja: Si ka mundësi që PD-ja i ofron Durrësit prapë të njëjtin individ që e ka pasur kryetar, e ka pasur deputet, e riktheu në kryetar.

Nuk prodhoi Durrësi një emër tjetër, në më shumë se një dekadë e gjysmë, që të rivalizonte Vangjush Dakon, qoftë Ardian Çelën, qoftë një arkitekte të re që e marrin nga rruga dhe e bëjnë kryetare bashkie në Durrës?

Shkojmë më tej. Zbresim në Korçë.

Kandidatura e shkëlqyer, Ledina Aliolli. Deputete, kryetare e forumit të gruas për shumë vite, sa herë ka gara kandidon. Mbështetëse e Lulzim Bashës, e braktisën demokratët, nuk e votuan masivisht.

Nuk mundi dot kurrë që të krijonte frymë për të fituar.

Dhe nga 2005, Ledina kandidon gjithmonë në 18 vjet. Nuk mundi dot PD-ja e Korçës në këto 18 vite të prodhonte një tjetër emër, ndërkohë që e ka pasur riciklimin e figurave dhe qasjen ndaj figurave qytetare jashtë politikës shumë më të zhvillluar se çdo degë tjetër e PD-së në Shqipëri. Faktet flasin vetë.

Shkojmë në Shkodër, atje ku lexohet katastrofa.

Katastrofa elektorale e Shkodrës me Bardh Spahinë. Gazetarët që kanë qenë në terren një vit më parë në Shkodër e dinë shumë mirë se Bardh Spahinë nuk e donin. Ka fituar krejt rastësisht, thjesht dhe vetëm duke ndjekur siglën. Ata prisnin që tani të kishte një emër tjetër. Bardh Spahia quhej si një emër arrogant, fodull. Ndoshta mik i mirë, djalë i një intelektuali të madh si Ali Spahia, po nuk është e thënë që t’i ngjash babit në gjithçka.

Bardh Spahia ishte më shumë se një vit kryetar bashkie. Qytetarët shkodranë e panë, nuk ndryshoi asgjë, ngeli në stanjacion. Dikush argumenton fodullizmin dhe paaftësinë e tij, por kjo ka pak rëndësi. Shkon një kandidat me origjinë thelbësore të djathtë si Benet Beci, bashkëpunëtor i PD-së dhe Berishës, nuk përdor logon e PS-së, në fund vjen Luizi dhe i ngre një dallgë, dhe rezultatin në ditët e para e përmbys.

Por Bardh Spahia kishte qenë deputet, kandidat për deputet, në strukturat e FRPD-së, aktivist, por jo gjithmonë Bardh Spahia. Nuk ka demokratë të tjerë Shkodra, nuk u krijua një figurë në këto vite, pasi PD-ja e pa një vit më parë në zgjedhje se sa delikat ishte rezultati. Duke lënë mënjanë dhe pjesën që nuk analizoi aspektet sociale, si rasti i Luiz Ejllit, që ishte trendi dhe do të jetë edhe për ca kohë në vendin tonë.

Shkojmë më në jug. Shkojmë në Fier.

Kandidatit çfarë t’i thoje. Rezultati beterr. Shkojmë në Vlorë, por le të marrim këta që i quajtëm pesha të rënda, ka dhe nga këto humbje katastrofike si doktor Admir Sinamati në Kukës, që gjithçka e pati si pasojë të Alibeajt dhe partisë së vulës, por analiza e fakteve na sjell në përfundimin se kandidatët nuk ishin më të mirë, ishin kandidatë të ricikluar, kandidatë të ripërdorur, kandidatë që kishin humbur më parë, kandidatë që kishin pasur pushtet, emra, të cilët kanë pasur akuza të fortë për korrupsion, emra të rikthyer, por qytetarët bëjnë një pyetje të thjeshtë: Ka 15 vite e të njëjtët njerëz na sollët?

Po kaq katastrofike do të jenë dhe zgjedhjet e 2025-ës

Në 2013 e rrëzuan pushtetin për këta emra. Nuk e votuan Lulzim Bashën, po për këta emra. Vjen Sali Berisha dhe u ofron të njëjtit emra që ka pasur dhe ai. Dhe fajin që nuk e kanë votuar e kanë shqiptarët.

Jo! Nuk kanë asnjë faj shqiptarët dhe janë të pagjykueshëm në këtë rast. Ajo që duhet të gjykohet është kasta politike, se si do të riciklohet, se si do të mbajë emra në qarkullim apo duke shpresuar se do t’i fitojnë zgjedhjet me cilindo emër që do t’i ofrosh, aq më keq në zgjedhjet lokale, ku jep emra të ripërdorur është e pamundur që të krijosh frymë dhe të vish në pushtet me të tilla lojëra politike.

Po kaq katastrofike do të jenë dhe zgjedhjet e 2025-ës në rast se vazhdohet të shkohet me të njëjtën logjikë. Pa folur këtu për një organizim totalisht jofunksional nga jugu në veri, me disa përjashtime të vogla duke i dhënë ndoshta një vlerësim më të madh Tiranës dhe ndonjë bashkie tjetër, shumica ishin ku thërret qameti./ CNA.al