Mirë doktorin, po hiqni Mulin & Co

16 Maj 2023, 17:14, Editorial REDAKSIONALE

Fotomontazh - Flamur Noka, Arben Ristani, Ervin Salianji, Edmond Spaho dhe Albana Vokshi

Opozita regjistroi një humbje të thellë në zgjedhje, një humbje katastrofë që vjen nga çorganizimi, nga paaftësia, nga fakti që pritshmëritë e opinionit ishin të ulëta, jo për shkak të premtimeve, por për shkak të atyre njerëzve që shfaqeshin ndoshta në krah të kandidatëve.

Shumë nga kandidatët ishin të rikandiduar, humbës të mëparshëm, servilë të Lulzim Bashës, e kështu me radhë, pa folur pastaj për fytyrën e Flamur Nokës që shkëlqen si Sekretar i Përgjithshëm i PD-së, Ervin Salianjit, Albana Vokshit & Co.

Albana Vokshi

Njerëz që qëndronin në krah të Bashës, që sot kujtojnë se mund t’i gënjejnë njerëzit e të mbledhin votat sepse ka ikur nga karrigia Luli dhe ka ardhur në karrige Saliu.

Ndoshta është koha që dhe vetë Berisha të reflektojë. Të bindurit, apo servilët t’i kalojë në një front tjetër, përpara duhet të ketë të rinj, duhet të ketë zhvillim tjetër dhe një alternativë të vërtetë.

Mirë doktori nuk jep dorëheqjen, po këta të tjerët kujt i duhen? Për çfarë shërbejnë?

Cili ishte rezultati që regjistroi Arben Ristani në Korçë?

Arben Ristani

Ishte gati 5 mijë vota më pak se zgjedhjet lokale të vitit 2015, rival tjetër nga partia e Lulit dhe e Alibeajt nuk kishte. Për çfarë duhet Arben Ristani kur dështon kudo që shkon?

Filo, një tjetër mandat në Korçë/ Ledina Aliolli pëson humbjen e thellë
15 Maj, 12:23

Flamur Noka në Elbasan, një humbje katastrofike me një rezultat spektakolar për socialistët. Ku ndryshoi nga Gazment Bardhi që u kryqëzua në zgjedhjet e 2021-shit?

Ka një rezultat shumë të dobët, e të gjithë me radhë kështu, përfshi dhe Edmond Spahon apo ndonjë personazh tjetër politik që ka 15 vjet mban karrigen dhe e quan veten kryetare e gruas e ndonjë tjetër që gjithmonë rri nënkryetar, e kështu me radhë.

Është koha që PD të rikthehet te një proces i vërtetë hapjeje, ndryshimi e rithemelimi, jo një farsë që nga Foltorja në Rithemelim na soli Flamur Nokën gjeneral në PD.

Flamur Noka

Ndoshta lufta me mullinjtë e erës dhe Sanço Pançot e Don Kishotët vërdallë mund të prodhojnë shumë, por jo më shumë sesa kaq në këto zgjedhje. Dikush mund të dojë t’i mbajë, dikush tjetër pretendon se do të kalojnë dhe dy vjet dhe shqiptarët do të ndryshojnë, do t’i pranojnë.

Jo! Aspak! Me këta individë të paaftë në organizim, me emra të rikandiduar dhe emra të konsumuar, PD do ta ketë shumë vështirë, përfshi këtu dhe pjesën e bashkimit, që duket e pamundur tani me përplasjet e ashpra që po ndodhin ditë pas dite.

Ndaj dhe koha ka ndezur një llampë të kuqe, alarm për opozitën, një bojkot masiv që iu drejtua asaj. Kandidatët kanë të gjithë me mijëra vota më pak sesa zgjedhjet e 2021-shit apo zgjedhjet e 2015-ës, ndërkohë që të majtët janë prej 10 vitesh në pushtet.

Redaksionale/ Fitorja e paralajmëruar e Ramës dhe disfata e paturpshme e opozitës
14 Maj, 20:04

Përçarja, ka shumë faktorë, blerje votash dhe çdo akuzë tjetër mund të hidhet, por në përfundim e gjitha nuk ngelet gjë tjetër, thjeshtë dhe vetëm justifikim politik.

PD-ja ka humbur zgjedhjet dhe alternativa opozitare nuk u mbështet nga qytetarët, për më tepër ranë edhe shumë bastione.

Ishte një frymë kombëtare, e gjithë Shqipëria nuk mund të blihet.

Prandaj, mirë doktori do të qëndrojë e nuk e heqin dot, apo të gjithë e pranojnë dhe thonë se nuk ka bërë asnjë gabim, po këta të tjerët kujt i duhen dhe çfarë i sjellin Partisë Demokratike?

Ka edhe më keq se kaq, siç ishte 2021-shi mund të ketë dhe në 2025-ën. Prandaj opozita duhet të hapë sytë dhe jo të futet nën sqetullat e individëve që kërkojnë gjithëpushtetshmërinë dhe karriget për interesat e tyre dhe jo fitoren e Partisë Demokratike./ CNA.al