E fundit!

13:05 Aktualitet

Kallëzohet në SPAK Edi Rama

Grupi Parlamentar i PD-së kallëzon në SPAK Edi Ramën për v...

Svetllana Tikanovskaja: Më thanë se bashkëshorti im ka vdekur në burg. Bjellorusia i është shitur Putinit

12 Korrik 2023, 22:00, Blog Irene Soave

Svetllana Tikanovskaja: Më thanë se bashkëshorti im ka vdekur

Drejtuesja e opozitës bjelloruse në mërgim, ndodhet në Romë për të takuar drejtuesit e qeverisë italiane dhe një grup parlamentarësh. E pyes si është në këto momente dhe përgjigja e saj është:”Forcat fizike nuk më mungon, por morali është i lëkundur. Kur nisi rebelimi, i thamë vetes: Edhe një javë dhe regjimi bie”.

Por më 9 gusht, mbushen 3 vite që nga zgjedhjet presideciale në Bjellorusi, të cilat u manipuluan sërish nga diktatori Aleksandër Llukashenko, përmes përjashtimit nga gara të 10 kandidatëve të opozitës, përfshirë blogerin Sergej Tikanovski, bashkëshortin e Svetllanës, i cili më vonë u burgos.

“Ai ishte i pari nga mijëra njerëz që u burgosën. Sot nuk dimë asgjë për të, si për shumë të burgosur të tjerë politikë. Letra e tij e fundit mban datën 9 mars. Madje na dhanë lajmin se ai vdiq në qelinë e tij në burgun Zhodzina. Por ne mendojmë se kjo është një gënjeshtër për të më frikësuar. Nuk është hera e parë që ma thonë diçka të tillë. Megjithatë kam 4 muaj që nuk kam asgjë prej tij. Fëmijët i shkruajnë çdo ditë, ndërsa vajza jonë qan gjithmonë”- thotë Svetllana.

Pas arrestimit të Sergeit, është ajo, një ish-mësuese në atë kohë dhe nënë e dy fëmijëve, që drejton qeverinë dhe “parlamentin hije”. Janë rreth 100 persona, ata që kryejnë nga jashtë funksionet e asaj që ka mbetur nga opozita kundër diktatorit të fundit të Evropës. Ajo thotë se pas takimeve në Itali, do të kërkojë më shumë vëmendje ndaj Bjellorusisë në samitin e NATO-s në Vilnius në datat 10-11 korrik.

60 mijë të burgosur, shumë të tjerë në mërgim. Në çfarë faze është opozita në vendin tuaj?

Ka shumë urrejtje për shenjat në rritje të ndërhyrjes së Rusisë. 86 për qind e qytetarëve janë kundër Llukashenkos. Por zërat kundër shtypen. Aty të arrestojnë për gjithçka, madje edhe nëse flet bjellorusisht. Gjuha jonë është bërë një kod për disidentët. Autoritetet në çdo nivel flasin vetëm rusisht.

A ka ndonjë të re mbi Prigozhin? A ndodhet ai vërtet në Minsk?

Gjërat nuk janë shumë të qarta. Avioni i tij personal u ul në Minsk, por më pas u ngrit sërish.

Dhe pas grushtit të dështuar të shtetit disa mijëra ushtarë të Vagnerit, duket se do të strehohen në Bjellorusi...

Të dhënat që kemi nga “inteligjenca popullore” na thonë se ata nuk kanë mbërritur ende. Nuk dihet se sa mund të jenë, Megjithatë fotot satelitore tregojnë se po ndërtohen struktura dhe kampe për t’i strehuar. Ne i konsiderojmë shumë të rrezikshëm. Llukashenko thotë se do të vijnë dhe trajnojnë ushtarët tanë. Por për çfarë? Për të përdhunuar? Për të vrarë civilë? Dhe kush do të jetë në gjendje t’i kontrollojë ata, duke qenë se edhe vetë Putini tregoi se nuk është në gjendje ta bëjë këtë?

Çfarë roli luajti në të vërtetë Llukashenko në dhënien fund të rebelimit?

Ai e paraqet veten si një paqe-bërës, një burrë shteti. Në fakt, ai ishte thjesht i tmerruar nga fundi i regjimit në Moskë, sepse e di se e pret i njëjti fat. Putini u poshtërua duke kërkuar ndihmë nga vasali dhe borxhliu i tij.

Çfarë nënkuptoni me “inteligjencë popullore”?

Mediat tona janë që të gjitha të kontrolluara nga regjimi në Minsk. Megjithatë ne kemi mijëra “gazetarë qytetarë”, që përhapin lajme, foto dhe dokumente të të gjitha llojeve. Ka nga ata që në disa fshatra që nuk kanë internet përhapin mimeografi. Kur Lukashenko përfundoi në spital, të gjithë e dinin këtë gjë.

Si është gjendja e tij shëndetësore?

Nuk është e qartë. Por ai ndiqet nga mjekët më të mirë, ndaj nuk mbajmë shumë shpresa se nga skena do të nxjerrë sëmundja.

Gjithsesi, çfarë do të ndodhte nëse ai do të vdiste apo do të rrëzohej nga pushteti?

Kemi plane për rrethana të ndryshme. Në platformën Telegram, ka disa kanale me qindra mijëra abonentë, ku disa ish-ushtarakë që dezertuan në vitin 2020 do të shpërndajnë udhëzimet se si duhet vepruar për çdo skenar. Njerëzit e dinë dhe janë gati. Plani, edhe pse sekret, është gati.

E keni parë atë?

Unë e kam lexuar.

Armët taktike bërthamore ruse janë vendosur në territorin e Bjellorusisë. Llukashenko thotë se mund t’i aktivizojë ato “me një telefonatë”...

Në këtë mënyrë ai na shiti tek Rusia. Për shumë vite, nuk do të arrijmë të çlirohemi prej tyre. Njerëzit janë shumë të frikësuar. Ne jemi një popull që e kemi përjetuar tragjedinë e Çernobilit. Ai thotë se ato do të na mbrojnë nga armiqtë, që jeni ju perëndimorët, por në realitet ato na shndërrojnë në një shënjestër. Dhe ukrainasit në një armik, në një bashkë-agresor. Ndërkohë, ne dhe ukrainasit jemi në të njëjtin pozicion:duhet të jemi sa më shumë evropianë./ “Corriere della Sera” - Pershtatur nga CNA