E fundit!

09:49 Kosova & Bota

Kurti: Kosova nuk kishte nevojë për këto zgjedhje, rezultati e dëshmoi qartë

Kryeministri në detyrë i Kosovës, Albin Kurti u shpreh në ...

“Dara” e trafikut të drogës, ja pse Franca ka një problem madhor me kriminalitetin

8 Korrik 2023, 19:30, Blog Marco Valle

“Dara” e trafikut të drogës, ja pse Franca ka një

Atmosfera në Paris dhe në shumicën e Francës është e rënduar. Krimi i organizuar është gjithnjë më i fortë, gjithnjë e më i dhunshëm, gjithnjë e më i guximshëm dhe gjithnjë e më i pasur. Kjo është ajo që del nga raporti vjetor i paraqitur nga “Service D’information, Reinignment Et D'analyse Stratégique Sur Le Kriminalitè Organisée” (SIRASCO), observatori ndërministror mbi mafiet vendase dhe të huaja që veprojnë në vend.

Shqetësimin më të madh e shkakton trafiku i drogës. Pavarësisht rritjes së ndjeshme të sekuestrimeve nga policia - 27.7 ton kokainë (ose 5 për qind më shumë krahasuar me 2021), 128.6 ton kanabis (+15 për qind), 1.4 ton heroinë (+9.5 për qind), 1 milion tableta ekstazi (+ 6 për qind), 300 kilogramë amfetaminë (+ 15 për qind) - fenomeni vazhdon të përhapet thuajse i patrazuar, duke gjeneruar “një mori aktivitetesh të ligjshme dhe mbi të gjitha të paligjshme.

80 për qind e “larjes së hesapeve”, 25për qind e armëve të zbuluara dhe 2.7 miliardë eurot e sekuestruara nga bota e krimit, vijnë nga tregu i drogës thekson SIRASCSO. Disa organizata kriminale vendase (kryesisht klane korsikane) dhe një mori kartelesh ndërkombëtare e menaxhojnë këtë biznesin të madh.

Mes tyre janë kartelet e Amerikës së Jugut, “mokro mafia” marokene (por me bazë në Holandë dhe Belgjikë), mafiozë dhe kamorristë italianë, ballkanas nga të gjitha vendet, kinezë, rusë dhe ukrainas. Një panoramë në ndryshim të vazhdueshëm dhe me lëvizje të shoqëruar nga rivalitete të ashpra dhe nga grindje të vazhdueshme dhe e përgjakshme.

Këto përplasje shkaktuan 41 të vrarë vetëm vitin e kaluar, një e treta e të cilëve ishin shumë të rinj. Epiqendra e krimit është rajoni i Parisit i ndjekur nga Marseja, Dynkerku dhe Lë Havrë, pikat kryesore të qasjes ndaj drogës

Por situata është e tensionuar edhe në Belfort, Renë, Tuluzë, Metz, Avinjo, Tulon dhe Sherburg. Shqetësues është edhe tregu paralel dhe shumë i lulëzuar i armëve. Nga Ballkani, nga Saheli dhe gjithnjë e më shumë nga Ukraina - duke kaluar nëpërmjet Spanjës, Italisë apo Zvicrës - mbërrijnë vazhdimisht ngarkesat me AK-47.

Nuk është rastësi që kallashnikovët janë arma e preferuar e bandave për të mbrojtur vendet e trafikut të drogës apo për të pushtuar ato të bandave rivale. Por ajo që shqetëson më së shumti analistët është zgjerimi i vazhdueshëm i korrupsionit.

Ai nuk ka të bëjë më vetëm me të ashtuquajturat “kategoritë në rrezik” - transportuesit, policët, punonjësit e porteve, doganierët, zyrtarët e niveleve të ulëta - por tani shtrihet edhe në politikën lokale, tek bashkitë dhe asambletë rajonale.

Në raport thuhet se gjithnjë e më shpesh “mbledhja e votave mbështetet apo organizohet nga figura të lidhura me grupe kriminale të specializuara në trafikun e drogës”. Depërtimi i korrupsionit në klasën politike franceze, përbën tani “një kërcënim që shtrihet në të gjithë vendin, dhe është një element thelbësor i trafikut të drogës”.

Një sfidë kjo e paprecedentë për Francën. Gijom Hazar, drejtor i Zyrës Qendrore për luftën kundër korrupsionit dhe krimeve financiare, ankohet për mungesën e burimeve (vetëm 40 zyrtarë konsiderohen funksionalë në të gjithë vendin), duke i kërkuar qeverisë një rritje të ndjeshme të personelit në këtë organ.

Ndërkohë SIRASCSO paralajmëron:”Nisur nga përvoja e fqinjëve tanë evropianë, dhe të përballur si kurrë më parë me praninë e gjithanshme të krimit të organizuar, ne duhet të reflektojmë mbi aftësitë tona hetimore aktuale”.

Me pak fjalë, është urgjente të ndryshohet mënyra e veprimit, dhe të përgatitemi për më të keqen përpara se të jetë tepër vonë. Kapitujt e tjerë të raportit i kushtohen krimeve financiare e kibernetike, prostitucionit (që sipas analistëve ka pësuar një rritje të fortë pas pandemisë së Covid-19), eko-mafiave dhe vjedhjeve të porositura.

Ky seksion i fundit paraqet disa të dhëna interesante. Pas vjedhjeve të makinave luksoze (preferohen gjermane), qëndron një zinxhir i tërë furnizimi që të çon deri në Lituani dhe Moldavi. Ndërkohë specialistët më të njohur në këtë sektor janë rumunët

Në tetor 2021, gjatë kampionatit botëror të çiklizmit në Roubaix, ata u nbënë të famshëm për grabitjen e 22 biçikletave profesionale të skuadrës italiane. Një vjedhje me vlerë 700 mijë euro. Në shenjestër janë edhe shtëpitë e sportistëve, dhe këtë e dinë për fat të keq edhe kampionë si Angel Di Maria, Julian Draksler, Mario Lemina. Të preferuarit e publikut, por edhe viktima të grabitjeve të bujshme./ Përshtatur nga CNA