web counter
LEXO PA REKLAMA!

SHKARKO APP

App Store
Google Play

E fundit!

x

Art në çokollatë/ Puna artizanale dhe plot dashuri e një vajze korçare

27 Maj 2025, 15:52, Qyteti im CNA

Art në çokollatë/ Puna artizanale dhe plot dashuri e një

Në qytetin e Korçës, një vajzë ka sjellë një frymë krejt të re në botën e ëmbëlsirave artizanale. Ajo quhet Sotilda Sotiri dhe prej afro tri vitesh realizon çokollata artizanale të personalizuara, të cilat nuk janë thjesht ëmbëlsira, por vepra arti që gërshetojnë shijen me estetikën. Pas një eksperience në një pastiçeri në Tiranë, Sotilda vendosi të kthehej në qytetin e saj të lindjes për të ndërtuar një rrugëtim unik, e për të sjellë një risi për Korçën përmes çokollatës.

 “Unë kam gati 3 vjet që realizoj çokollata artizanale të personalizuara në qytetin e Korçës. Këtë iniciativë e kam marrë që kur jam kthyer nga Tirana. Kam punuar në pastiçeri atje dhe e kam marrë si zanat. Mendova që të sillja një risi për qytetin e Korçës”,-thotë e reja.

Art në çokollatë/ Puna artizanale dhe plot dashuri e një

Çdo produkt që del nga duart e saj është i personalizuar, nga përbërësit te ngjyrat, e deri te forma. Shumica e klientëve preferojnë buqetat me lule prej çokollate, me shije të ndryshme, një punë që kërkon kohë dhe përkushtim.

“E vështirë është sepse çdo realizim i imi bëhet në bazë të kërkesës së klientëve, si në realizimin e çokollatës, ngjyrës së saj e patjetër edhe në shije sepse asnjë klient s'është njësoj me tjetrin. Shumica e tyre preferojnë buqetat me lule prej çokollate me shije të ndryshme, e patjetër që do jemi në shërbim të klientit”,-thotë Sotiri.

Art në çokollatë/ Puna artizanale dhe plot dashuri e një

Një nga çokollatat më të preferuara është “Çokollata Dubai”, një kombinim i dy llojeve të çokollatës, me mbushje fistiku, arre dhe kadaifi. Përveç çokollatave, Sotilda realizon edhe konfetat për raste të veçanta si dasma, pagëzime apo baby shower. Çdo produkt kërkon kohë, detaje dhe shpeshherë, shumë sakrificë.

 “Marr si shembull çokollatën që është në modë, çokollata Dubai, e cila realizohet me dy lloje çokollatash, atë 100% të zezë dhe çokollatë qumështi. Mbushjen e bën me stika, arra dhe kadaif. Pastiçeritë e tjera e bëjnë vetëm me krem fistiku, unë i shtoj edhe arrat sepse i japin shije. Një çokollatë Dubai mund të dojë 20 minuta për t'u realizuar ndërsa çokollatat më të vështira janë buqetat me lule, ku çdo lule ka realizimin e vet me minutazhe të ndryshme. Në një buqetë prej 10 lulesh, një lule kërkon 10-15 minuta punë. Nga ana tjetër kemi edhe konfetat, për dasma, pagëzime, baby shower me zbulimin e gjinisë dhe këto marrin 20-30 minuta një konfetë”,-tregon Sotilda.

Art në çokollatë/ Puna artizanale dhe plot dashuri e një

Sotilda tregon se çmimet variojnë nga 200 deri në 500 lekë të vjetra për një konfetë, ndërsa buqetat me lule fillojnë nga 1000 lekë të rinj. Kjo bën që një pjesë e klientëve të stepen, por ka shumë të tjerë që tashmë prej 3 vitesh janë kthyer në klientë besnikë.

“Ka klientë që janë të kënaqur, ka edhe që jo. Do thuash 'pse'? Sepse ka klientë që bazohen në çmim, mund t'ju pëlqejë si produkt, si çokollatë, por stepen edhe nga çmimi. Ka klientë që janë besnikë dhe porositin gjithmonë. Çmimi në çdo konfetë (pagëzimi, për qerasje ditëlindje apo dasme) fillon nga 200 lekë të vjetër deri në 500 lekë të vjetër. Ndërsa buqetat me lule fillojnë nga 1000 lekë të rinj e më pas varet nga porosia e madhësisë së buqetës”,-tregon ajo.

Art në çokollatë/ Puna artizanale dhe plot dashuri e një

Megjithatë, ajo që e bën më të vlefshëm çdo minutë të kaluar në punë është reagimi i klientëve. Me dy universitete të përfunduara, Sotilda ka zgjedhur një rrugë që për të është më shumë se një profesion. Është një pasion që e ushqen çdo ditë me dashuri dhe kreativitet.

“Patjetër që do ta vazhdoj. Çokollata është primare. Dikush mund të thotë që 'me dy universitete dhe i je futur një arti tjetër'. E kam për krenari dhe jam shumë e lumtur. Edhe pse të merr shumë kohë e ka shumë lodhje, kur ia çon porosinë klientit dhe kur të dërgon mesazh duke thënë sa i kënaqur ka ngelur, atje ndiej emocion dhe gëzohem pa masë”,-tregon Sotilda.

Art në çokollatë/ Puna artizanale dhe plot dashuri e një

Në një kohë kur gjithçka duket e prodhuar në seri, është frymëzuese të shohësh të rinj si Sotilda që zgjedhin rrugën e pasionit, duke krijuar me dorë dhe zemër. Në çdo çokollatë të saj ka më shumë se shije. Ka histori, përkushtim dhe dashuri për artin. Nga Korça, ajo na kujton se ëmbëlsirat më të mira janë ato që bëhen me shpirt./CNA





Lajmet e fundit nga