web counter
LEXO PA REKLAMA!

SHKARKO APP

App Store
Google Play

Fshati “Andon Poçi” i Gjirokastrës feston Ditën Ndërkombëtare të Vllehëve me festivalin “Kënga Vllahe”

24 Maj 2025, 16:47, Qyteti im CNA

Fshati “Andon Poçi” i Gjirokastrës feston Ditën

Në fshatin e bukur “Andon Poçi” të Gjirokastrës u mbajt me solemnitet dhe emocione të veçanta festivali “Kënga Vllahe”, në nder të Ditës Ndërkombëtare të Vllehëve. Ky aktivitet kulturor i kthyer në traditë mblodhi bashkë anëtarë të komunitetit vlleh nga Shqipëria.

Pjesëmarrës nga  Kavaja, Tirana, Korça, Dibra, Elbasani dhe më gjerë, mbërritën në Jug me veshjet e tyre tradicionale, këngët e trashëguara dhe historitë e gjyshërve që dikur nuk flisnin shqip – për të ruajtur dhe nderuar rrënjët e tyre.

Një pjesëmarrëse, Leonora Mane e ardhur nga Kavaja ka ekspozuar kostumin e gjyshes së saj.

E emocionuar, ajo rrëfeu: “Gjyshja ime nuk fliste shqip,  jo për përjashtim, por për të ruajtur identitetin tonë. Sot, ajo që më dhimbset më shumë është gjuha , është një gjuhë me bazë latine, e kërcënuar nga asimilimi, dhe shumë e vështirë për ta shkruar. Por ne nuk duhet ta lëmë të humbasë”.

Thoma Puriqi njëri prej organizatorëve shprehu kënaqësinë që një ngjarje kaq domethënëse po zhvillohej pikërisht në “Andon Poçi”.

“Sot hapim simbolikisht një ditë që u vendos për herë të parë 120 vite më parë ,Dita Ndërkombëtare e Vllahëve, dhe jemi të lumtur që po e organizojmë. Të ardhurit nga të gjitha rrethet ku jetojnë vllehët kanë sjellë grupet e tyre tradicionale, me këngë që janë gati një mijë vjeçare, veshje dhe kulturë që flasin për lashtësinë tonë”, u shpreh ai.

 

Festivali u shndërrua në një skenë të hapur të trashëgimisë kulturore dhe gjuhësore vllahe, duke përçuar mesazhe bashkimi, krenarie dhe identiteti. Muzika, vallet dhe emocionet përshkuan fshatin, ndërsa organizatorët theksuan domosdoshmërinë e ruajtjes së kësaj trashëgimie të gjallë që sfidon harresën dhe kohën./ CNA





Lajmet e fundit nga