Vokshi tregon vështirësitë brenda grupit të PD-së/ Mesazh, deputetëve të Bashës

9 Korrik 2022, 18:40, Politikë CNA

Vokshi tregon vështirësitë brenda grupit të PD-së/

Deputetja Albana Vokshi

Deputetja Albana Vokshi, ka folur pasditen e sotme për problemet brenda Grupit Paralamentar të Partisë Demokratike.

Vokshi tha se grupi i PD-së ka ende vështirësi, për shkak të axhendës së ish-drejtuesit Lulzim Basha dhe pak deputetëve, të lidhur me të për interesa personale.

Ajo tha në emisionin “Kjo Javë” se pjesa tjetër e PD-së është më e fortë dhe e bashkuar, ndërsa bëri ftesë që çdo deputet t'i bashkohet strukturave të zgjedhura.

"Të gjithë e dimë që Grupi Parlamentar i PD-së ka vështirësitë e veta për shkak të axhendës së ish-drejtuesit dhe pak deputetëve, të lidhur me të për interesa personale, që nuk dua të merrem. Por pjesa tjetër e PD është më e fortë dhe e bashkuar dhe protesta e tregoi që jemi më të bashkuar dhe baza është e bashkuar.

Kushdo deputet është i ftuar, që nuk i është bashkuar Foltores, Rithemelimit apo strukturave të zgjedhura me një anëtar një votë, një PD më demokratike se kurrë më parë.

Kemi qenë shumë ftues dhe bashkëpunues në mënyrë konstante. Vijojmë bisedimet me një pjesë të deputetëve një pjesë e të cilëve janë me zemër me ne, por shumë shpejt do të hedhin edhe hapin e duhur.

Gjithësecili deputet është i lirë të mendojë dhe të gjykojë për vendime të rëndësishme. Por kushdo që ka mendim politik, jam e sigurt që vendin e ka aty ku është baza, anëtarësia, votuesit.

Pavarësisht ndikimeve apo imponimeve të faktorëve të brendshëm apo të jashtëm, shpresoj e besoj që ata do t'i përkasin shumë shpejt vendit që i takon apo do të jenë brenda pritshmërive të elektoratit që i ka mbështetur. Duhet të kthehen në bazë", u shpreh ajo.

Më tej, Vokshi theksoi se PD-ja është gati të vijojë të bëjë opozitë reale, për të rrëzuar kryeministrin Edi Rama.

“Kemi kaluar një proces jo pak të vështirë, riorganizmin e PD. Fakti i mirëorganizimit të protestës ishte testi i parë që u kalua me sukses edhe sepse elektorati na besuan. Pra jemi një forcë që qytetarët i besuan. Jemi një front për shpëtimin e Shqipërisë, ata besuan tek kjo forcë politike. A jemi ne gati? Po jemi! Ishim në shesh, do jemi në shesh, vetëm protesta, është rrugë me një kalim, nuk ka kthim pas. Do të shfrytëzojmë çdo hapësirë për të bërë opozitë reale”, nënvizoi deputetja./ B.A. – CNA.al