Qytetarët e thanë fjalën e tyre/ A mund ta rrëzojnë Ramën, Berisha dhe Meta?

16 Korrik 2022, 10:39, Politikë CNA

Qytetarët e thanë fjalën e tyre/ A mund ta rrëzojnë

Protesta e 7 korrikut ishte madhështore. Ajo u pa nga qytetarët si një shpresë për të ardhmen dhe dolën e mbushën sheshin.

Qytetarët dolën dhe shprehën vullnetin e tyre, nuk u morën me organizatorët. Emëruesi i përbashkët i atyre që mbushën sheshin ishte “rrëzimi i Edi Ramës”.

Në krye të protestës ishte ai që e thirri, kreu i PD-së, Sali Berisha, i shoqëruar nga drejtues të LSI-së, si Monika Kryemadhi.

Por, a mund t’i përgjigjen uraganit të qytetarëve për rrëzimin e Ramës, Berisha dhe Ilir Meta, i cili pas largimit nga Presidenca pritet t’i bashkangjitet kreut të PD-së, në protesta.

A mund ta tërheqë këtë tren lokomotiva e Berishës dhe Metës?

Pikëpyetjet ngrihen, pasi përmbysja e Edi Ramës dhe qeverisë që ai drejton për tri mandate radhazi, nuk mund të vijë nga ish-ministrat e dyshuar për korrupsion të Berishës dhe Metës apo nga dhjetëra servilë që deri me dje rrethonin Lulzim Bashën dhe sot kanë ndryshuar lider.

Nuk mund ta mbushin lokomotivën me njerëz për ta çuar drejt fitores, Monika Kryemadhi, e shumëlakuar për pasuri të dyshimtë, ish-ministrat e dyshuar për korrupsion, Flamur Noka dhe Petrit Vasili, apo “kurtizanët” e Lulzim Bashës, si Dorian Teliti, ish-nënkryetarja e PD-së, Grida Duma, që bërtiste “na priiii Lulzim”, Ervin Salianji që sulmonte demokratët në 8 janar me shkop në dorë, Albana Vokshi e të tjerë.

Qytetarët kërkuan një hapësirë për t’u ngritur për të reaguar dhe jo të djeshmit të përfshirë në bëma e gjëma të përfitojnë prej kësaj.

Uragani i qytetarëve nuk mund të tërhiqet drejt fitores nga ish-ministra, ish-deputetë e ish-drejtorë që kanë bërë namin në kohën që kanë qenë në pushtet.

Për shkak të tyre, Edi Rama ka jetëgjatësi në pushtet.

Qytetarët nuk duan të zëvendësojnë hajdutët me njëri-tjetrin, por të kenë një qeveri që të punojë në të mirë të tyre.

Dolën në shesh, e thanë fjalën e tyre me pjesëmarrjen, por Berisha dhe Meta dyshohet shumë se mund të përmbysin Edi Ramën, me të të dyshuarit për korrupsion, rreth tyre./CNA.al