Ku ndodhen jashtëtokësorët?

5 Mars 2023, 15:21, Kuriozitete Guy P.Harrison

Foto ilustruese

Konfirmimi i ekzistencës së jetës jashtëtokësore, do ishte një moment kulmor në historinë njerëzore dhe do të na detyronte të rishikonim rrënjësisht perspektivat tona psikologjike. Bazuar në madhësinë, moshën dhe përmbajtjen e Universit, është e arsyeshme të dyshohet, ndoshta edhe të pritet, që qytetërimet jashtëtokësore të ekzistojnë në një numër të madh.

E megjithatë gjithçka që dimë deri më sot është vetmia jonë. Më shumë se 70 vjet më parë, fizikani fitues i Çmimit Nobel Enriko Fermi bëri pyetjen e famshme:”Ku janë ata?”, e cila u bë e njohur si Paradoksi i Fermit. Deri më sot, nuk kemi asnjë vizitë, asnjë provë, madje as zhurmën e zbehtë të ndonjë mjeti fluturues që vjen nga shoqëri të largët post-biologjike.

Me gjithë respektin për Ekuacionin Drejk, ka të ngjarë që ne të jemi vetëm. Gjithsesi nëse qytetërimet jashtëtokësore ekzistojnë në një numër të madh, atëherë një ose disa kombinime nga tetë përgjigjet e mëposhtme ndaj pyetjes së Fermit, janë një bast shumë i mirë për të shpjeguar pse nuk ka ndodhur ende kontakti i parë me ta.

Koha

Njerëzit anatomikisht modernë janë pak më shumë se 300.000 vjet të vjetër, dhe qytetërimi është 6 ose 7 mijë vjet i vjetër. Këto janë fraksione të vogla momentesh në një Univers ku koha matet në miliarda vjet. Pra mund të mos ketë pasur mjaftueshëm kohë që të na kontaktojnë jashtëtokësorët.

Ne jemi të neveritshëm

Ndoshta faji është i yni. Ndoshta jashtëtokësorët na vëzhguan dikur, dhe nuk u pëlqeu ajo që panë. Mund të ishim një formë jete e çuditshme, të çmendur, të neveritshëm dhe të pamatur saqë ata thanë “Jo faleminderit” dhe vazhduan më tutje. Në fakt ne lejojmë një pjesë të konsiderueshme të species tonë të vuajë në varfëri ekstreme, ndërsa përdorim vazhdimisht teknologji vdekjeprurëse kundër vetvetes.

Kozmosi është një vrasës

Universit nuk i intereson sa të zgjuar jemi. Ai ka shumë mënyra për të zhdukur qytetërimet. Ndoshta vrimat e zeza shkatërrojnë shoqëri jashtëtokësore me një frekuencë të tillë, që nuk u lejon qytetërimeve kohë të mjaftueshme për të gjetur njëri-tjetrin.

Largësia

Fizika aktuale deklaron me besim se asgjë nuk mund ta tejkalojë shpejtësinë e dritës. Distancat e jashtëzakonshme midis yjeve dhe midis galaktikave, përkthehen në udhëtime që ndoshta janë përtej durimit të shumicës apo të gjithë jashtëtokësorëve. Nëse shumica e tyre ndodhen në anën tjetër të Universit, do t’u duheshin miliarda vjet për të mbërritur tek ne.

Nuk i interesojmë askujt

Po sikur shumica e tyre të mos duan apo mos kenë nevojë të eksplorojnë, zgjerohen apo kolonizojnë? Po sikur kjo të jetë sjellje të jetë unike e jona? Ndoshta ata priren të shohin punët e tyre, pasi janë të kënaqur apo aq të sofistikuar sa të mos humbin kohë duke menduar mbi jetën e përditshme në botë të largëta.

Shkenca nuk është e pashmangshme

Shoqëritë tona sot janë aq të ngopura me shkencë dhe teknologji, saqë na duket sikur shkenca lind natyrshëm si një nënprodukt i të menduarit. Por mbase zbulimi shkencor dhe teknologjia komplekse mund të jenë të rralla midis formave jashtëzakonisht inteligjente të jetës.

Vetë-shkatërrimi është i pashmangshëm

Ndoshta qytetërimet e tjera janë nga nevoja aq ambicioze, krijuese dhe të pangopura, saqë në mënyrë të pashmangshme e kafshojnë bishtin e tyre. Ndoshta kur imagjinata dhe teknologjia rriten së bashku, gjatë mijëra apo miliona viteve, gjasat e vetë-shkatërrimit rriten ndjeshëm, dhe në fund ndodh diçka.

Ne jemi të mërzitshëm

Ndoshta alienët nuk kanë interes të takohen me ne. Mund të ndodhë që ne të lëvizim, të komunikojmë dhe të mendojmë aq ngadalë apo në mënyrë të paaftë, saqë ata zgjedhin të vizitojnë botë të tjera ose të qëndrojnë të zhytur në universet e tyre virtuale./ Përshtatur nga CNA.al