E fundit!

11:58 Aktualitet

ABI Bank ka refuzuar të paguajë gjobën 120 milionë për një portal gjobaxhi

ABI Bank ka refuzuar të paguajë gjobën 120 milionë për një...

Edi Rama, si Pandi Gjiza

28 Korrik 2022, 14:24, Editorial Elvi FUNDO

Pandi Gjiza ka qenë një personazh mjaft i njohur në qytetin e Korçës, por edhe më gjerë. Një njeri, që e ka njohur kushdo deri në brezat e viteve ’90.

Një personazh mesatar që thuajse ecte me hapin kalërues të tij, kur bërtiste dhe lëshonte zërin trumbues, a thua se ishte një megafon me fuqi të madhe ditën kur luante "Skëndërbeu" futboll apo vajzat e "Skëndërbeut" volejboll.

Më të vjetrit e kanë njohur më mirë. Ai quhej Pandi Gjiza. Por, emrin e vërtetë e kishte Pandi Lulo. Një burrë i shkurtër dhe i kërrusur, me flokët e tij përpjetë, dikush e mban mend me thinja të rralla.

Ai ishte një nga tifozët më të zjarrtë të ekipit korçar që shpesh shkonte edhe nëpër qytete, ku shkonin tifozët dhe bërtiste kur lunate ekipi i tij.

Edi Rama, si Pandi Gjiza

Por ndryshe nga tifozët që bërtasin në tribuna, ai dilte dhe bërtiste në rrugët e qytetit, se duhet të shkonin të gjithë në stadium të bënin tifozë për vajzat e volejbollit, atëherë në vitet ’80-’90, me një sukses mjaft të madh në rivalitet me Dinamon, për ekipin e Skëndërbeut në futboll, që nuk kishte shkëlqimin e vajzave të atëhershme, basketbollit, e kështu me radhë.

Ishte një personazh i gjithënjohur për korçarët. Të gjithë e njihnin, pa përjashtim.

Pandi Gjiza, i përshkruar ndryshe mund ta gjeni në këtë link, të cilin e ka shkruar gazetari Agim Xhafka, por edhe në disa foto të shkrepura në studio nga Eliano Kalemi.

Edi Rama, si Pandi Gjiza

Pandi Lulo, i quajtur Pandi Gjiza, është një personazh pozitiv për qytetin e Korçës. Dikush e mban mend duke bërtitur, me një gotë raki, hy e dil nga “Bar Korça”, lokali kryesor atje ku sot është pedonalja ku mblidheshin e pinin burrat korçarë. Apo te “Krimeja”, një tjetër bazë “lufte” për burrat për t’u dehur me ndonjë gotë birrë apo ndonjë gotë raki.

Por, çfarë e lidh Pandi Gjizën me Edi Ramën?

Kryeministri ynë ka disa ditë që ka filluar një temena të madhe për një tallava që do të mbajë sonte në qendër të kryeqytetit.

Pra, me 28 korrik, duke kapur një hapësirë në lidhje me 100-vjetorin e vendosjes së marrëdhënieve diplomatike me Shtetet e Bashkuara të Amerikës, hapjen e negociatave me BE-në, problemet me "non-grata"-t, kryeministri ynë ka mbledhur në shesh këngëtarë nga më të ndryshmit.

Edi Rama, si Pandi Gjiza

Deri këtu jemi në rregull. Shumë mirë ka bërë. I mbledh njerëzit, e le të festojnë.

Por, dardha e ka bishtin prapa.

Së pari, Rama e bën për politikë.

Së dyti, këtë koncertin e paguajnë taksat e qytetarëve.

Së treti, kryeministri ynë është bërë si Pandi Gjiza.

Ka filluar dhe del e “bërtet” për çdo këngëtar që do të marrë pjesë në këtë koncert.

Pandi Gjiza dilte e bërtiste rrugëve për Skëndërbeun, për ndeshjet sportive, që të dëgjonin qytetarët dhe të shkonin në stadium, Edi Rama “bërtet” nga "Twitter"-i ose nga "Facebook"-u i tij për të thirrur qytetarët që të shkojnë në këtë koncert.

Një herë thotë se na vjen Alban Skënderaj, pastaj thotë se na vjen Flor Mumajesi, pastaj na thotë se do na vijë edhe Çiljeta, që dikur ka qenë e Saliut, që tani është "non-grata", e kështu me radhë.

Edi Rama, si Pandi Gjiza

Të gjithë këta këngëtarë do të shkojnë me para dhe do të paguhen nga taksat e shqiptarëve.

I vetmi që e bën pa lekë këtë shërbim, por për interesat e tij politike, është Edi Rama.

Dhe i vetmi ndryshim me Pandi Gjizën është se Pandi i shkretë e bënte për tifozllëk dhe për pasion, kurse Edi Rama e bën për interesa.

Por, të dy thërrasin njësoj. Pandi Gjiza thërriste rrugëve të Korçës “me vrap të shkojmë në ndeshjen e radhës”, Edi Rama shkruan në "Facebook" apo në "Twitter" që njerëzit të shkojnë të marrin pjesë në këtë koncert, ku këngëtarët nuk do shkojnë falas, por me lekë.

Lekët do t'i paguajnë qytetarët, bërtitja është e vetmja falas që e bën Edi Rama, ashtu siç e bënte edhe Pandi Gjiza, që bërtiste në rrugët e Korçës./CNA.al