E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

"Top Channel", emision antisemit/ Pse hesht AMA?

26 Korrik 2022, 13:53, Editorial CNA

Pak ditë më parë opinioni publik mësoi se si rrallëherë në vendin tonë, një ambasadë e huaj detyrohet të reagojë për një emission televiziv, i cili transmetohet në një media kombëtare.

Bëhet fjalë për Ambasadën e Izraelit në Tiranë, e cila ka reaguar me një notë verbale drejtuar Ministrisë së Jashtme për emisionin ‘Rrethi Katror’ në datën 5 qershor 2022, në "Top Channel", një prej të ftuarve ka shprehur opinione antisemite.

Ambasada e Izraelit vëren se drejtuesi i emisionit nuk ka ndërhyrë duke e lejuar të ftuarin në mënyrë të përsëritur të shprehë komente kundër hebrenjve.

Nota vë në dukje se një gjë e tillë është krejtësisht kundër traditës shqiptare, si i vetmi vend në Europë, që i shpëtoi hebrenjtë përpara, gjatë dhe mbas periudhës së Holokaustit.

Kush ka qenë i vëmendshëm ndaj angazhimeve të politikës sonë të jashtme, e di mjaft mirë që Shqipëria ka një qasje dhe koordinim në nivel ndërkombëtar në luftën kundër antisemitizmit, madje kjo është një vlerë me të cilën ne mburremi.

Shqipëria është vend vëzhgues në Aleancën Ndërkombëtare për Përkujtimin e Holokaustit dhe ka qenë ndër shtetet që ka miratuar në parlament përkufizimin për antisemitizimin, që i ndihmon institucionet shqiptare për ta kuptuar më mirë dhe luftuar këtë fenomen.

“Ju kërkojmë me dashamirësi të ndërmerrni hapat e nevojshëm për të parandaluar diskursin, nxitjen dhe synimin e tillë antisemitik që padyshim mund të shkaktojë gjakderdhje dhe vuajtje për njerëzit e pafajshëm (vendas dhe turistë)”, thotë nota verbale e Ambasadës së Izraelit.

Por, ndërsa Ambasada ka ndërmarrë veprimet e nevojshme diplomatike, pikëpyetje e madhe ngrihet për rolin që po luan institucioni përgjegjës për mbikqyrjen e mediave.

Çfarë po bën Autoriteti i Mediave Audiovizive në këtë drejtim?

A e kontrollon ajo përmbajtjen e emisioneve të tilla, ashtu siç e detyron ligji 97/2013 për Median Audiovizive?

Cili është roli i AMA-s për shmangien e të tilla incidenteve që ndodhin në median shqiptare, akoma dhe më shumë në një media me licencë kombëtare?/CNA.al