web counter
LEXO PA REKLAMA!

SHKARKO APP

App Store
Google Play

E fundit!

x

Studimi/ Mbi 70 për qind e mjekëve u japin pacientëve antibiotikë të panevojshëm

5 Qershor 2022, 09:27, Blog Peter Dockrill
Studimi/ Mbi 70 për qind e mjekëve u japin pacientëve
Foto ilustruese

Prej shumë vitesh, autoritetet shëndetësore në mbarë botën janë përpjekur të reduktojnë përdorimin e tepruar të antibiotikëve në rastet kur ato nuk janë shumë të nevojshëm. Por një studim i ri tregon se ky mesazh nuk po përcillet aq sa duhet edhe brenda vetë komunitetit të mjekëve.

Dhe kemi të bëjmë me një problem shumë serioz. Përveç rrezikut të efekteve anësore kur antibiotikët jepen edhe kur kjo nuk është e nevojshme, problemi i rezistencës ndaj antibiotikëve është një shqetësim në rritje në shëndetin global, duke përbërë sipas disa vlerësimeve shkakun e tretë kryesor të vdekjeve në mbarë botën.

Në këtë kuadër, organizata si Qendrat për Kontrollin dhe Parandalimin e Sëmundjeve (CDC) po bëjnë përpjekje për të përmirësuar ndërgjegjësimin ndaj antibiotikëve, pasi përdorimi i tepërt i këtyre ilaçeve po ndihmon në shkaktimin e më shumë se 2.8 milionë infeksioneve rezistente ndaj antibiotikëve që ndodhin çdo vit në SHBA, mijëra prej të cilave kanë pasoja fatale, duke sjellë vdekjen e njerëzve.

Studiuesit kryen një sondazh në Shkollën e Mjekësisë të Universitetit të Merilendit. Ata anketuan 551 mjekë të kujdesit parësor, duke iu paraqitur një sërë skenarësh klinikë hipotetikë. Një nga këta skenarë hipotetikë përfshinte zotin Uilliams, një pacient 65-vjeçar, i cili paraqitet në spital me bakteriurinë asimptomatike, një gjendje mjekësore në të cilën një numër i madh bakteresh janë të pranishme në urinë, por që nuk ka simptoma që sugjerojnë një infeksion të traktit urinar.

Studimi/ Mbi 70 për qind e mjekëve u japin pacientëve

Udhëzimet e praktikës klinike në SHBA, përcaktojnë se në mungesë të faktorëve specifikë të rrezikut, një pacienti si zoti Uilliams nuk duhet t’i jepen antibiotikë. Por në sondazh, një shumicë e qartë (71 për qind) e të anketuarve që plotësuan sondazhin pohuan se do t’i jepnin  antibiotikë zotit Uilliams.

Sipas studiuesve, tendenca për të përshkruar antibiotikë në receta, ishte më e zakonshme te mjekët e familjes. Ata shtojnë se ekzistojnë një sërë arsyesh pse një mjek mund të përshkruajë në mënyrë të papërshtatshme një antibiotik të panevojshëm.

Studimet e mëparshme kanë treguar se mjekët mund të ndiejnë nevojën për të përmbushur pritshmëritë e pacientit të tyre, ose mendojnë se rekomandimet e autoriteteve të shëndetit publik për të mos dhënë antibiotikë atëherë kur nuk është nevoja nuk përkojnë me situatën reale të pacientit që dergjet në shtratin e spitalit.

Në raste të tjera, një mjek mund të bëjë një diagnozë të gabuar të pacientit, bazuar në faktet që ka në dispozicion, duke menduar se antibiotikët janë të nevojshëm për një gjendje të caktuar, kur në fakt ata nuk rekomandohen.

“Në një masë dërrmuese, mjeket që thanë se do të përshkruanin antibiotikë, vlerësuan se pacienti kishte një probabilitet të lartë për të pasur një infeksion të traktit urinar, edhe pse detajet e rastit nuk e mbështesnin këtë diagnozë. Ne dyshojmë se shumë nga mjekët që morën pjesën në sondazhin tonë, nuk ishin të vetëdijshëm se çfarë përbënin simptomat e infeksionit të traktit urinar, ose nuk ishin të vetëdijshëm se çfarë simptomash kërkohen për të vërtetuar një diagnozë me këtë gjendje?”- shkruajnë autorët e studimit.

Studimi/ Mbi 70 për qind e mjekëve u japin pacientëve

Ndërkohë, mjekët e rinj praktikantë, kishin më pak gjasa të përshkruanin antibiotikë. Dhe kjo sugjeron se si studentët e brezave aktualë të mjekësisë, mund të kenë përvetësuar më mirë informacionin më të fundit mbi menaxhimin e duhur të bakteruriurisë asimptomatike.

Studiuesit këshillojnë autoritetet të bëjnë shumë më tepër punë në edukimin e mjekëve profesionistë mbi çështjen e përdorimit të duhur të antibiotikëve. Kur 7 në 10 mjekë bëjnë të njëjtin gabim, atëherë ka shumë punë përpara. Gjetjet e këtij studimi, janë raportuar në revistën “JAMA Network Open”./ Sciencealert.com-Përshtatur nga CNA.al





Lajmet e fundit nga