E fundit!

14:17 Aktualitet

Vjedhje e majme në filial/ Shkarkohet drejtoresha e Postës Shqiptare në Durrës

Këtë të martë është shkarkuar nga detyra drejtoresha e fil...

Kalendar historik/ Çfarë ka ndodhur më 29 shtator?

29 Shtator 2023, 09:02, Blog CNA

Kalendar historik/ Çfarë ka ndodhur më 29 shtator?

Brixhit Bardo

1934 - Lind aktorja franceze më famë botërore Brixhit Bardo

Një nga ikonat e bukurisë femërore të shekullit XX, lindi në Paris në një familje të pasur. Në fillim synonte të bëhej balerinë, por jeta e Bardo nisi të ndryshojë kur u shfaq në një sfilatë në vitin 1949, dhe po atë vit në kopertinën e revistës së modës “Elle” kur ishte vetëm 15-vjeçare dhe tërhoqi vëmendjen e regjisorit të ri Rozher Vadim.

Ai jo vetëm që e futi në botën e kinemasë, por e drejtoi karrierën e saj dhe e zhvilloi me kujdes imazhin e saj publik. Pas disa filmave me një sukses modest, ajo fitoi famë botërore në vitin 1956 kur Vadim e bëri protagoniste në filmin “Et Dieu Créa La Femme” (Dhe Zoti krijoi gruan), duke i sugjeruar të lyente flokët e saj të errët duke u bërë një bionde tërheqëse.

Kalendar historik/ Çfarë ka ndodhur më 29 shtator?

I xhiruar në San Trope në Rivierën Franceze, ku Bardo jeton që nga ajo kohë, filmi tregon historinë e arratisë së një adoleshenteje imorale në një qytet të vogël me norma të forta sociale. Filmi ishte një sukses në nivel global, jo aq për fabulën që rrëfente, sesa për magnetizmin që kishte Bardo në ekran.

Ai film e shndërroi në një yll të kinemasë botërore. Duke thyer tabutë e kohës kundër lakuriqësisë, filmi arriti fitime rekord në Evropë, Shtetet e Bashkuara dhe pjesë të tjera të botës. Vadim u martua me Bardo në vitin 1952 kur ajo ishte 18 vjeçe, një martesë që do të zgjaste më pak se 5 vite, edhe pse ata do të mbeteshin miq të ngushtë.

Arsyeja e deklaruar e divorcit ishin lidhjet e dyshuara të Bardo me 2 burra të tjerë. Ajo u tërhoq nga skena në vitin 1973 kur ishte vetëm 38 vjeçe, duke u shfaqur gjithsej në 47 filma, interpretuar në disa shfaqje muzikore dhe regjistruar mbi 60 këngë. Vetë Bardo nuk u impresionua asnjëherë me aftësitë e saj aktoriale.

Ajo shkruan në autobiografinë e saj: “E nisa karrierën si një aktore e keqe, dhe kam mbetur e tillë!”

Pas tërheqjes së saj nga kinemaja, Bardo nisi t’ua kushtonte jetën e saj të drejtave të kafshëve, dhe në vitin 1986 themeloi Fondacionin për Mirëqenien dhe Mbrojtjen e Kafshëve.

Ajo mblodhi miliona për të financuar fondacionin, duke nxjerrë në ankand bizhuteri dhe sende personale. “Bukurinë dhe rininë time ua kam dhënë burrave. Do t’u jap kafshëve urtësinë dhe përvojën time. Kafshët nuk më kanë tradhtuar kurrë. Ata janë një pre e lehtë, siç kam qenë gjatë gjithë karrierës sime. Kështu që ne ndihemi njësoj. Unë i dua ato”, - do të deklaronte Bardo.

Ngjarje të tjera të rëndësishme:

1547- Lind shkrimtari i famshëm spanjoll Migel de Servantes, i njohur për kryeveprën e tij “Don Kishoti”, i cilësuar shpesh si romani i parë modern.

1567 - Në Francë shpërthen Lufta Fetare, kur hygenotët përpiqen të rrëmbejnë mbretin Sharl IX.

1833 - Në Spanjë, shpërthen një luftë civile midis Karlistëve, që besonin se Don Karlos meriton fronin, dhe mbështetësve të Mbretëreshës Izabela.

1885 - Në Blekpul të Anglisë, inaugurohet linja e parë e tramvajit elektrik në botë.

1941- Nazistët shfarosin 34.000 mijëra hebrenj në Babi Jar të Ukrainës. Vendimi u mor në shenjë hakmarrje ndaj sulmeve guerrilase kundër trupave gjermane.

1957 - Treqind njerëz humbin jetën nga përplasja e dy trenave në Pakistan./ Përshtatur nga CNA