E rritur nga qentë në pyll/ Historia e pabesueshme e ukrainases Oksana Malaja

8 Tetor 2022, 08:26, Blog CNA

E rritur nga qentë në pyll/ Historia e pabesueshme e ukrainases Oksana

Ju mund të keni dëgjuar historinë e Moglit apo Tarzanit, të cilët u ndanë nga habitatet njerëzore, dhe u rritën nga kafshët e egra në xhungël. Ndërsa folklori dhe letërsia janë intriguese dhe emocionuese, ato duken larg realitetit.

Por është interesant fakti, se ka pasur histori të vërteta të kafshëve që kanë rritur fëmijë të vegjël. Një prej tyre është Oksana Malaja, e cila e kaloi fëmijërinë me qentë në pyll. Oksana Malaja lindi më 4 nëntor 1983 në Nova Blagoveshçensk, një fshat në rajonin Kerson në Ukrainën Jugore.

Ajo lindi një fëmijë normal dhe jetonte me prindërit e saj, Oleksandër dhe Valentina Malaja. Për fat të keq, prindërit e saj ishin të alkoolizuar, dhe si rezultat i neglizhencës së tyre Oksana u detyrua të jetonte me qentë. Prindërit e braktisën Oksanën që në moshën 3-vjeçare, dhe as që u përpoqën ta kërkonin.

E rritur nga qentë në pyll/ Historia e pabesueshme e ukrainases Oksana

Kur ajo mbeti vetëm në të ftohtë, ata as që e vunë re se vogëlushja mungonte. Kërkimi për një vend të ngrohtë e çoi Oksanën e vogël në një fermë të braktisur, ku për të nisën të kujdesen qentë. Ajo u bë shtëpia e saj e re, dhe qentë u bënë familja e saj e re.

Ajo kaloi thuajse 5 vjet me ta. Si çdo fëmijë i rritur në botën e egër, Oksana nuk arriti të zhvillonte aftësi sociale dhe gjuhësore bazë, pasi ajo nuk kishte asnjë kontakt njerëzor dhe jetonte e rrethuar nga qentë. Ajo shoqërohej çdo herë me qentë dhe mendonte se ishte një prej tyre.

Rrjedhimisht ajo zhvilloi tipare të ngjashme sjellje me ato të qenve. Ajo përdorte të katër gjymtyrët për të ecur, vrapuar dhe kërcyer. Ajo lehte si qen, hante si qen, dhe madje e pastronte veten si qen. Asaj i mungonin shumë aftësi njerëzore bazike, dhe sjellja e saj ishte e ngjashme me atë të një qeni.

E rritur nga qentë në pyll/ Historia e pabesueshme e ukrainases Oksana

Autoritetet lokale shpëtuan Oksana Malajan vetëm në vitin 1991, pasi morën një telefonatë nga fqinjët, që raportuan se një vajzë e vogël jetonte në pyll. Kur ata e gjetën Malajan, panë se ajo jetonte vetëm me një tufë qensh. Teksa oficerët e policisë po përpiqeshin të shpëtonin Malajan, qentë i sulmuan instinktivisht.

Ata u detyruan t’i joshnin ata me ushqim për ta marrë Malajan me vete. Në fillim shumë njerëz mendonin se vajza po shtirrej. Megjithatë, mënyra se si Malaja tundte qafën dhe kokën për t’u çliruar nga spërklat e ujit, ishte identike me atë të një qeni.

Për më tepër, edhe tingujt e lehjes së saj i ngjanin në mënyrë të përsosur atyre të qenve të vërtetë, gjë që tregon se në çfarë mase ajo zhvilloi karakteristika të ngjashme me qentë. Të jetuarit me qentë i kishte ndryshuar aq shumë sjelljet dhe prirjet e saj fizike e mendore, saqë edhe shumë vite pas shpëtimit, të paktën deri në moshën 23-vjeçare, ajo do t’i fshehte ende gjërat, ashtu si një qen e fsheh ushqimin.

E rritur nga qentë në pyll/ Historia e pabesueshme e ukrainases Oksana

Ajo ecte herë pas here me duar dhe këmbë, lehte dhe preferonte më shumë shoqërinë qenve sesa atë të njerëzve. Autoritetet e transferuan Oksanën në një jetimore në Barabol. Oksana do të kalonte atje më shumë kohë me qentë sesa me fëmijët e tjerë. Kalimi nga jeta me qentë në jetimore, ishte shumë i papritur dhe traumatik për fëmijën.

Ajo do të tentonte të fuste fshehurazi qen në jetimore. Psikologia e fëmijëve Lin Fraj e takoi Oksanën për një dokumentar. Ajo u shpreh se vajza kishte një sjellje të ndryshme nga shumica e njerëzve normalë. Por Fraj zbuloi se zhvillimi i përgjithshëm dhe inteligjenca e Oksanës, ishin çuditërisht të mira për një fëmijë të rritur në botën e kafshëve.

Ajo zbuloi se Oskana mund të vizatonte si një fëmijë 5-6 vjeç. Po ashtu ajo ishte e aftë të kuptonte parafjalët, dhe mund ta njihte veten në pasqyrë. Asaj iu desh t’i nënshtrohej terapive dhe edukimit konjitiv të sjelljes gjatë gjithë adoleshencës dhe rinisë së hershme. Synimi ishte ta ndihmonte atë të shërohej nga trauma socio-emocionale.

Ekspertët thonë se Malaja u bë e aftë të mësonte të fliste brenda pak vitesh, pasi ajo kishte një nivel të caktuar të ndërveprimit njerëzor përpara braktisjes, e cila ishte ende e pranishme në ndërgjegjen e saj. Fëmijët e rritur në botën e egër, shfaqin prirje mendore të ngjashme me ato të personave me prapambetje mendore ose autike.

E rritur nga qentë në pyll/ Historia e pabesueshme e ukrainases Oksana

Por Malaja vërtetoi se çdo spekulim ishte i gabuar, pasi mësoi të lexonte dhe shkruante. Ajo mësoi edhe të numëronte, por nuk mund të bënte mbledhjen e tyre. Ajo i zhduku instinktet e saj prej qeni në moshën 23-vjeçare, dhe mësoi me sukses edhe aftësitë e të folurit të rrjedhshëm dhe inteligjent.

Megjithatë, asaj i mungon ende njohuritë normale të moshës së saj, dhe duket e dëmtuar nga pikëpamja intelektuale. Oksana Malaja u ribashkua me babain e saj në vitin 2003 gjatë xhirimit të një dokumentari. Ajo ishte shumë e lumtur kur mësoi që nuk ishte më

jetime. Por gjërat nuk shkuan ashtu siç duhej dhe të dy u shkëputën sërish. Sot ajo jeton një institucion neuropsikiatrik pranë Odesës. Ajo ndihmon duke u kujdesur për kafshët e fermës dhe duke mjelur lopët, teksa merr një pension mujor nga qeveria ukrainase.

Përkthyer dhe përshtatur nga CNA.al