LEXO PA REKLAMA!

SHKARKO APP

E fundit!

x

Skandal te Trauma/ KLSH rendit shkeljet: S'ka frigoriferë te morgu, pajisje jashtë funksionit

12 Shtator 2023, 13:59, Aktualitet CNA

Skandal te Trauma/ KLSH rendit shkeljet: S'ka frigoriferë te morgu,

Kontrolli i Lartë i Shtetit ka bërë publik raportin e auditimit në Spitalin Universitar të Traumës, Tiranë.

KLSH ka renditur një sërë shkeljesh të bëra nga ky institucion.  

Rezulton se Spitali Universitar i Traumës nuk ka ambient dhe nuk është i pajisur me frigorifer-morg, për të bërë administrimin e trupave të pacientëve që ndërrojnë jetë në SUT.

Në vitin 2021 pranë këtij spitali kanë ndërruar jetë 90 pacientë.

"Sipas raportit SUT nuk ka ambient dhe nuk është i pajisur me frigorifer-morg, për të bërë administrimin e trupave të pacientëve që ndërrojnë jetë në SUT.
Në vitin 2021 pranë këtij spitali kanë nderuar jetë 90 pacientë. SUT nuk ka krijuar ambiente të përshtatshme për të ushtruar veprimtarinë e tyre ligjore nga strukturat përgjegjëse të parashikuara në legjislacionin në fuqi."

KLSH ka rekomanduar që:

"Titullari i Institucionit në bashkëpunim me MSHMS dhe Ministrinë e Drejtësisë, të marrë masa dhe të krijojë ambiente të përshtatshme sipas standardeve të kërkuara për të bërë administrimin e trupave të pacientëve që ndërrojnë jetë në SUT."

Po ashtu një tjetër shkelje që përmendet në raportin e KLSH është se në Spitalin e Traumës ka pajisje mjekësore që janë jashtë funksionit dhe të rrezikshme për shëndetin e pacientëve dhe personelit spitalor.

“Inventarizimi i pajisjeve mjekësore, nga auditimi rezulton se në SUT gjendet një sasi e konsiderueshme e pajisjeve mjekësore në vlerën 38,731,930 lekë që janë jashtë funksionit dhe të rrezikshme për shëndetin e pacientëve dhe personelit spitalor. Asnjë nga pajisjet mjekësore pjesë e inventarit të SUT nuk janë regjistruar në sistemin Clingo të Qendrës Kombëtare të Inxhinierisë Biomjekësore.

Titullarët e institucionit për periudhën objekt auditimi nuk kanë zbatuar dhe ndjekur politikat kombëtare për menaxhimin e pajisjeve mjekësore në Shqipëri, të cilat janë përcaktuar qartë në urdhrin e Ministrit të Shëndetësisë nr. 3272, datë 11.09.2007 “Politika Kombëtare për Menaxhimin e Pajisjeve Mjekësore në Shqipëri.”

Në raport jepet se është përgjegjësi e drejtorit të spitalit për zhvillimin e procedurës për mënyrën e raportimit të ngjarjeve të padëshirueshme dhe marrjen e sinjaleve të alarmit nga pajisjet mjekësore si dhe njohjen e personelit mjekësor me këto procedura.

KLSH ka rekomanduar që:

"SUT në bashkëpunim me Qendrën Kombëtare të Inxhinierisë Biomjekësore të bëjë vlerësimin mbi gjendjen aktuale të funksionimit të pajisjeve mjekësore dhe mundësisë së vënies së tyre në funksion për pajisjet mjekësore që nuk punojnë dhe njëkohësisht nga ana e SUT të ndiqen procedurat ligjore në fuqi për asgjësimin e pajisjeve mjekësore që janë jashtë përdorimit."/ CNA

Lajmet e fundit nga