E fundit!

18:12 Aktualitet

Nis protesta e pestë e qytetarëve në Tiranë

Mbahet ditën e sotme protesta e radhës e qytetarëve në Tir...

Raporti me gjetjet shqetësuese të KLSH-së/ Meta: Drejtësia të veprojë ndaj përgjegjësve

29 Gusht 2023, 14:11, Aktualitet CNA

Raporti me gjetjet shqetësuese të KLSH-së/ Meta: Drejtësia

Kreu i Partisë së Lirisë, Ilir Meta, ka reaguar pas raportit të KLSH-së, ku publikohen gjetje shqetësuese dhe defektet e mëdha në mënyrën se si spitalet publike e trajtojnë sëmundjen.

Sipas raportit të KLSH-së, trajtimi me Brakiterapi nuk ka qenë funksional, për periudhën në auditim, për shkak të mungesës së burimit radioaktiv iridium, mungesa e së cilës ka sjellë mostrajtimin e 200 pacienteve në vit ose 600 gra paciente, të cilat nuk e kanë marrë këtë shërbim me radioterapi.

Meta në reagimin e tij shkruan se shpërdorimi kolosal i fondeve në Shëndetësi me koncesionet korruptive ka krijuar mungesa dhe boshllëqe shumë kritike në shërbime dhe përkujdesje mjekësore ndaj qindra pacientëve të tjerë në shërbimin e onkologjisë, duke e cilësuar gjetjen si fakt tronditës.

Kreu i PL-së ka kërkuar që drejtësia të veprojë ndaj përgjegjësve sepse korrupsioni i tyre ka krijuar dëm pa kthim siç është humbja e jetës dhe dëmtimi i shëndetit.

“Koncesionet korruptive në shëndetësi privojnë pacientët nga shërbimi shëndetësor në onkologji.

Shpërdorimi kolosal i fondeve në shëndetësi me koncesionet korruptive ka krijuar mungesa dhe boshllëqe shumë kritike në shërbime dhe përkujdesje mjekësore ndaj qindra pacientëve të tjerë në shërbimin e onkologjisë.

Është fakt shumë tronditës mostrajtimi i 600 grave paciente me CA gjinekologjik me radioterapi, si dhe mostrajtimi i 200 pacientëve me radioterapi, që vuajnë nga tumoret e lëkurës.

Kjo situatë kaq e rëndë e konstatuar nga Kontrolli i Lartë i Shtetit do të thotë që jeta dhe shëndeti i pacientëve të mbetet në mëshirë të fatit dhe pa trajtim mjekësor.

Ky është një krim i vërtetë ndaj jetës dhe shëndetit, dëshmitarë të të cilit janë pacientët e shumtë, por edhe shumë familjarë të tyre.

Babëzia korruptive me koncesionet nuk kurseu pra as jetën e njerëzve.

Drejtësia të veprojë ndaj përgjegjësve sepse korrupsioni i tyre ka krijuar dëm pa kthim siç është humbja e jetës dhe dëmtimi i shëndetit”, shkruan Meta./ CNA