web counter
LEXO PA REKLAMA!

SHKARKO APP

App Store
Google Play

E fundit!

x

Ndalimi i qeseve plastike/ Kumbaro: Është vetëm hapi i parë

31 Maj 2022, 19:47, Politikë CNA
Ndalimi i qeseve plastike/ Kumbaro: Është vetëm hapi i parë
Ministrja e Turizmit dhe Mjedisit, Mirela Kumbaro

Ministrja e Turizmit dhe Mjedisit, Mirela Kumbaro prezantoi nismën për ndalimin e qeseve plastike njëpërdorimshe duke nisur nga dita e nesërme.

Kumbaro tha se ky është vetëm hapi i parë i një serie masash që duam të ndërmarrim për reduktimin e plastikës.

“Kam besuar gjithmonë se na duhen shembuj konkretë për angazhimet tona. Shqipëria ka marrë dy vendime të rëndësishme në këto muaj të vitit 2022. Së pari, rritjen e sipërfaqeve të zonave të mbrojtura nga 17% në 21% të territorit. Dhe nisma e dytë që hyn në fuqi nesër, është ndalimi i qeseve plastike njëpërdorimshe. Jo më kot zbatimi i këtij ligji fillon më 1 qershor, sepse në Shqipëri kjo është dita e fëmijëve, dedikuar atyre dhe ne duam t’u japim një të ardhme pa plastikë. Është vetëm hapi i parë i një serie masash që duam të ndërmarrim për reduktimin e plastikës”, u shpreh ministrja në ministerialin e Ballkanit Perëndimor në Vjenë.

Kujtojmë se ligji për ndalimin e qeseve plastike njëpërdorimshe u miratua në Parlamentin shqiptar më 17 mars, ndërsa hyn në fuqi më 1 qershor.

Ky ligj parashikon ndalimin e prodhimit, importimit dhe tregtimit të qeseve plastike mbajtëse si dhe qeseve plastike mbajtëse të oxo-degradueshme apo oxo-biodegradueshme me trashësi të mureve të qeses për çdo anë jo më pak se 70 mikron, me kapacitet mbajtës jo më pak se 10 kilogramë dhe me përmasa jo më pak se 50 cm gjatësia dhe 24 cm gjerësia.

Kontrollet do të ushtrohen nga një sërë institucionesh, si nga Drejtoria e Doganave për ndalimin e importit të qeseve që s’përmbushin kriteret, Inspektorati i Mbikqyrjes dhe Tregjeve për kontrollin e tregtimit të tyre dhe Agjencia Kombëtare e Mjedisit për prodhuesit e qeseve nën parametrat e caktuar./ B.A. – CNA.al





Lajmet e fundit nga