Zgjedhjet e 6 marsit/ KAS gjobit kryebashkiaken e Lushnjës dhe sekretaren e Ministrisë së Shëndetësisë

31 Maj 2022, 15:43, Politikë CNA

Zgjedhjet e 6 marsit/ KAS gjobit kryebashkiaken e Lushnjës dhe sekretaren e

Kryetarja e Bashkisë Lushnje, Eriselda Sefa

Komisioni i Ankesave dhe Sanksioneve në KQZ, ka gjobitur kryebashkiaken e Lushnjës, Eriselda Sefa dhe Sekretaren e Përgjithshme të Ministrisë së Shëndetësisë dhe Mbrojtjes Sociale, Gelardina Prodani.

Mësohet se KAS gjobiti me 100 mijë lekë Sefën dhe me 25 000 lekë Prodanin. Ata akuzohen për shkelje administrative në kuadër të fushatës zgjedhore, për zgjedhjet e pjesshme për kryetar bashkie të datës 6 Mars 2022”.

“Komisioni Ankimimeve dhe Sanksioneve shqyrtoi kërkesën e Komisionerit Shtetëror të Zgjedhjeve për vendosjen e sanksionit administrativ ndaj kandidates për kryetar bashkie dhe njëkohësisht kryetare e bashkisë Lushnjë, zj. Eriselda Sefa në vlerën 50000 (pesëdhjetë mijë) lekë.

Në përfundim të shqyrtimit, KAS vendosi pranimin e pjesshëm të kërkesës nr. 1, datë 23.05.2022 të KShZ dhe vendosjen e sanksionit administrativ të mbështetur në pikën 1 të nenit 172 të Kodit Zgjedhor në vlerën 100000 (njëqindmijë) lekë.

Gjithashtu, mbështetur në pikën 1 të nenit 171 të Kodit Zgjedhor, KAS vendosi sanksionin administrativ ndaj Sekretares së Përgjithshme të Ministrisë së Shëndetësisë dhe Mbrojtjes Sociale, zj. Gelardina Prodani në vlerën 25000 (njëzet e pesëmijë) lekë dhe mbështetur në pikën 2 të nenit 171 të Kodit Zgjedhor vendosi sanksionin administrativ ndaj Drejtorit të Spitalit Ïhsan Çabej” Lushnje, z. Perin Vogli në vlerën 2500 (dymijë e pesëqind) lekë.

KAS vendosi pushimin e procedimit administrativ ndaj subjektit zgjedhor “Partia Socialiste e Shqipërisë” dhe ndaj Ministres së Shëndetësisë dhe Mbrojtjes Sociale. Zj. Ogerta Manastirliu”, thuhet në njoftimin e KAS.

Nga hetimi administrativ ka rezultuar se Sefa ka përdorur ambientet e Spitalit Lushnjë në mbështetje të fushatës së saj zgjedhore.

Sipas KSHZ-së, "Kryerja e fushatës së zj. Sefa ka dalë përtej axhendës ndërinstitucionale dhe për aq sa ishte dakordësuar. Në këto kushte, Ministria nuk ka qenë në dijeni që aktiviteti i organizuar do të përdorej për fushatë elektorale”./ B.A. – CNA.al