web counter
LEXO PA REKLAMA!

SHKARKO APP

App Store
Google Play

E fundit!

x

KAS mblidhet nesër për Eriselda Sefën e Lushnjes

30 Maj 2022, 18:56, Politikë CNA
KAS mblidhet nesër për Eriselda Sefën e Lushnjes
Kryetarja e Bashkisë Lushnje, Eriselda Sefa

Komisioni i Ankesave dhe Sanksioneve në KQZ, mblidhet nesër, në orën 11.00, në një seancë publike për shqyrtimin e kërkesës për vendosjen e sanksionit administrativ, ndaj Eriselda Sefës.

Referuar materialit të përcjellë për shqyrtim në KAS, Komisioneri Shtetëror i Zgjedhjeve shpjegon se zonja Sefa, Ministrja Manastirliu dhe zoti Taulant Balla, gjatë fushatës për zgjedhjet e pjesshme vendore, kanë bërë vizitë në spitalin e Lushnjes më datë 26 shkurt 2022.
Raporti i përgatitur nga Komisioneri Shtetëror i Zgjedhjeve propozon që Eriselda Sefa të dënohet me 50,000 lekë gjobë.

“Nga hetimi administrativ i kryer dhe nga provat materiale të administruara në dosjen hetimore administrative, Komisioneri Shtetëror i Zgjedhjeve vlerëson se zj. Eriselda Sefa, kandidate për Kryetare të Bashkisë Lushnjë, e propozuar nga Partia Socialiste e Shqipërisë, me përdorimin e ambienteve të Spitalit Lushnjë dhe me përdorimin e detyruar në fushatën zgjedhore të administratës shtetërore brenda orarit të punës për veprimtari dhe/ose aktivitete për qëllime zgjedhore dhe për kryerjen e takimit elektoral, ka përdorur burime publike në mbështetje të fushatës së saj zgjedhore, në kuptim të nenit 91, pika 1, të Kodit Zgjedhor”.

Nga hetimi administrativ i KSHZ, ka rezultuar e provuar se drejtori i Spitalit të Lushnjes, Pjerin Vogli, nuk ka pasur dijeni për kryerjen e fushatës elektorale në ambientet e institucionit që drejton, nga kryebashkiakja e qytetit, e cila në 6 mars kërkoi vazhdimin e qëndrimit në detyrë.

Për ministren Manastirliu, Komisioneri Shtetëror i Zgjedhjeve përcakton se: “Rezultoi e provuar se veprimtaria e Ministrit të Shëndetësisë dhe Mbrojtjes Sociale nuk përbën veprimtari të ndaluar në kuptim të nenit 3, të vendimit nr. 9 datë 24.12.2020, pasi znj. Manastirliu ka qenë në kryerjen e detyrave të saj funksionale".
Sipas KSHZ-së, "Kryerja e fushatës së zj. Sefa ka dalë përtej axhendës ndërinstitucionale dhe për aq sa ishte dakordësuar. Në këto kushte, Ministria nuk ka qenë në dijeni që aktiviteti i organizuar do të përdorej për fushatë elektorale”.

Të shohim se cili do të jetë vlerësimi i KAS-it për rastin për të cilin Komisioneri kërkon nga KAS-i vendosjen e gjobës prej 50.000 lekësh për Eriselda Sefa./CNA.al





Lajmet e fundit nga