Debat mes Zhejit dhe deputetit të PS-së/ Më vjen mirë, të zgjova agresivitetin

23 Qershor 2022, 22:27, Politikë CNA

Debat mes Zhejit dhe deputetit të PS-së/ Më vjen mirë,

Sonte në emisionin “Open” ka pasur një debat mes gazetarit Artur Zheji dhe deputetit socialist, Arben Pëllumbi.

Zheji ka quajtur gabim të rëndë gjuhën e përdorur nga kryeministri në Samit, ndërsa nga ana tjetër, Pëllumbi thekson se kjo ishte e duhura pasi BE-ja e thotë pa iu dridhur qerpiku ku një vend nuk përmbush detyrat për t'u anëtarësuar në BE.

Teksa argumentonte, deputetit i PS-së, Arben Pëllumbi, i është drejtuar duke i thënë Zhejit se i vjen mirë që i ka zgjuar agresivitetin, dhe i ka kërkuar të mos e ndërpresë kur flet.

Pjesë nga debati në studio:

Pëllumbi: Nuk dështoi Shqipëria dhe RMV, por dështoi BE-ja për të mbajtur fjalën ndaj vendeve tona, sepse Shqipëria dhe RMV rrinë peng e një vote bullgare, që ka të bëjë me aspekte historike.

Zheji: Ore ata thanë plas lufta në Ballkan. Të na pushtoni.

Pëllumbi: Nuk besoj që ne kemi dështuar.

Zheji: Mund të shohim përtej. Ka një gjë, neve na lejohet një lloj e folure, sepse jemi jashtë gardhit europian. Jemi një vend që konsiderohemi në fazë primitive të qytetërimit europian. Mund ta kemi pjellë këtë qytetërim në antikitet, por jemi primitivë. Ne në gojë të ujkut kemi hedhur valle. Kjo është sindroma, nuk na duan. Për këtë do të mbrohemi në një bunker, ku kemi komandantin Rama, që do të na mbrojë. Por, kemi dhe Vuçiçin, që paralajmëron luftë. Si mund t’ia bësh këtë shantazh Europës? Më duket se në këtë rast Ramës i mungojnë këshilltarët, ose është aq i dashuruar me veten, sa atë që bën në Kuvendin shqiptar me disa gjela, mendon se mund ta bëjë edhe me Europën. Por, ka gabuar shumë rëndë.

Pëllumbi: E mendoj krejtësisht ndryshe dhe dëshiroj që ta shikoj veten, por dhe të përfaqësoj ata njerëz që nuk e shohin veten të persekutuar. Europa ka të drejtë të na e thotë në sy, pa ju dridhur qerpiku, për gjërat që nuk i kemi bërë mirë, ndërsa ne nuk duhet t’ua themi, kur në këtë rast nuk po shkojnë gjërat mirë me BE-në.

Zheji: Jam dakord, por nuk mund të shantazhosh BE-në. Nuk e shantazhoj dot, sepse i bëj dëm vendit tim.

Pëllumbi: Nuk ju kam ndërprerë në asnjë moment. Më vjen shumë mirë që zgjova agresivitetin tuaj, se jeni shumë i qetë.

Zheji: Ka ngatërruar skenën e teatrit.

Pëllumbi: Po lëreni që këtë gjë t’ia thonë ata. Unë mendoj krejt ndryshe, që nuk duhet të kemi frikë, që ajo që nuk shkon, t’ua themi. Dhe ua tha këtë gjë, që është problemi i tyre, që jemi në këtë situatë. Nëse ata nuk e zgjidhin këtë, BE-ja do të ketë probleme shumë më të mëdha./ A.E-CNA.al