Përplasjet për "Sunny Hill"/ Ndryshimet e fundit, ja ku do të mbahet

20 Qershor 2022, 10:30, Lifestyle CNA

Përplasjet për "Sunny Hill"/ Ndryshimet e fundit, ja ku do

Ka pasur shumë polemika në lidhje me mbajtjen e festivalit të përvitshëm "Sunny Hill", të organizuar nga Dukagjin Lipa, babai i artistes Dua Lipa.

Sipas një njoftimi të fundit nga Ministria e Kulturës në Kosovë, festivali do të mbahet në kryeqytetin e Kosovës, por edhe në Shqipëri do të ketë një “line-up” të këtij festivali.

Festivali do të mbahet më 4, 5, 6 dhe 7 gusht. Në frymën e bashkëpunimit një edicion i veçantë me një line-up tjetër do të mbahet në fund të muajit gusht në Tiranë më 26, 27 dhe 28 gusht.

Ashtu si herën e kaluar, emra të njohur të muzikës botërore do të performojnë në tri netët e festivali të madh.

Prishtina dhe Tirana do të shijojnë “show"-n që do të sjellë Dua Lipën, Diplo, Skepta, DJ Regard, AJ Tracey, Mahmood dhe artistët më të njohur shqiptarë. Po ashtu për këtë edicion pritet të zbulohen edhe dy artistë shumë të mëdhenj botëror.

Qëllimi i këtij festivali është promovimi i Kosovës, ndërsa është hera e fundit që mbahet në parkun e Gërmisë.

Vitin e kaluar, "Sunny Hill Festival" mblodhi rreth 50.000 njerëz për tri ditë dhe netë radhazi pandërprerë.

Deklarata e plotë

Deklaratë e përbashkët e Ministrisë së Kulturës (në emër të Qeverisë së Kosovës), Komunës së Prishtinës dhe "Sunny Hill Festival".

"Sunny Hill Festival" mbahet në shtëpinë e vet, në Prishtinë, më 4, 5, 6 dhe 7 gusht 2022.

Qeveria e Kosovës, Komuna e Prishtinës dhe "Sunny Hill Festival" bashkojnë forcat për një edicion të mrekullueshëm të festivalit sivjet, aty ku e ka vendin, në Prishtinë.

Institucionet qendrore dhe lokale bashkërisht, sipas mandatit që kanë do të ofrojnë mbështetje të plotë për edicionin e sivjetmë, i cili do të mbahet në një lokacion të përshtatshëm.

Të gjithë shprehin gatishmërinë që çështja e shfrytëzimit afatgjatë të tokës të diskutohet edhe pak kohë deri në gjetjen e një zgjidhjeje të qëndrueshme.

Synimi i përbashkët është që nga viti i ardhshëm, festivali "Sunny Hill" të organizohet në lokacionin e vet afatgjatë.

Në frymën e bashkëpunimit të shkëlqyeshëm kulturor mes Kosovës dhe Shqipërisë, një edicion i veçantë me një line-up tjetër do të mbahet në fund të muajit gusht në Tiranë më 26, 27 dhe 28 gusht.

Në Prishtinë, "Sunny Hill Festival" për këtë vit ka përgatitur lineup-in më të fuqishëm nga festivalet e rajonit ku përveç artistëve të njohur si Diplo, Skepta, DJ Regard, AJ Tracey, Mahmood dhe artistët më të njohur shqiptarë, për këtë edicion pritet të zbulohen edhe dy artistë shumë të mëdhenj botëror.

Një verë e jashtëzakonshme i pret të gjithë shqiptarët në Prishtinë dhe në Tiranë.Ministria e Kulturës, Komuna e Prishtinës dhe "Sunny Hill Festival"./ CNA.al