E fundit!

17:50 Politikë

“Rama trajton turizmin si real estate”/ Këlliçi: Po u fal tokat e fermerëve biznesit të 5D

Deputeti i PD-së Belind Këlliçi ka hedhur akuza ndaj kryem...

Mbi kopshtoren e parë të hapur në qytetin e Korçës

11 Qershor 2022, 20:15, Kulturë Ilia Ballauri

Mbi kopshtoren e parë të hapur në qytetin e

Godina e kopshtit të dikurshëm

Për herë të parë në Korçë dhe ndofta në gjithë Shqipërinë, kopsht për fëmijë është hapur në vitin 1872. Ky kopsht u vendos në një godinë që ishte në atë kohë, prapa kishës së dikurshme të Shën Gjergjit, pra sot prapa ish-bibliotekës së qytetit, në një ndërtesë tashmë të restauruar.

Kopshti në fjalë funksiononte, në vartësi të kishës, ishte ditor dhe fillimisht pati qenë financuar prej bamirësve të qytetit, të cilët kontribuonin për këtë kopsht duarplot. Vetëm përgjatë vitit 1882 - 1883 për të janë shpenzuar për rrogat e personelit, a të themi edukatorëve, 71 lira turke. Kopshti në fjalë kishte një oborr të gjerë, rrethuar me mure e partere gjithë lule, ku luanin fëmijët, ndërsa në krah të djathtë, në fasadë të godinës, kishte një çezmë.

Kopshti i fëmijve i kishës së Shën Gjergjit, ka funksionuar si i tillë deri vonë. Në fillim të viteve 1950 në atë kopsht, kam kaluar edhe unë një pjesë të fëmijërisë së hershme. Mbaj mend se kopshti ynë gumëzhinte nga britmat e gëzuara të fëmijve të cilët loznin aty.

Godina e kopshtit të dikurshëm, e cila mund që të jetë një prej godinave më të vjetra që janë akoma në këmbë në qytetin e Korçës, sot është restauruar dhe funksionon si bar–restorant.

Para restaurimit, një karakteristikë e kësaj godine ishte se muret e saj patën qenë ndërtuar pjesërisht me një lloj guri tepër të lehtë zgavëror, një lloj shkume e ngurtësuar karstike, e cila përdorej dikur për kupolat e kishave me qëllim që ato të ishin sa më të lehta. Pse, dhe a ka lidhje kjo me ndërtimet e dikurshme të kishës e cila u ndërtua më vonë, nuk e themi dot sot.

Pavarësisht, hapja e hershme falas në qytetin tonë e një kopshti për fëmijë, flet shumë: tregon emancipimin qytetar të të parëve tanë; kontributin dhe dorëgjerësinë e shtresave me mundësi ekonomike të këtij qyteti; largpamësinë për edukimin e fëmijëve; lehtësimin e jetës së përditshme të familjeve, sidomos në ato kohë kur ato ishin të mëdha dhe kishin shumë fëmijë, etj, etj.

Bazuar tek: Korça Encyclopedica 11/10