Ndarja nga jeta e aktorit Zhegu/ Qendra Kombëtare e Kinematografisë, mesazh ngushëllimi

29 Maj 2022, 17:50, Kulturë CNA
Ndarja nga jeta e aktorit Zhegu/ Qendra Kombëtare e Kinematografisë,
Fotomontazh - Aktori Enea Zhegu

Qendra Kombëtare e Kinematografisë ka reaguar për ndarjen nga jeta të aktorit të njohur dhe të dashur për publikun shqiptar, Enea Zhegu.

Me anë të një mesazhi ngushëllues, Qendra Kombëtare e Kinematografisë tregon disa nga filmat në të cilat ka luajtur Zhegu që nga rinia.

“Ndahet nga jeta Enea Zhegu

Sot në orët e para të mëngjesit ka humbur jetën aktori Enea Zhegu, në moshën 57-vjeçare.

Enea Zhegu me rolet e tij do të mbetet i paharruar për publikun shqiptar. Në vitin 1976, regjisori Dhimitër Anagnosti e zgjodhi për filmin “Lulëkuqet mbi mure” në rolin Lelos.

Një vit më pas, regjisori Viktor Gjika do ta merrte për filmin “Njeriu me top” e në këtë kohë do të zgjidhej nga regjisorja Xhanfize Keko për rolin kryesor të filmit “Tomka dhe shokët e tij” , pra për rolin e Tomkës që do ta bënte të famshëm, ndërsa ai ishte ende nxënës në klasën e shtatë.

Pas Tomkës, do të vinte edhe filmi “Një jetë më shumë”, i regjisorit Gjergj Erebara në vitin 1986.

Qendra Kombëtare e Kinematografisë i shpreh ngushëllimet familjes dhe miqve!”, thuhet në deklaratë./ CNA.al

 

Lajmet e fundit nga