Mbrëmje përkujtimore me rastin e 1-vjetorit të ndarjes nga jeta të Artistit të Popullit Pirro Mani

5 Qershor 2022, 21:03, Kulturë Marjana Bulku
Mbrëmje përkujtimore me rastin e 1-vjetorit të ndarjes nga jeta
Përkujtimore për Pirro Manin

Mbrëmje përkujtimore me rastin e 1-vjetorit të ndarjes nga jeta të Artistit të Popullit Pirro Mani.

Në mjediset e Producers Club Theater, Manhattan me menaxher vëllezërit Tollja( Ernest & Fredi Tollja) skenografi Andis Gjoni organizoi një mbrëmje përkujtimore në nderim të regjisorit të mirënjohur shqiptar Pirro Mani i cili ndërroi jetë një vit më parë.
Merrnin pjesë në këtë kujtesë nderuese e përkujtimore, aristë dhe aktivistë të komunitetit shqiptaro-amerikanë në Nju Jork, miq dhe adhurues të regjisorit dhe artistit të madh shqiptar Pirro Mani i cili është skalitur në kujtesën e spektatorit shqiptar me rolet e tij ku spikati ai i Sali Protopapës te filmi “I teti në bronx”.
Mbrëmjen e hapi iniciuesi dhe organizatori i këtij eventi, zoti Andis Gjoni, i cili solli në vëmendjen e të pranishmëve madhështinë dhe thjeshtësinë e regjisorit Pirro Mani, copëza të gjalla nga humori dhe jeta e tij aktive dhe më pas i ftoi pjesëmarrësit të ndiqnin një dokumentar të pregatitur enkas për këtë mbrëmje si nderim dhe homazh për artistin e madh që i fali aq shumë artit dhe kinematografisë shqiptare. Dokumentari solli materiale koncize intervistash dhe vlerësimesh që miqtë artistë ia kushtonin Pirro Manit, njeriut që i fali skenës aq shumë role dhe kontribute historike.

Mbrëmje përkujtimore me rastin e 1-vjetorit të ndarjes nga jeta
“Kur kthehem në Shqipëri pêrveç të tjerash ndjej edhe boshllëkun e ikjeve të artistëve nga kjo jetë “ - shprehet Mani në një prej daljeve të tij të fundit në "Albanian Culture TV" (2015).
Është e dhimbshme kur ikin artistët sepse bashkë me ta duket se largohet edhe një copëz e artit, kreativitetit dhe energjisë së bukur që ato mbartin.
Pirro Mani ishte regjisor dhe pedagog i shkëlqyer, për 25 vjet punoi në Teatrin Kombëtar, lindi në Korçë më 14 prill 1932 për t’u shquar si një nga personalitetet më të shquar në historinë e teatrit shqiptar.
Studioi në Institutin Shtetëror të Artit Teatror, GITIS, në Moskë. Pas kthimit në atdhe u emërua regjisor i Teatrit “A. Z. Çajupi”, Korçë, të cilin e drejtoi me sukses për disa vite që nga 1967 – 1992 ka qenë regjisor i Teatrit kombëtar, ku ka vënë me dhjetëra pjesë teatrale.

Mbrëmje përkujtimore me rastin e 1-vjetorit të ndarjes nga jeta
Në karrierën e tij numërohen mbi 80 shfaqje. Është nderuar me shumë çmime. Pirro Mani ishte konsideruar si mjeshtër i regjisë e skenave masive, njohës i thellë i mizanskenës. Shfaqjet kulminante janë; “Cuca e maleve”, “Fytyra e dytë”, “Arturo Ui”, “Gjenerali i ushtrisë së vdekur”, “Epoka para gjyqit”, “Nata e 12-të”, “Prometeu”, etj. Është angazhuar edhe në disa filma artistikë. Ka fituar shumë çmime dhe është nderuar me titullin e lartë “Artist i popullit”.
Por siç shprehet Andisi pengu i tij ishte pamundësia për të vënë në skenën amerikane pjesë shqiptare, projekt ky që e lë të hapur mundësinë e artistëve të shumtë që jetojnë sot në metropolin e madh amerikan për të shpalosur kryeveprat tona në sallat e boshatisura edhe pse mbi 150 mijë shqiptarë jetojnë në Nju Jork.
Pas shfaqjes së dokumentarit pati një bashkëbisedim interaktiv mes artistëve dhe pjesmarrësve në këtë event të cilët e ndjejnë se koha për bashkërendime energjish dhe projektesh ka ardhur.
Në fund zoti Andis Gjoni falënderoi të pranishmit, administratorin e Producer’s Club Theater, Ernest Tollja për sigurimin e mjedisit fizik me urimin se ky mjedis duhet të gjenerojë sistematikisht art dhe vlera të kulturës shqiptare ku monumente si Pirro Mani frymëzojnë dhe edukojnë përjetësisht./CNA.al

Lajmet e fundit nga