web counter
LEXO PA REKLAMA!

SHKARKO APP

App Store
Google Play

SPAK-u, Dritan Prençi, inceneratorët dhe brekët e Ajolës

14 Gusht 2025, 13:17, Editorial CNA
SPAK-u, Dritan Prençi, inceneratorët dhe brekët e Ajolës
Dritan Prençi dhe Ajola Xoxa

Hetimet dhe arrestimi i Erion Veliajt janë një nga ngjarjet më të mëdha që kanë ndodhur në sistemin e drejtësisë në Shqipëri.

Një nga hapat më të fortë që ka hedhur prokuroria, një nga qëndrimet më solide që ka dhënë gjykata duke na treguar se nuk ka të paprekshëm më në Shqipëri.

Veçse për një opinionin publik ka një ndarje dhe ka një kërkesë të artikuluar gjithnjë e më shumë. E thënë nga shumë analistë apo qytetarë të thjeshtë: Pse Erion Veliaj duhet të hetohet apo duhet të burgoset për brekët e Ajolës, ndërsa nuk hetohet për inceneratorët apo dosjen “5D”?

Në fakt, inceneratorët janë thelbi i gjithçkaje.

Së pari, përtej analistëve që paguhen për të bërë edhe rolin e budallait, shqiptarët duhet ta dinë se nuk kanë lidhje me njëra-tjetrën, janë çështje krejt të ndryshme. Për të qenë më të thjeshtë, SPAK-u nuk është një mocion abstrakt, është një institucion që ka prokurorë të pavarur, të cilët kanë dosjet e tyre dhe kanë përgjegjësinë e tyre ligjore, kanë formën e tyre si jetojnë.

Ka prokurorë me karakter, të ndershëm, pasionantë, të vërtetë në punë. Ka edhe prokurorë që flenë mbi dosje, që janë çufo, që gënjejnë, që bëjnë sikur hetojnë dhe këtej matanë mbushin xhepat, mbyllin dosje e nuk fillojnë hetime.

Kjo është diferenca që duhet të bëjnë njerëzit dhe duhet ta kuptojnë.

SPAK-u është një institucion me 20 prokurorë, një prokuror heton sipas kompetencave ligjore, një tjetër i bën bisht ligjit, bën qokat e tij. Një tjetër bën sikur fle, një tjetër i shtyn pafundësisht çështjet, një tjetër gjen një rast si ky i inceneratorëve për të vendosur si dardhë boksi Lefter Kokën dhe për t’i lënë atij faturën e gjithçkaje.

Çështja e inceneratorëve është në dorën e prokurorit Dritan Prençi, i cili ka pasur edhe çështjen e inceneratorit të Fierit, ku edhe atje ka shpëtuar nga përgjegjësia penale zyrtarët vendorë apo dhe ndonjë ministër.

Dritan Prençi është prokurori që ka në dorë dosjen e inceneratorit të Tiranës dhe prej muajsh që Erion Veliaj ndodhet në burg, por dhe para se të hynte, me publikimin e dokumentit që Erion Veliaj jepte OK për inceneratorin e Tiranës apo me deklarimet e tij publike në Këshillin Bashkiak se donte incenerator dhe nuk e kishte pyetur fare këtë institucion, por e pyeti shumë muaj më vonë. Dritan Prençi nuk pati kurajën ta thërrasë Erion Veliajn ta pyesë.

Ta pyesë për ato dokumente që janë publikuar në media, ta pyesë për denoncimet që ka bërë opozita, ta pyesë për ato qindra e qindra faqe që janë çuar si denoncim nga CNA, nga politikanë, nga qytetarë, nga avokatë.

Dritan Prençi e ka aty dosjen e inceneratorëve. Në kompjuterin e Ajolës është gjetur “Meg Albania” dhe nuk e thërret Erion Veliaj ta pyesë, nuk e merr ta përfshijë në dosjen e tij hetimore.

Kjo është e vërteta. Një prokuror si Dritan Prençi po fle mbi dosjen e inceneratorëve dhe për këtë nuk kanë faj as Altin Dumani dhe as Ols Dado që kanë hetuar Erion Veliajn dhe i kanë çuar tashmë 13 akuza, 9 nga të cilat për korrupsion, dhe nuk është e vërtetë ajo që është marrë dikush me brekët e Ajolës.

Kjo është një lojë mediatike, siç përmendet nga analistë të paguar që thonë se SPAK-u merret me brekët e Ajolës dhe nuk merret me inceneratorët.

Po, SPAK-u është marrë me Erion Veliajn dhe sot ai ka 13 akuza, ka dhe një fraksion dosja, po hetohet, ka akuza për korrupsion, pastrim të produkteve të veprës penale, futja e sendeve të ndaluara në burg dhe mosdeklarim i pasurisë.

Ndërkohë Dritan Prençi, i cili i ka përpara syve dokumentet e Erion Veliajt, e ka përpara syve firmën e tij, paratë që kanë marrë mediat, ka para syve ortakërinë e Vjollca Hoxhës, Lorela Hoxhës me Mirel Mërtirin dhe Klodian Zoton, e ka përpara syve grupin e strukturuar kriminal, një pjesë i përfshin, ndërsa një pjesë jo.

E ka përpara syve gjithçka Dritan Prençi, por përgjegjësinë dhe hetimin e ka ai se është prokuror i pavarur, nuk e kanë Altin Dumani dhe Osl Dado. Edhe për inceneratorët përgjegjësia që nuk po hetohet, që nuk po zbardhet dosja, është e një personi të vetëm, ai e ka emrin Dritan Prençi.

Prandaj emrin e tij analistët dhe mediat që pretendojnë se janë të vërteta duhet ta thonë me zë të lartë.

Në qoftë se ka një njeri që po i vë kapak dosjes së inceneratorëve ai quhet DRITAN PRENÇI.

Në qoftë se ka një njeri që nuk e thërret Erion Veliajn për inceneratorët ai quhet DRITAN PRENÇI.

Në qoftë se ka një njeri që po mbulon aferat e mediave me inceneratorët ai e ka emrin DRITAN PRENÇI.

Në qoftë se ka një njeri që e ka bërë tërkuzë dosjen e inceneratorëve dhe po fshihet në emër të institucionit ku punon, pra në emër të SPAK-ut, se përgjegjësinë po e mbajnë edhe kolegët e tij që nuk kanë asnjë përgjegjësi, ai është DRITAN PRENÇI.

19 prokurorët e SPAK-ut nuk kanë asnjë përgjegjësi për dosjen e inceneratorëve. Përgjegjësia që nuk hetohet deri në fund është e vetëm një emri.  Ai quhet DRITAN PRENÇI dhe po e shkruajmë me të madhe.

Dhe ne do ta mbajmë në faqe ditë e natë derisa ai të çojë në fund hetimet për dosjen e inceneratorëve dhe për të mos e lejuar kurrë që ai të mbyllë aferën e qindra miliona eurove të shqiptarëve me cironkat e lumenjve në Dibër, duke na dhënë fajtor Alqi Bllakon apo Lefter Kokën.

Në qoftë se nuk i shkohet deri në fund, tek Erion Veliaj apo paratë që ka marrë media, Dritan Prençi nuk ka bërë gjë tjetër veçse një vrimë në ujë dhe nuk meriton të jetë në atë institucion e të paguhet nga taksat e shqiptarëve, të cilët u vodhën nga inceneratorët e që po mbrohen nga një prokuror si ai./ CNA

 





Lajmet e fundit nga