web counter
LEXO PA REKLAMA!

SHKARKO APP

App Store
Google Play

Burgosja politike, si instrument justifikues i propagandës

11 Shkurt 2026, 14:54, Editorial CNA

Burgosja politike, si instrument justifikues i propagandës

Kur flitet për burgosje politike ka një keqkuptim, referuar emrave të politikës aktuale në Shqipëri.

Për shembull, si mundet të jetë burgosje politike edhe e Berishës, edhe e Erion Veliajt? Apo edhe e Ilir Metës dhe Ilir Beqajt? Edhe e Ervin Salianjit, edhe e asaj që u dënua për një arkë peshk?

Si mund të jetë burgosje politike kur Erion Veliaj, në fakt, ishte numri dy i Partisë Socialiste, kryetar i Bashkisë Tiranë, njeriu kryesor i partisë që udhëhoqi Reformën në Drejtësi, mik i ngushtë i Fatmir Xhafajt, i mbështetur prej tij. Për më tepër, Erioni e mbështeti më pas, me gjithë drejtorët e tij të dosjes “5D”, që ta bënin Xhafajn deputet dhe tani del me pretendimin si i burgosur politik.

Ilir Meta ka të drejtë të pretendojë sepse thotë se socialistët, për 12 vite në pushtet, e bënë reformën, megjithëse ai luftoi që të gjente konsensusin, se Rama e keqpërdori, se nuk është reformë, se është Rama-formë e të tjera.

Sali Berisha gjithashtu e sulmon dhe thotë se këtë e bëjnë hetuesit e Sigurimit të Shtetit.

Por Erion Veliaj thotë se bëhet fjalë për burgosje politike, kur vetingun e bënte PS-ja, reformën e bëri PS-ja dhe reforma në fund ka futur në burg Metën dhe ka çuar në arrest shtëpie Berishën.

Sot ka dalë edhe një kryetar tjetër bashkie, Edison Memolla, i cili ka mbajtur një qëndrim, teksa shprehet se është burgosje politike dhe thotë se gjyqtari ka lidhje politike.

Tani në Shqipëri çdo njeri ka lidhje, ka një familjar në PD, në PS, mund të jetë gjyqtar, mund të jetë prokuror, ka një kushëri në një parti politike, ka një të afërm drejtor. Për më tepër, kundërshtarët politikë në Shqipëri s'flasin fare as me njëri-tjetrin.

Puna e këtyre socialistëve që thonë se është persekutim politik nga gjyqtarët e prokurorët, kur kapen njëri duke vjedhur votat e tjetri duke firmosur fondet për t'ia marrë gruaja, nuk është ndonjë çudi e madhe, duke ditur si mashtrojnë me propagandën e tyre.

Të ankoheshin Berisha dhe Meta, të gjithë do ta pranonin, (hajde po e pranojmë edhe Salianjin, megjithëse e ka marrë pushteti), duke thënë se Rama është në pushtet, ka 12 vjet, ka mandatin e katërt, se i ka bërë të gjitha dhe se është i kapur. Do të besohej më shumë dhe kishin njëfarë të drejte.

Opozita thotë edhe që Erion Veliajn e futi në burg Edi Rama. Ndërsa Erion Veliaj, nëpërmjet lobistëve dhe studiove ligjore, pretendon se është i burgosur politik.

Cili është persekutimi politik që Erion Veliajn dhe Edison Memollën i ka futur në burg Edi Rama, në një kohë që këta janë përfaqësues të Partisë Socialiste?

Por si i futi në burg Edi Rama këta kryebashkiakë? Njëri bleu vota për PS-në, tjetri ishte kryetari i PS-së Tiranë dhe u fut në burg para fushatës. Se ky persekutimi politik i këtyre sikur nuk shkon, se në fakt Ramës i bënte dëm. Por rezultoi që, edhe pse Erion Veliaj u fut në burg, Rama mori më shumë vota dhe më shumë mandate.

Por përtej të gjithave, ky persekutim politik që pretendohet është thjesht dhe vetëm një instrument justifikues për propagandën e ditës dhe për të mbajtur sa më afër militantët apo për t'iu justifikuar dhe zgjatur karrierën politike, asgjë më tepër sesa kaq.

Ndërsa Berisha e zgjat pretendimin si i burgosur politik dhe shpeshherë kontradiktor në qëndrimin ndaj SPAK-ut apo GJKKO-së, vlerëson vetëm vendimet ku dënohen socialistët, duke luajtur politikisht, fundja opozitë është. Këta kryebashkiakët apo zyrtarët socialistë nuk arrijnë dot ta përballojnë këtë pjesë. Kopjojnë Saliun.

Pas këtyre perlave që vijnë nga qëndrimet e zyrtarëve deri te lobimet e Veliajt, s’ka ngelur gjë tjetër përveçse Edi Rama të thotë se ministrat e tij hajdutë dhe Zdromsin e Tiranës ia futi në burg Saliu. Kjo s’ka ndodhur ende, kryeministri ka shkuar deri tek akuzat për prokurorët dhe gjykatësit për t’i intimiduar ata, te Saliu s’ka shkuar ende. Shpresojmë shumë që fajin këtë herë ta ketë vetë Saliu./CNA

 





Lajmet e fundit nga