web counter
LEXO PA REKLAMA!

SHKARKO APP

App Store
Google Play

Politika me fatkeqësitë natyrore

8 Janar 2026, 11:12, Editorial CNA

Politika me fatkeqësitë natyrore

Në vitin 2026, Shqipëria vazhdon të ketë të njëjtën fytyrë në politikë si para 16 vitesh. Vetëm se ndryshojnë palët në pushtet.

Kur ndodhën përmbytjet në dhjetor të vitit 2010, kryeministri Edi Rama dilte dhe thoshte se nuk ishte fatkeqësi natyrore, fajin e kishte qeveria që përmbytej vendi.

Tani, pas 16 vjetësh del Sali Berisha dhe thotë fajin e ka qeveria, e ka korrupsioni, nuk e ka natyra dhe prurjet e mëdha të shiut.

Përtej çdo justifikimi, në rast se gjërat shikohen me qartësi, del se të gjitha palët janë përgjegjëse.

Por së pari përgjegjës është vetë njeriu, qytetari dhe më pas natyra.

Te zona e kënetës në Durrës, që nga fjala kënetë, ne shqiptarët jemi njerëz që kemi ndërtuar në kënetë. Shkuam, kapëm toka dhe ndërtuam në kënetë dhe tani i themi shtetit pse përmbytemi. Po të ndërtosh në kënetë përmbytesh.

A mund të ndërtohen shtëpi, apartamente në kënetën e Maliqit, në ish-kënetën që quhet se tashmë ajo është bonifikuar? A mund të jetojnë njerëz atje?

Kështu është edhe me Durrësin, por njerëzit ndërtuan. Atëherë shteti duhet të investojë, ato shtëpi duhet të legalizohen, kostot janë si në çdo vend të Europës. Qytetarët duhet të sigurojnë shtëpitë, shteti duhet të investojë sipas taksave që ata paguajnë për të bërë sa më shumë kanalizime, kullime, hidrovore etj.

Por të ndërtosh në kënetë dhe pastaj të bësh politikë dhe të ngresh akuza, një herë njëra palë, një herë pala tjetër, se fajin e ka korrupsioni, se fajin e ka njëra palë politike apo tjetra, kjo është e neveritshme. Kur ndërton në kënetë përmbytje do presësh.

Të investojë PD-ja sa të dojë, të investojë PS-ja sa të dojë, të jetë dhe kryeministër Sali Berisha, kjo situatë do të përsëritet sa herë të ketë reshje. Nuk duhet të bëhet politikë me të tilla fatkeqësi. Por ja që palët tona janë njësoj si 16 vite më parë, atëherë akuzonte Rama, sot akuzon Berisha.

A duhet të ishte investuar në këto 16 vjet?

Patjetër. Por sado të investohet, po të ndërtosh në kënetë, atje përmbytje do të ketë gjithmonë. Po të ndërtosh në shtratin e lumit, apo ku lumi del dhe për shekuj dihet që ka dalë dhe ka shtratin e tij, sërish do të ketë përmbytje.

Palët politike mund të akuzojnë njëra-tjetrën sa të duan, por përpara kësaj duhet të marrin përgjegjësinë për të mos lejuar të ndërtohet në zona të tilla, në zona kënetash, në zona afër brigjeve të lumenjve, afër përrenjve, sepse ndoshta nuk dalin për tri vjet apo për pesë, por kur fryhen e dalin dhe ka reshje e situata të jashtëzakonshme, mund të shkaktojnë dëme dhe fatale deri në jetë njerëzish.

Prandaj palët politike më shumë sesa të akuzojnë njëra-tjetrën duhet të shtrëngojnë ligjet, duhet të shtrëngojnë shtetin për të mos lejuar të ketë ndërtime në vende të cilat njerëzve u rrezikohet jeta dhe së dyti të investohet aq sa mundet t'i dilet në zonat ku tashmë është bërë fakt ndërtimi dhe shteti i la për 35 vjet dhe tashmë nuk ka se çfarë u bën, edhe pse palët politike akuzojnë njëra-tjetrën për korrupsion./ CNA





Lajmet e fundit nga