Paqja Fiskale, FMN-ja dhe pak histori

14 Nëntor 2025, 13:36, Editorial CNA

Kryeministri Rama ka reklamuar fort atë që ai e quan Paqe Fiskale. Pra, një akt, i cili i përkthyer në fjalë më të thjeshta, është një falje që bën qeveria kryesisht për borxhet e pambledhshme në 5 deri 10 vitet e shkuara.

Pra, kjo më shumë quhet një pastrim regjistrash, që çliron tatimet, doganat, institucionet e tjera që mbledhin të ardhurat, nga detyrimet të cilat nuk mblidhen dot.

Për këtë u kërkohet bizneseve të vetëdeklarohen, të bëhet një falje, të paguajnë një përqindje më të ulët, që shteti të mbledhë ç’të mbledhë nga ajo që nuk mbledh dot. Edi Rama e quan Paqe Fiskale.

Paqja Fiskale/ Rama: Falje për sipërmarrjet me detyrime të prapambetura
7 Nëntor, 13:12

Nga ana tjetër del FMN-ja dhe reagon. Në fakt, ky nuk është rasti i parë që ndodh në Shqipëri. Ka ndodhur një herë në vitin 2011, për të cilin qeveria e atëhershme kërkoi të bënte një amnisti të plotë fiskale, që kryeministri Edi Rama, në atë kohë në krye të opozitës, dhe të tijtë, nuk e votuan.

Paqja Fiskale, FMN-ja dhe pak histori

Duke qenë se një amnisti nuk arrihej dot pa një shumicë të kualifikuar kushtetuese, u zgjodh që mazhoranca e atëhershme, pra demokratët, të bënin një falje të detyrimeve, le ta quajmë një paqe fiskale.

Për më tepër, për një shumë të caktuar parash, mund të deklaroheshin pa e dhënë burimin e tyre pasi të futeshin në bankë, por që në fakt, pjesa e nenit penal që duhej hequr nga Kodi, nuk u hoq.

Në finale përfundoi një fshirje detyrimesh/borxhesh, me një fushatë të madhe të bërë në atë kohë nga qeveria shqiptare.

Posterat e ministrisë

Më pas këtë gjë e përsëriti edhe qeveria socialiste, e cila ka vetëm një ndryshim nga veprimet që bën, thjesht dhe vetëm rrit pak më shumë ato detyrimet që kërkon.

Paqja Fiskale/ FMN ngre shqetësimin për risqet
14 Nëntor, 13:32

Pra, në qoftë se demokratët atëherë e bënë me 1% deklarimin e pronës dhe rivlerësimin e saj, apo me 3% dhe deri në 5% faljet për detyrimet, socialistët tashmë i kanë çuar në vlera më të larta, 5 apo 10%, duke qenë se edhe taksimin e kanë më të lartë.

Pra, nuk kemi një paqe të vërtetë fiskale, nuk kemi një amnisti të vërtetë fiskale. Kemi thjesht dhe vetëm një fshirje të detyrimeve dhe borxheve.

Qeveria këto praktika i ka të përsëritura, e kanë bërë dhe socialistët disa vite më parë, tani po e përsërisin. Dhe kjo është thjesht dhe vetëm një lëvizje për të fshirë nga regjistrat borxhet e pambledhshme.

Rishikohet Paqja Fiskale, 5% tatim për bizneset që do të rivlerësojnë deklarimet e 5 viteve
12 Nëntor, 07:22

Dhe reagimi i FMN-së duket një gjë shumë qesharake, ndoshta burokratë dhe zyrtarucë që qëndrojnë në zyra dhe nuk e dinë që ky nuk është rasti i parë që ndodh në Shqipëri. Dhe në rastet e mëparshme FMN-ja nuk është se ka qenë kundër, megjithëse zakonisht të tilla i ka qëndrimet.

Qeveria shqiptare po bën shumë mirë që po përpiqet të çlirojë biznesin nga detyrimet të cilat nuk i paguan dot, apo dhe administratën nga ato që nuk mbledh dot.

Por ajo që ka më shumë nevojë Shqipëria dhe biznesi nuk është thjesht dhe vetëm një paqe fiskale në thonjëza, por kanë nevojë për një amnisti të vërtetë pas 35 vjetësh të një sistemi demokratik që ka kaluar sa me tatime, me shtet, pa shtet, me taksa, pa taksa.

Paqja fiskale/ Rama: Do të rrisë të ardhurat për arkën e buxhetit, ja pika kyçe
24 Tetor, 16:27

Kujtojmë këtu '92-shin me rënien e sistemit diktatorial, pastaj '97-ta, shkërmoqja e shtetit, ardhja e demokratëve, ardhja e socialistëve, lëvizjet e forta fiskale.

Ajo që ka nevojë Shqipëria më shumë sesa një “paqe e quajtur fiskale”, është një amnisti e vërtetë fiskale për të çuar në zero çdo llogari, çdo biznes, çdo të ardhur. Dhe kjo do të ndihmonte e do të çlironte fort ekonominë e vendit.

Kuptohet, këtu nuk duhet të përfshihen kurrsesi paratë e siguruara nga trafiku i qenieve njerëzore apo i narkotikëve.

Pra, flasim për një amnisti fiskale për biznesin, për të ardhurat e padeklaruara, për shmangien e tatimeve e të tjera./ CNA