web counter
LEXO PA REKLAMA!

SHKARKO APP

App Store
Google Play

Opozitë që dëbon vlerat

2 Tetor 2025, 13:33, Editorial CNA


Rreth 11 emra ka nxjerrë opozita si kandidatë për Bashkinë e Tiranës përtej kalamallëqeve të Adriatik Lapajt apo pafytyrësisë politike të Endri Shabanit, qasjes së Agron Shehajt, opozita ka dalë me një tufë emrash.

Emra me peshë qytetare, me vlerë që përtej sulmeve se janë apo jo sorosianë dhe kanë bërë apo s’kanë bërë opozitë me obus duke gjuajtur qeverinë, kanë vlerat e tyre dhe na tregojnë se opozita ka shpresë, ka emra dhe mund të jetë edhe më e madhe dhe më e fortë.

Së pari, Ermal Hasimja, një nga njerëzit që iu bashkua KOP-it të Berishës, ishte drejtor i Marrëdhënieve me Publikun në vitin 2005.

Opozitë që dëbon vlerat

Kuptohet doktori në hapat e parë ishte ndryshe, më pas Berisha u kthye në atë të vërtetin. Siç ndodhi historia me foltoren politikan race.

Hasimja nuk është njeri pa peshë publike tashmë, vazhdon aktivitetin e tij privat në një institucion arsimor, ka një artikulim dhe qasje të fortë politike dhe njihet më shumë sesa një i djathtë stoik si njeri më afër liberales, por me një kontribut në PD para shumë vitesh.

E dyta, është Edlira Çepani, bashkëshortja e të ndjerit Gert Bogdani, i cili në fakt ishte themeluesi i Partisë Shqipëria Bëhet të Adriatik Lapajt së bashku me Florian Binajn.

Opozitë që dëbon vlerat

Që në hapat e parë të kësaj lëvizjeje u larguan ndoshta nga egoizmi, individualizmi dhe dyfytyrësia e Adriatik Lapajt, të cilin e pamë pas fitores së një mandati në kryeqytet kur për javë të tëra u tall me shqiptarët se kishte vënë në listë kushërinjtë, të cilët do të tërhiqeshin.

Më pas plasi sherri mes Nismës Thurje të Endri Shabanit. Nuk është se ka një përjashtim të madh. Edlira Çepani, një zonjë që mund të jetë një vlerë e shtuar për opozitën.

Emri i tretë është Florian Açka, i cili është nga njerëzit që ka drejtuar departamentin e diasporës në PD, një emër i mirë me një kontribut të caktuar në PD.

Opozitë që dëbon vlerat

Më tej Adriana Kalaja ka zgjedhur të luftojë me qeverinë, aktiviste e pandalur, edhe ajo ka peshën e saj. Ndoshta është shumë më e ashpër sesa tjerët më lart. Ndoshta nuk është aq akademike sa të tjerët, por është energjike dhe e palodhur dhe është atje në betejë.

Opozitë që dëbon vlerat

Emra të tjerë vazhdojnë të dalin, kanë peshën dhe vlerat e tyre, por na tregojnë një detaj, opozita ka emra, nuk është pa emra.

PD ka njerëz, por ata i kanë dëbuar, i kanë lënë larg. I kanë lënë në periferi, nuk i sheh në PD se i mbajnë larg e më larg. Jo se i mban Berisha, i mban rrethi i atyre që kanë mandatet, i mban rrethi i atyre që janë në lista të mbyllura, i mban rrethi i atyre që kanë zënë sekretariatet, degën, sepse nuk e kuptojnë.

Dikush mund të thotë se pa një hapje të mirëfilltë të opozitës nuk mund të vijë në pushtet, por ata e kuptojnë. Nuk e duan këtë hapje të mirëfilltë të opozitës dhe ardhjen në pushtet, por duan të mbajnë karrigen e tyre dhe pozicionin që kanë në opozitë.

Le të rrijë PD 50 vjet në opozitë, mjafton që ata të rrinë aty, të kenë karrigen e tyre dhe të bëjnë pazarin e radhës, të marrin një mandat. Një mandat deputeti është gati 200 mijë euro të ardhura drejt e drejt nga rroga, nuk po flasim për gjë tjetër dhe opozita që lëngon.

Dikush mund të thotë se është katandisur ku thërret qameti, por dalja e emrave që ne përmendëm si Hasimja, Florian Açka apo djem dhe vajza të tjera që në kampin opozitar janë pafund, tregojnë që opozita ka një shpresë, ka emra, ka çfarë t’u paraqesë shqiptarëve, por fatkeqësisht i ka shtyrë në një cep dhe nuk u jep peshën që duhet.

Ndoshta intelektualët nuk duan të jenë në rresht si militantët dhe nuk mund të jenë të tillë. Ata përfaqësojnë një vlerë tjetër, janë një vlerë e shtuar për opozitën, por ata duhet të jenë pjesë e saj, e hapjes së PD-së, e një opozite të vërtetë që paraqet platforma, që ka emra intelektualë, ka kapacitete që krijojnë besim tek opinioni publik se mund të qeverisë nesër dhe mund të sjellin ndryshim për vendin.

Me rrathë të mbyllur, të cilët mbështillen me zinxhirë dhe u vendosen çelësa, opozita do të jetë keq e më keq në ditët e saj, ndërsa e hapur ka më shumë shpresë për të ardhmen.

Te rrathët e mbyllur mund të hyjnë edhe emra si Jorida Tabaku, Ilir Alimehmeti etj., që nuk lënë karrigen e deputetit për të shkuar në garë për Bashkinë po nuk e panë të sigurt ofiqin, pra karrigen e kryetarit, kurse të tjerë, edhe pse në distancë dhe pse mund të mos jetë garë e tyre, shkojnë pranojnë, vlerësojnë rivalët dhe sfidojnë kundërshtarin në një përballje totalisht të pabarabartë.

Kjo është të tregosh vlera dhe diçka mund të bëjë opozita dhe të kesh antivlera siç është rasti i Joridës apo Alimehmetit që opozitarizmin e shikojnë nga kolltuku i deputetit apo kryetarit që i falet detyra dhe asgjë më shumë se kaq.

Disa kanë zgjedhur të garojnë dhe të tregojnë vlerat, disa kanë zgjedhur të fshihen pas gishtit me antivlerat e tyre./ CNA





Lajmet e fundit nga