web counter
LEXO PA REKLAMA!

SHKARKO APP

App Store
Google Play

Qeveria në “WhatsApp” dhe çfarë pritet nga Edi Rama

9 Shtator 2025, 17:54, Editorial CNA

Qeveria në “WhatsApp” dhe çfarë pritet nga Edi Rama

Sot ka qarkulluar një qeveri që mund të quhet qeveria e “WhatsApp”-it ku disa individë kanë sponsorizuar veten e tyre mesa duket për të qenë në kabinet.

Por për ata që e njohin Edi Ramën në fakt të gjithë kanë pushkatuar veten. Shumica e tyre nuk kanë për të qenë kurrë ministra.

Ndonjëri do rikthimin, ndonjëri do largimin dikush ka inate pse një tjetër do jetë ende minister, por në fakt orekset e tyre janë thjesht qesharake.

Asnjëri prej tyre nuk hyn dot në mendjen e Edi Ramës për më tepër me këtë që kanë bërë thjesht dhe vetëm kanë dalë nga mendja e tij.

Por çfarë pritet?

Ajo që pritet nga Edi Rama në të vërtetë më shumë se sa emrat e kabinetit është fjalimi i tij, i cili me shumë gjasa do t’i përshtatet kapitujve të BE-së, pra rrugës së integrimit ku në sektorë të ndryshëm siç dhe është paralajmëruar do shpalosen reformat që do bëhen.

Sot kishim të parën, atë për ndërtimet pa leje. Pak ditë më parë reformën për administrimin e Ujësjellësave, pra ujin, reforma në inspektoriate që u paralajmërua dhe me AKU dhe të tjera lëvizje.

Pra, reforma strukturore që nuk do përfshijë vetëm ministrat e rinj.

Rama nuk do që lajmi të jetë emri i ministrit por struktura, formimi i piramidës qeverisëse për ta vënë atë në funksion të integrimit të Shqipërisë sipas kapitujve të çelur nga BE.

Nga ana tjetër, një për një sipas ministrive ai do të shpallë prioritetet dhe më pas ministrat. Fjalimi mund të jetë 1 orë apo 1 orë e 30 minuta siç ai preferon të flasë dhe më pas në fund dy minuta do të kemi lexim emrash.

Kjo duhet të jetë dhe pjesa që i shijon më shumë kryeministrit Rama kur shikon fytyrat që ka përballë plot ankth, diku me një të buzëqeshur, dikujt që nuk i del pritshmëria, dikujt që humb detyrën apo ndonjëri që papritur bëhet i lumtur. Deri këtu nuk ka asgjë për tu komentuar.

Qeveria e WhatsApp është një budallallëk më vete.

Ajo që do ndodhë është ajo që theksuam pak më lart. Qeveria e WhatsApp nuk mund të dalë 48 orë para kur kryeministri ka 4 muaj që nuk ka bërë të ditur asnjë emër kë do të zëvendësojë, përkundrazi ka vazhduar punën normalisht.

I vetmi lajm që pritet është a do të shkarkohet Erion Veliaj dhe a do të shpallen zgjedhjet për Bashkinë e Tiranës.

Kjo edhe nga intervista në emisionin "Opinion" ku kyreministri Edi Rama nuk ishte i vendosur për të artikuluar “jo nuk do e shkarkoj, nuk do të ketë zgjedhje në Tiranë derisa të mbarojë gjykata”

I bindur se gjyqi mund të zgjasë një apo dy vjet dhe kështu që mandati i Erion Veliajt mbaronte. Kryeqyteti ka probleme. Tirana është çdo ditë e më e pistë, ka më pak ujë, administrohet më keq.

Nuk ka një kryetar bashkie dhe nuk mund të lihet bashkia më e madhe në vend me rreth 1 milion banorë aktiv në ditë pa kryetar.

Shpallja e zgjedhjeve në Bashkinë e Tiranës do të ishte ndoshta dhe lajmi i ditës.

Më pas dhe kush do të ishte kandidatura që në rast se Edi Rama do ta lexonte dhe do ta mësonim në 11 shtator atëherë zyrtarisht do të kishim fillimin e një fushate në kryeqytet por jo vetëm.

Sepse zgjedhje do të ketë dhe në bashki të tjera si ajo e Tepelenës, e Beratit, e Matit.

Pra janë 4 bashki që në fakt do të përbëjnë dhe një test të ri elektoral për opozitën e cila ka pretenduar se ja kanë vjedhur zgjedhjet. Do të duhet të hyjnë në garë në këto 4 bashki pasi të dyja palëve politikisht iu vlen.

Ramës për të treguar se nuk ka vjedhur votat dhe nuk ka manipuluar por të ripërsërisë fitoret e tij dhe opozita që të provojë se vërtetë janë vjedhur votat dhe janë manipuluar.

Në të gjithë skenarët e datës 11 shtator thelbi ngelet fjalimi i Ramës, reforma strukturore dhe në fund emrat e ministrave.

Në rast se do të shkarkohet Erion Veliaj dhe do të shpallet gara për Bashkinë e Tiranës ky do të jetë ndoshta dhe lajmi më i madh i asaj Asambleje përtej qeverisë, fjalimit dhe emrave të ministrave./ CNA





Lajmet e fundit nga