web counter
LEXO PA REKLAMA!

SHKARKO APP

App Store
Google Play

Takimet e Dumanit në SHBA, si grusht për Veliajn dhe shokët e tij

3 Shtator 2025, 10:02, Editorial CNA
Takimet e Dumanit në SHBA, si grusht për Veliajn dhe shokët e tij
Kreu i SPAK, Altin Dumani

Kreu i SPAK-ut, Altin Dumani, prej disa ditësh po zhvillon një vizitë në SHBA, ku ka pasur takime të rëndësishme, ndër të cilët më kryesori ka qenë dje me zyrtarin e Lartë të Byrosë për Çështjet Europiane dhe Euroaziatike, Brendan Hanrahan, në DASH. (LEXO KETU)

Takimi i Dumanit vjen në një kohë kur SPAK-u çoi dosjen në gjykatë për kryebashkiakun e Tiranës, Erion Veliajn.

Vetë institucioni dhe Dumani sulmohen sistematikisht nga media të urdhëruara politikisht për të ushtruar presion të paligjshëm ndaj SPAK-ut për hetimet që po kryen.

Lufta ndaj këtij institucioni u bë shumë e ashpër, kryesisht ndaj prokurorit Ols Dado dhe vetë Dumanit në momentin që u arrestua kryebashkiaku i Tiranës, Erion Veliaj.

Gjithçka shkoi deri aty sa Veliaj inskenonte nga burgu i Durrësit akuza se prokurorët kishin kërkuar dy milionë euro.

Nga ana tjetër, ditë pas dite Mero Baze, si mbetja e fundit mediatike e keqpërdorur e Erion Veliajt, kuptohet për shkak të pagesave qindra mijëra euro, në mënyrë sistematike dhe të pandalshme, e ka akuzuar SPAK-un se ka bërë “krim të madh” që e ka arrestuar Erion Veliajn dhe nuk e la të ndiqej në gjendje të lirë.

“Krimi i dytë më i madh”, shpikja e Mero Bazes, ishte për faktin se pse u arrestua Ilir Meta kur ai s’mund të bënte asgjë dhe SPAK-u e kishte dhunuar. Në fakt, SPAK-u ka kërkuar arrestimin si për Veliajn, si për Ilir Metën, dhe vendimin e jep gjykata.

Gjithashtu, nga ana tjetër, ish-presidentin nuk e ka dhunuar SPAK-u, por Policia e Shtetit. Pikërisht policia e Mero Bazes. SPAK-u po sulmohet.

Nën akuza të vazhdueshme ka qenë prokurori Ols Dado. Kanë shkuar deri në mashtrime publike sa është theksuar se ai ka një konflikt interesi sepser ka kërkuar një shtesë në leje ndërtimi, e cila i është refuzuar nga kryebashkiaku i Tiranës.

Në fakt, deri më sot për më shumë se dy javë artikulohet kjo akuzë.

Askush nuk e ka parë kërkesën me firmën e Ols Dados drejtuar bashkisë dhe as refuzimin e bërë nga kryebashkiaku Veliaj.

Gjithçka ka ngelur në kuadër të mashtrimeve publike, sulmeve që bëhen ndaj SPAK-ut nga Veliaj dhe shokët e tij.

Këta të fundit tashmë mund të quhen të mjerët e Veliajt, të cilët nuk mundën dot të ngrinin në opinionin publik një kauzë të tyren për të vërtetën që donte të thoshte Erion Veliaj, për të rrëzuar akuzat që kishte ngritur SPAK-u, por tentuan me mashtrime, sulme ndaj SPAK-ut, ndaj Dumanit dhe prokurorëve të tjerë që punojnë me integritet në atë institucion.

Kryen sulme, akuza, shpifje, ushtrojnë presion të paligjshëm thjesht dhe vetëm se këta prokurorë kishin bërë detyrën, ndërsa për të tjerët, të cilët flenë mbi dosje apo që kanë lidhje të forta me pushtetin, shokët e Veliajt heshtën.

Pikërisht në këtë rast, ku ka dy standarde ndaj SPAK-ut, kur ka sulme, kur ka shpifje kur është arrestuar Ilir Meta dhe të tjerë, kreu i institucionit, Altin Dumani, thirret në DASH për t’u dhënë një “grusht” në fytyrë Erion Veliajt dhe shokëve të tij./ CNA

 





Lajmet e fundit nga