PËRGJIMET/ Erion Veliaj inskenoi pagesën 2 milionë euro/ Si e ngriti gënjeshtrën me Mero Bazen

5 Prill 2025, 12:52, Denoncim CNA

Audiopërgjimet e SPAK-ut ndaj kryebashkiakut Erion Veliaj tregojnë se si emra pronarësh mediash janë vënë në shërbim të tij, si Mero Bazo apo Carlo Bollino.

Por më spektakolari në këtë dosje rezulton të jetë Mero Baze, i cili në përgjime del se si përdoret nga Veliaj për inskenim gënjeshtrash.

Mero Baze është kthyer në kamxhikun që Veliaj përdor për të inskenuar dhe ngritur gënjeshtra e mashtrime.

Ndërsa zhvillohej seanca e Veliajt në Apelin e GJKKO-së, në mediat e tyre u ngrit një tymnajë, ku nisën të publikoheshin lajme të tipit se prokurorit i ishte paguar shuma 2 milionë euro, ndërsa vijonin sulmet kriminale ndaj prokurorit Ols Dado, të cilit i referoheshin si grek, duke shkruar për klanin grek brenda SPAK-ut, apo dhe sulmet ndaj gjyqtarit Erion Bani me të njëjtën natyrë.

Në disa media anonime shkruhej se prokurori Ols Dado dhe gjyqtari Erion Bani kishin lidhje me Greqinë dhe lobin grek të SHBA-së, duke thënë se familjarët e tyre ishin me pasaportë greke apo për udhëtime dhe hotele që gjoja posedojnë prokurori dhe gjyqtari etj.

PËRGJIMET/ Erion Veliaj inskenoi pagesën 2 milionë euro/ Si e

Si qëndron e vërteta e tymnajës së ngritur për 2 milionë euro?

Ka vetëm një të vërtetë që në fakt del nga përgjimet. I gjithë skenari është urdhëruar nga burgu i Durrësit.

Në përgjimet e siguruara nga CNA, del në skenë Mero Baze dhe rezulton se lajmi me 2 milionë euro është një inskenim i Veliajt.

Kryebashkiaku Erion Veliaj, në një bisedë të datës 7 mars të vitit 2025 me vëllain e tij Arbër Veliaj, i kërkon Meros një këshillë që të publikojë se për kokën e tij janë kërkuar 2 milionë euro dhe ka tre dëshmitarë për këtë.

“Në orën 09:22, Erion Veliaj bisedon me Arbrin dhe i kërkon që t'i marrë një këshillë Meros, ku t'i thotë se me tre dëshmitarë ka ardhur sekseri dhe i ka thënë kaq është paguar për kokën tënde. I kërkon ta pyesë nëse është ‘fishek’ që ia vlen. Po kështu i kërkon të bisedojë me Meron dhe me Fugën.

Në orën 09:31, Erion Veliaj i kërkon Ajolës qe të bisedojë me Meron dhe me KM e t'u marrë një këshillë, pasi Erioni kërkon të dijë që në postimin e fundit të hënën, të tregojë pa dhënë shumë detaje se sa është kërkuar për kokën e tij. Më pas, këtë frazë Erioni e përsërit sërish: ‘Pra është ofru një shumë, erdhi dikush dhe tha ne po tna e paguash këtë, sa ka paguar ai qe do ta fusi brenda e zgjidhim. Tani pyetja eshte ta nxjerrim kete apo jo?’

I thotë se këtë gjë e ka me dëshmitarë, me Dokushin, Isuf Berberin dhe Myslym Murrizin. I kërkon qe t'i thotë që të takohet me Arbrin pasi ai (Erioni) ka nevojë për këshillë”, thuhet në përgjimet e siguruara nga CNA.

Pra, kjo bisedë tregon se gjithçka është inskenuar nga Veliaj në burg, i cili kërkon këshilla nga Mero se çfarë të bëjë, a vlen si “fishek” apo jo. E vërteta është se prokurori u sulmua nga media anonime pas urdhrit nga Veliaj dhe këshillave të Meros.

Mero Baze, nga ana tjetër, e quan këtë një lëvizje dëshpëruese duke e këshilluar se fillimisht duhet denoncimi, pastaj lajmi, pastaj reagimi i kryebashkiakut.

“Në orën 11:05, Erion Veliaj bisedon me Arbrin, ky i fundit i thotë se ka biseduar me ‘shokun M' dhe i ka thënë se është lëvizje dëshpëruese dhe jo e mirë, pasi në fillim duhet bërë denoncimi, pastaj nga dëshmitarët, pastaj nga ti (Erioni)”, e këshillon Mero Baze.

Pra, duket qartë se ku përgatiten skemat, skenarët dhe mashtrimet. Lajmi është prodhuar nga burgu i Durrësit duke përdorur si kamxhik Mero Bazen dhe media të tjera anonime për të sulmuar prokurorin dhe gjyqtarët të ngarkuar në gjyqin e tij./ CNA