"Doktorët" e Berishës, Salianji dhe fyejt e tjerë

10 Dhjetor 2025, 13:38, Editorial Çim Peka

“Djemtë e Mulit” dhe “Djemtë e Gridës” nuk po luftojnë njëri-tjetrin për karrige, ata vërtetë besojnë se po e bëjnë për PD-në: Po e shpëtojnë, mendon njëra palë dhe po e ringrenë, pala tjetër.

Mbështetësit e “Doktor Nokës” nga njëra anë dhe adhuruesit e “Doktor Alimehmetit” nga ana tjetër janë përballë për të mirën e PD-së, dhe më besoni që vërtet e mendojnë. Ashtu si vërtetë e besojnë që janë doktorë që të dy. Alimehmeti dhe Noka janë doktorë aq sa është Ngjela avokat.

Pastaj kemi dhe Salianjin që ka filluar t’i duket vetja si Arbnori. Por Pjetri hyri në burg se krijoi parti politike në komunizëm e doli si i tillë, ndërsa Ervini u fut në burg se denoncoi një trafikant droge dhe doli nga burgu, dyshoj, me respekt për këtë lloj race, se vetëm të tillë kishte në burgun e Fierit. Arbnori kishte edhe disidentë të tjerë në Burrel.

Uroj që Ervini të ketë hyrë si i burgosur politik, e të mos ketë dalë si i burgosur ordiner!

Kur Sali Berisha rrugëtoi me PD-në, në krah kishte vërtet “Doktorë”, “Studiues”, “Historianë”, “Ekonomistë”, “Juristë”, “Disidentë” etj.

Sot të tillë i gjen me zor në Shqipëri e jo më në PD. Kanë ikur.

Ndërsa nga ana tjetër, Rama si një pacient i psikiatrisë mban për shefe kabineti një psikiatre. Dhe përdor si mjet për të sunduar atë që di të bëjë më mirë, ta “matildizojë” shoqërinë që të vrasë shpresën e që “shtresa e mesme”, dhe kryesisht "truri" i vendit, ata që mbajnë një komb, të emigrojnë.

Në këtë ambient, Sali Berisha po lundron të bëjë politikë serioze me intelektualë të improvizuar e disidentë të sforcuar.

Urdhëroi mbreti një të diturin e oborrit të mësonte qenin të fliste, ose në të kundërt do ta vriste mësuesin e qenit. Pas një kohe “mësuesi” kishte mësuar të lehte, por jo qeni të fliste.

Berisha pas katër viteve që mundohet t'u mësojë të mendojnë politikisht “Doktorëve Muli e Alimehmeti”, “Disidentit Salianji” etj., për t'u përballur me një të çmendur pa rregulla politike e norma morale, si pacienti i "Psikiatrisë Rama", vetë Berisha poston një video të Kastriot Myftarit për të na thënë se ai i kishte parashikuar këto zhvillime.

Në këtë zymtësi referencash e vlerash nuk do të habitesha ta shikoja Alfred Cakon në kupolën e ristrukturimit të PD-së. Audiencë ka!

Sali Berisha si shkollë e politikës serioze dhe ndoshta i vetmi intelektual serioz në krye të një partie të madhe duhet të gjejë formën t’i bindë për t'u bashkuar me të intelektualët dhe profesionistët realë dhe jo improvizues gradash e profesionesh. Shumica e lidershipit politik në vend sot nuk ka zanat, nuk punojnë dot në vend tjetër se realisht nuk i merr njeri në punë, nuk kanë zanat!

P.s.: Nuk po përmend emra të tjerë se më duhen për në studio t’i servir si njerëz që dinë të mendojnë politikisht!/ CNA