web counter
LEXO PA REKLAMA!

SHKARKO APP

App Store
Google Play

E fundit!

x

Humbjet e opozitës në betejën me SPAK-un

20 Nëntor 2025, 14:35, Editorial CNA

Humbjet e opozitës në betejën me SPAK-un

Sot mediat raportuan se GJKKO kishte dhënë masë sigurie ndaj zëvendëskryeministres Belinda Balluku, pas kërkesës së prokurorit të SPAK-ut, Dritan Prençi, njeriu që fle mbi dosjen e inceneratorëve. Masat e dhëna nga GJKKO e pezullojnë Ballukun nga detyra dhe i ndalojnë lëvizjen jashtë shtetit.

Goditjet e forta të SPAK-ut ndaj mazhorancës kanë filluar me shumë zyrtarë të lartë të qeverisë, drejtues bashkish dhe kulmuan me arrestimin e Erion Veliajt.

Ish-zëvendëskryeministri Arben Ahmetaj u mor i pandehur, por akuzat e tij dhe veprimet rrodhën pasi e kishte lënë detyrën. Kryebashkiaku Erion Veliaj u arrestua në detyrë, dhe ai duke prishur provat.

Ndërsa në rastin e zonjës Balluku pretendohet se duke qenë në detyrë mund të cenojë dëshmitarët dhe procesin hetimor.

SPAK-u, në fakt, ka çuar në qeli edhe ish-ministrin Lefter Koka, ish-ministrin Ilir Beqaj, ish-zyrtarë të lartë, shumë kryetarë bashkish, ish-kreun e Bashkisë së Durrësit, Vangjush Dako etj. Njerëz me peshë në politikën e Partisë Socialiste dhe mazhorancës.

Ajo që ndodh është se SPAK-u godet pushtetin, por nuk humbet mazhoranca dhe qeveria, pra PS-ja, por humbet opozita.

Dhe dje, si kryeministri Edi Rama, ashtu edhe zëvendëskryeministrja Belinda Balluku, gjatë qëndrimeve të tyre thanë se e mbështesnin reformën në drejtësi dhe do ta linin drejtësinë të bënte punën. Nuk do të përbaltnin prokurorët dhe të sulmonin drejtësinë.

Ndryshe nga sa bëri Erion Veliaj, që përdori instrumentet e tij për të sulmuar prokurorin Ols Dado, SPAK-un, gjyqtarët e GJKKO-së, etj.

Kështu kanë bërë dhe shumë nga personat e tjerë të marrë nën akuzë, duke u hedhur në sulme ndaj prokurorëve dhe gjyqtarëve. Pra, njerëzit e mazhorancës kanë dashur të mbrohen duke sulmuar, por më domethënës është fakti se opozita nuk po fiton asgjë.

Del Berisha dhe thotë Altin Troplini, nga ana tjetër i fut dhe një gënjeshtër me disa miliona euro duke përfshirë dhe shoferin, dhe “fitoret” e Berishës janë zero.

Del Ilir Meta dhe e quan prokurori politike, gjyqtarë politikë, sulme dhe akuza në inat e sipër, “fitorja” zero me bisht, maksimumi ka lumturuar një kallëp si Tedi Blushi.

Pra, dy krerët kryesorë të opozitës, të cilët janë nën akuzë, sillen njësoj si Erion Veliaj dhe shumica e pushtetarëve të sotëm. Në qëndrimet ndaj SPAK-ut janë njësoj, edhe vetë kryeministri Rama u bashkua me ta disa kohë, por shpejt lëvizi trajektoren.

Lind pyetja: Si mundi opozita të mos përfitonte asgjë me gjithë këto goditje që po merr pushteti i Edi Ramës? Veprimet e SPAK-ut në finale kryeministrin kanë goditur.

Partia Demokratike nuk po fiton asnjë votë, përkundrazi. Sa më shumë goditet qeveria aq më shumë rrudhet opozita.

Me sulme, akuza, sharje dhe shpifje kundër SPAK-ut dhe prokurorëve edhe doktor Berisha, edhe Ilir Meta dhe shumë nga instrumentet e tyre mediatike, “kap e bjeri SPAK-ut”, “kap e bjeriu prokurorëve”, përfundimi SPAK-u godet masivisht qeverinë, opozita “kashtë e koqe”.

A do të kishte më shumë përfitime opozita në rast se do të bënte një betejë morale të vërtetë me fakte e jo me trillime ndaj individëve të caktuar brenda SPAK-ut apo strukturave të drejtësisë?

Ndërkohë që prokurorët kap e bjer zyrtarëve të Ramës, ministrave, zëvendëskryeministrave. Opozita nuk fiton asgjë. Sepse ka zgjedhur betejën e gabuar, akuza e sulme ndaj SPAK-ut dhe jo një betejë të vërtetë morale.

E vetmja kërkesë që ka PD-ja, me sa duket dhe doktori, është që SPAK-u të arrestojë Edi Ramën dhe të vijë PD-ja me Saliun në pushtet.

Kjo nuk ka për të ndodhur kurrë! Edhe sikur SPAK-u ta hetojë Edi Ramën dhe çfarëdo t’i ndodhë Edi Ramës, nuk vjen PD-ja në pushtet me ata njerëz që ka katandisur, me këtë mentalitet që ka, duke bërë avokatinë e korrupsionit dhe hajdutëve të pushtetit.

Është një e shkuar tashmë e konsumuar që shqiptarët po e tregojnë sistematikisht se e konsiderojnë të tillë.

Sa më shumë goditet qeveria rrudhet opozita, sepse nuk ka ditur të ketë një qasje tjetër ndaj SPAK-ut, dhe me sulmet shpesh duket sikur është bashkë me pushtetin.

Çfarë do të ndodhte nëse PD-ja dhe opozita do të kishin një qëndrim ndryshe ndaj SPAK-ut, prokurorëve dhe GJKKO-së? Dhe të mos shikonin hundën dhe veten e tyre, por të mbështesnin vërtet reformën në drejtësi. Të mbështesnin vërtet zyrtarët e ndershëm dhe të pakorruptuar. Të mbështesnin vërtet prokurorët që luftonin korrupsionin.

Ajo që do të ndodhte është e thjeshtë, shumë më shumë shqiptarë do të mbështesnin opozitën sepse do të thoshin se mbështet luftën ndaj korrupsionit. Por duke sulmuar SPAK-un që godet korrupsionin në qeveri, opozita thjesht dhe vetëm bëhet aleate e korrupsionit dhe e pushtetit.

Shqiptarët nuk janë budallenj, dinë ta lexojnë mjaft mirë dhe ta kuptojnë se çfarë do të thotë të bësh betejë pro korrupsionit. Dhe ajo që bën opozita kundër SPAK-ut është një betejë për të mbrojtur korrupsionin e pushtetit. Ndaj dhe opozita vetëm humb kur SPAK-u godet korrupsionin dhe pushtetin./CNA

 





Lajmet e fundit nga