web counter
LEXO PA REKLAMA!

SHKARKO APP

App Store
Google Play

Nga Elvi Fundo/ “Arrestoni popullin, lironi Veliajn”

10 Shkurt 2026, 16:38, Editorial Elvi FUNDO

Nga Elvi Fundo/ “Arrestoni popullin, lironi Veliajn”

“Arrestoni popullin, lironi Veliajn” duket të jetë qëndrimi publik që vjen nga mediat e pushtetit, por jo vetëm kaq, ky duket të jetë qëndrimi i mazhorancës, përfshi edhe segmente të caktuara të opozitës.

Këtë javë, çfarë nuk po na dëgjojnë veshët dhe çfarë s’po na shohin sytë.

Rama thotë “do të hyjmë në ligj, do ta ndalojmë pezullimin e një ministri”, ndërsa lobistët e Erion Veliajt thonë se kryetari i bashkisë nuk duhet të ishte arrestuar, por duhet të hetohej në gjendje të lirë, të vazhdonte të shkonte në punë.

Megjithëse kryebashkiaku Veliaj ishte kapur duke prishur provat, duke rënduar pozitat e tij penale dhe më tej, edhe në paraburgim u pa se çfarë mashtrimesh dhe sulmesh dirigjonte. Pa folur më tej për gënjeshtrat e raporteve të këtyre lobistëve apo shkrimet që publikohen në mediat e pazareve të pushtetit. (LEXO KETU)

Kryeministri na thotë “nuk mund të më pezullosh dot ministrin, do të ndërhyj në ligj”. Lobistët thonë s'mund të arrestohet kryetari i bashkisë se ka një vendim të Komisionit të Venecias (megjithëse ngatërrojnë orientin me oksidentin).

Tani t’i vendosin imunitet edhe kryetarit të bashkisë që s'arrestohet dot, t’i vendosin imunitet edhe një ministri, i cili ndoshta nuk ka imunitet se nuk është deputet, të bllokojnë edhe masën e pezullimit. Kollaj fare këtu mbyllet e gjitha.

Pse të arrestojnë Erion Veliajn?

Pse të arrestojnë ministra pa imunitet?

Pse të vendosin pezullime?

Të arrestojnë popullin! Shumë e thjeshtë. S’ka mbetur zgjidhje tjetër!

“Korrupsionin në vendin tonë nuk e bëjnë zyrtarët, ministrat ose kryetari i bashkisë, kryeministri ose administrata e korruptuar. Atë e bën populli”. Këtë po na thonë të gjithë. “Populli do arrestuar i gjithi njëherë e mirë”. Mos qeshni, duket e vërtetë.

Në rastin më serioz, me këto që po deklarojnë megafonat e mazhorancës, e gjithë beteja e luftës ndaj korrupsionit do të katandisë “kokoshin në një thelë”, e të hyjnë në burg ca drejtorucë, për të shpëtuar “kokat” e korrupsionit ose sërish të “arrestojmë popullin”.

Kanë ngelur dhe nja pesë a gjashtë zyrtarë të arrestuar, që janë ende në burg, t’i nxjerrin edhe ata dhe pastaj SPAK-u për çfarë na duhet? Kujt i duhet?

Ta bëjnë me ligj: nuk lejohet të hetohen politikanët, të arrestohen politikanët, por të arrestohet populli.

Nuk lejohet të arrestohen kryetarët e bashkive, të arrestohet populli.

Nuk lejohet të arrestohen deputetët, të arrestohet populli.

Nuk lejohet të arrestohen ministrat, të arrestohet populli.

Qeveria jonë mund ta bëjë, mund ta fusë popullin në burg, sepse i ka mandatet e nevojshme. Ka rreth 83 mandate, bashkë me aleatët bëhen edhe më shumë, të bëjë propozime, Grupi Parlamentar i PS-së t’i miratojë, t’i çojë në Parlament, të ngrejë kartonët dhe të arrestohet populli.

Kjo është zgjidhja më e mirë edhe për partinë në pushtet, edhe për kryeministrin, edhe për lobistët e Veliajt, edhe për mediat e Veliajt, që të vazhdojnë zullumet, aferat, skandalet, korrupsionin dhe gjithçka tjetër në kurriz të popullit.

Ky i fundit duhet ta vazhdojë deri në fund dhimbjen e tij, të shkojë të bëjë dhe burgun. Ai që meriton burgun në këtë rast është populli, nuk është as Erion Veliaj, as ministrat e Ramës, as qeveria, as deputetët, as kushdo tjetër./ CNA





Lajmet e fundit nga