web counter
LEXO PA REKLAMA!

SHKARKO APP

App Store
Google Play

E fundit!

x

Denoncimi në CNA për Irfan Hysenbelliun/ Zapton rreth 1000 m2 pronë publike dhe private në Korçë

12 Gusht 2025, 10:48, Denoncim CNA

Denoncimi në CNA për Irfan Hysenbelliun/ Zapton rreth 1000 m2

Një sipërfaqe e konsiderueshme prone publike dhe private në zemër të Korçës, prej vitesh është në qendër të një konflikti të ashpër mes biznesmenit Irfan Hysenbelliu dhe qytetarit Altin Iljasi.

Çështja ka përfshirë bashkinë, policinë, prokurorinë dhe gjykatat, por prej 7 vitesh, sipas Altin Iljasit, asgjë nuk ka ndryshuar.

Sipas denoncimit të bërë për CNA, që nga viti 2018, Hysenbelliu ka zaptuar një sipërfaqe prej afro 1000 metrash katrorë pronë publike, pranë godinës së fabrikës “Birra Korça”, duke e vendosur në funksion të biznesit të tij. Por konflikti shkon edhe më tej.

Nga trualli prej 840 metrash katrorë që zotëron qytetari Altin Iljasi, biznesmeni dyshohet se ka zaptuar 60 metra katrorë, duke e përdorur si pjesë funksionale të lokalit dhe parkimit për klientët e tij.

Denoncimi në CNA për Irfan Hysenbelliun/ Zapton rreth 1000 m2
Pjesa me portokalli është prona e zaptuar nga Irfan Hysenbelliu, pjesa me jeshile është sipërfaqja që i ka marrë Altin Iljasit

Iljasi thotë se fillimisht Hysenbelliu i ka kërkuar ta blejë truallin e tij, por më pas marrëveshja mbeti vetëm në kuadër premtimi. Ai e cilëson këtë si një mashtrim për ta mbajtur çështjen nën kontroll dhe për të shmangur denoncimet ndaj tij për pushtimin e hapësirës publike.

Denoncimet e para janë bërë në vitin 2018 në polici, prokurori dhe Bashkinë e Korçës. Denoncimi më i fundit mban datën 9 shtator 2022, me numër protokolli 424, drejtuar Inspektoratit të Mbrojtjes së Territorit në Korçë.

Denoncimi në CNA për Irfan Hysenbelliun/ Zapton rreth 1000 m2
Kërkesa e Altin Iljasit

Në dokument, Iljasi kërkon ndërhyrjen e menjëhershme për lirimin e hapësirës publike dhe rikthimin e pronës private në posedimin e tij. Në vitin 2018, IKMT Korçë kishte marrë vendim për prishjen e një rrethimi të ndërtuar pa leje, vendim nr. 16, datë 22 tetor 2018, në emër të Andrea Nakos.

Por vendimi nuk u ekzekutua, pasi Gjykata Administrative e Shkallës së Parë vendosi pezullimin e tij deri në shqyrtimin e plotë të çështjes. Aktualisht, dosja është në gjykim pranë Gjykatës Administrative të Apelit Tiranë.

Denoncimi në CNA për Irfan Hysenbelliun/ Zapton rreth 1000 m2
Përgjigjja e Bashkisë Korçë

Ndërkohë, sipas denoncuesit, në zonën ku ndodhet prona e tij ka edhe 12 pronarë të tjerë trualli, por i vetmi që preket nga pushtimi është ai.

Ai shton se jo vetëm që nuk lejohet të shfrytëzojë pronën, por hapësira e tij përdoret nga klientët e “Birra Korça” për të parkuar automjetet, duke i shërbyer drejtpërdrejt biznesit të Hysenbelliut.

Denoncimi në CNA për Irfan Hysenbelliun/ Zapton rreth 1000 m2
Prona e zaptuar

Altin Iljasi apelon publikisht që institucionet të ndërhyjnë për të ndalur abuzimin me pronën publike dhe private, dhe për t’i dhënë fund një praktike që e ka bllokuar prej vitesh të drejtën e tij ligjore mbi truallin./ CNA

 





Lajmet e fundit nga