E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Përgjegjshmëria e cekët për turizmin/ Ujërat shqiptare "përmbyten" nga ndotja

30 Korrik 2025, 14:48, Denoncim CNA

Shqipëria prej disa vitesh është bërë një destinacion i njohur e gjithashtu i preferuar nga turistët e huaj që për vendin tonë fillimisht informacionin e morën nga një "bombardim" lajmesh të sponsorizuara në mediat më të njohura botërore, që nga ato amerikane, angleze e franceze, gjë që dha ndikim të konsiderueshëm në rritjen e shifrave të turizmit vit pas viti.

Teksa numri i prenotimeve nga të huajt pati një rritje të paprecedentë, jo vetëm në sezonin veror, por edhe gjithëstinor, mundësia duket se u shfrytëzua maksimalisht, jo vetëm nga bizneset, por edhe nga vetë Ministria e Turizmit, që rriti edhe performancën e shfaqjes në një nga panairet më të rëndësishme të turizmit botëror në Berlin, ku prezantoi ofertën duke e paraqitur vendin si një destinacion perfekt për turizmin malor, atë të aventurës, kulinar, të kulturës, por sidomos për pushime në plazh.

Jehona arriti deri në prestigjiozen "National Geographic", që i përshkroi ujërat dhe brigjet e detit Jon si një alternativë surprizuese e Maldiveve. Nuk ua mohojmë as këtyre medieve të mëdha, as artikujve të sponsorizuar me mijëra euro, se plazhet dhe ujërat janë një perlë e natyrës, por nuk mund të gëlltisim faktin se natyra përfshin sipërfaqen e gjithashtu thellësitë e ujërave detare, aty ku na presin të tjera surpriza, për fatin e keq, të hidhura.

Zonja ministre e Turizmit sot, e zoti ministër i Turizmit nesër, ky është realiteti: Një "mantel" mbetjesh, ose edhe perlash po të doni, të depozituara për dekada me radhë.

U desh një aksion vullnetar i disa zhytësve në ujërat e Porto Palermos për të treguar se Maldivet nga Shqipëria janë jo vetëm shumë larg në distancë, por edhe sa i përket pastërtisë. Kjo e fundit nuk vjen vetë, duhet kujdes e sidomos kulturë për mjedisin, por edhe para.

Ministria e Turizmit dhe Mjedisit mbase e gjen veten komode nga rritja e shpenzimeve të turistëve, por duket se po e injoron seriozisht detyrimin për të garantuar standarde të mjedisit të pastër.

Në vend që të ndërmarrë masa konkrete për pastrimin e plazheve dhe kontrollin e shkarkimeve të ujërave të zeza, është përqendruar vetëm te heqja e disa qindra shezlongëve në hapësira publike dhe pastrimi i rërës, aksione sporadike dhe propagande në rrjetet sociale, që në çdo rast qëndrojnë në atë që duket me sy të lirë.

Ekspertët e mjedisit kanë paralajmëruar se mungesa e një politike të qëndrueshme mjedisore rrezikon jo vetëm shëndetin e banorëve dhe pushuesve, por gjithashtu është shumë larg pretendimeve për të arritur në turizëm elitar.

Situata kërkon një ndërhyrje urgjente nga qeveria dhe veçanërisht nga Ministria e Turizmit dhe Mjedisit, e cila deri më sot ka dështuar, jo vetëm të arrijë të vërë, qoftë edhe një të vetëm, flamur blu, që tregon cilësi maksimale të plazhit dhe ujit, por ka treguar edhe papërgjegjshmëri.

Po rrimë te kjo e fundit, se nëse do të flisnim edhe për vizion, mbase do të jemi të vështirë për t’u kuptuar. Se çfarë kuptohet nga ai që merr ndopak "erë" nga turizmi është se Shqipëria rrezikon të kthehet nga një mundësi zhvillimi, në një krizë afatgjatë mjedisore dhe ekonomike./ CNA