E fundit!

14:21 Aktualitet

Vendimi i Kushtetueses për sekuestrimin/ Braho: Ka nevojë për rregullim ligjor procedural

Kreu i SPAK-ut, Klodjan Braho, gjatë raportimit të tij në ...

Abuzimet me vajzat e showbizit dhe audienca e mendjeve të sëmura

27 Korrik 2025, 15:01, Denoncim CNA

SPAK njoftoi një ditë më parë se kreu një operacion të gjerë, duke goditur një rrjet ndërkombëtar të trafikut të drogës, nga i cili u vunë 16 persona nën hetim, për 6 prej tyre u ekzekutuan edhe masat e sigurisë.

Gjatë operacionit u sekuestruan mbi 6 ton lëndë narkotike, me vlerë 411 milionë euro. (LEXO KETU)

Menjëherë pas këtij raportimi nga Prokuroria e Posaçme, filloi në media ajo që ka ndodhur shpesh, këtë herë edhe më shumë, diku me gjysmë të vërteta diku me “fake news”-e të plota, me gënjeshtra nga më banalet, thjesht dhe vetëm për të krijuar një lloj audience, të goditen vajzat e botës së showbizit.

Pra është e mjaftueshme që vajzat të jenë të bukura, të kenë jetën e tyre, të jenë pjesë e showt që të denigrohen në çfarëdo lloj forme.

Përzihet e zeza me të bardhën.

Llumi i atyre që veten e quajnë portale por në fakt nuk kanë kurrë përgjegjësinë për të shkuar përballë ligjit, mbeten anonimë dhe të fshehur, godet personazhe, emra që nuk kanë asnjë lidhje me ngjarjen apo me personazhet e botës së krimit.

Me çfarë kemi të bëjmë? Me “fake news”-e për të krijuar disa klikime apo me mendje të sëmura të fiksuara pas vajzave të showbizit?

Shumë prej personazheve të botës së showbizit kanë një jetë ku me apo pa probleme, dikush tjetër edhe me jetë private pa asnjë lidhje me botën e krimit, pasi nuk janë të gjitha njësoj, por mjafton të dalë një lajm, të dalë një informacion për arrestime, për personazhe vip dhe një gjysmë e vërtetë bëhet e madhe, krijohen trillime, emra, personazhe, thjesht dhe vetëm për të marrë audiencë dhe vëmendje.

Askush nuk mendon se çfarë pasojash lë pas jo vetëm te vajzat e botës së showbizit por edhe tek njerëzit dhe individët që i rrethojnë dhe për të cilët shkruajnë të pavërteta, gënjeshtra për disa klikime.

Nuk kemi të bëjmë as me investigime, nuk janë as raportime të vërteta, as materiale gazetarie, nuk flasim për etikën se, u ka vdekur me kohë, por janë veçse një llum, një neveri, një pështirosje që bëhet me qëllim, me vetëdije.

Në rast se, këto do të ishin pavetëdije apo thjesht dhe vetëm gabime gjithçka do të ishte njerëzore dhe patjetër e falshme por duket se është e qëllimishme, me paramendim, për të përbaltur dhe denigruar figurën e një njeriu të ekranit.

Këto lloj goditjesh për klikime dhe audiencë me lajme “fake” vijnë ndoshta nga individë që ndihen bosh në jetën e tyre shpirtërore dhe përfundojnë si banditë mediatikë duke sulmuar emra, vajza, personazhe që nuk kanë asnjë lidhje me atë që shkruhet.

Shohim qarkullimin e lajmeve ku diku përmendet moderatorja e njohur Luana Vjollca, diku një vajzë tjetër e showbizit, diku edhe një personazh që nuk e njeh askush që thjesht ka qejf të ekspozohet në rrjetet sociale, por mjafton të ketë një ngjarje dhe “mendjet e sëmura” e marrin, e lidhin, e fejojnë e dashurojnë, e martojnë , e çojnë në Dubai, e zbresin në jahte, ku nuk e çojnë dhe çfarë nuk ju prodhon mendja, thjesht dhe vetëm për të pasur një qëllim në fund: një audience, e cila në fakt duhet të jetë ajo që duhet t’i neverisë.

Mendjet e sëmura vijojnë të godasin vajzat e njohura të showbizit me mashtrime që kanë pasoja dhe nuk mbajnë përgjegjësi ligjore por vazhdojnë të bëjnë të tilla “krime mediatike njerëzore”./ CNA