Konfiskimi i godinave të "Prestige Resort"/ Vasalët marrin në mbrojtje Hysenbelliun

22 Mars 2023, 14:54, Aktualitet CNA

Konfiskimi i godinave të "Prestige Resort"/ Vasalët marrin

Foto ilustruese

IKMT dhe Policia e Shtetit zbarkuan ditën e sotme në “Prestige Resort” të Irfan Hysenbelliut për të konfiskuar dy godina, përkatësisht 1 dhe 3.

Ndërkohë ka patur shumë reagime nga vasalët që kanë marrë në mbrojtje Irfan Hysenbelliun duke pretenduar se është një sulm ndaj tij për shkak të linjës editoriale të tij apo për aludime se kjo po ndodh për shkak të publikimit të raportit të DASH.

Lista e vasalëve që kanë dalë krah Hysenbelliut është e gjatë, nga kreu i Partisë së Lirisë, Ilir Meta apo edhe deputetët e PD së vulës, nga Bardhi e Tabaku e të tjerë.

Reagimet e vasalëve në mbrojtje të Hysenbelliut

“Qeveria duhet të tërhiqet menjëherë nga çdo akt presoni ndaj medias. Aksionet policore të herëpasherëshme ndaj biznesve të "Focus Media Group", dhe konfiskimi i pronave pa vendim gjyqësor, janë të papranueshme në një shtet të së drejtës dhe vend kandidat për në BE”, shkruan Gazment Bardhi.

“Kompania duhet njoftuar. Rastet e korrupsionit sot janë bërë të shpeshta. Promovimi i njerëzve me historik kriminal nga PS është bërë masiv. Dhe në rastet kur qeveria merr vendime arbitrare, si në rastin e Prestige, apo rastit në Vlorë, theksoj se pasojat janë në kurriz të taksapaguesve shqiptarë. Është koha që PS të bëjë një zgjidhje politike, duhet të ketë reagime brenda tyre. Vendi duhet të shkojë në zgjedhje qoftë me një qeveri teknike. Të ngarkosh një popull me barrë të tillë nga një qeveri arrogante është mëkat. Duhet të mësojnë nga historitë e vendeve të tjera. Është përgjegjësi e madhe, edhe e tyre që mendojnë se përfaqësojnë socialistët, të rrinë në heshtje. Nëse PS nuk do të reagojë ndaj kësaj keqqeverisjeje, kësaj arrogance dhe këto gjoba të Tatimeve, do të mbajnë përgjegjësi. ‘Në një vend ku populli ka frikë qeverinë quhet diktaturë’, kështu thuhet në shkencat politike. Boll më me qeverisje me arrogancë dhe që prodhon taksa të larta për shqiptarët”, tha ish ministri Arben Malaj.

“Ky është shtet i kaçavidave. Kur sulmohen një biznes çfarë mund të ndodhë tjetër. Ne jemi subjekt i të drejtave ndërkombëtare, ndaj duhet reaguar”, tha Lisandër Hoxha duke pretenduar se po sulmohet për shkak të linjës editoriale të Hysenbelliut.

“Sot organet e drejtësisë duhet të ishin te “Prestige Resort”, dhe të çonin pas hekurave me radhë që nga Dallëndyshe Bici dhe deri te Edi Rama”, ka thënë Fahri Balliu.

“Sot u fol gjatë për lirinë e medias, dhe u theksua se presioni mbi median, e kanë dëmtuar lirinë e saj. Media juaj ka qenë dhe është në shënjestër të qeverisë kohët e fundit.Deri më tani u prezantua raporti për Shqipërinë, ku u vlerësuan si problematika përveç medias, elementë të tjerë si zgjedhjet, lufta ndaj korrupsionit, krimit të organizuar dhe elementë lidhur me hapësirën që ka opozita.Sot ka më shumë rëndësi të flasim për gjithçka po ndodh lidhur me mediat, dhe në veçanti median tuaj si pjesë e presionit të qeverisë”,ka thënë Jorida Tabaku duke aluduar se ky është një presion i qeverisë .

“Në këtë ditë feste të shenjtë të besimit Bektashi, por njëherazi dhe dita e festës së Demokracisë, qeveria e Edi Ramës nuk rreshti në veprimet e saj të paligjshme dhe mafioze.

Veprimet hakmarrëse ndaj Prestige Resort në shkelje të të gjithë ligjeve dhe të drejtave të njeriut, janë një sulm i hapur me një urrejtje skizofrenike jo vetëm ndaj këtij biznesi por janë një sulm ndaj pronës së çdo qytetari.

Sot, siguria juridike, respekti ndaj ligjit, respekti ndaj të drejtës për tu ankuar në gjykatat e vendit kanë marrë një goditje tjetër nga Edi Rama dhe banda e tij, të cilët kërkojnë me çdo kusht që të mbyllin gojën e mediave për të penguar thënien e së vërtetës.

Goditjet e Edi Ramës ndaj mediave shqiptare kanë qenë të vazhdueshme, por dhe provë e dëshpërimit të tij, përballë zemërimit të jashtëzakonshëm të qytetarëve ndaj tij dhe mafiozëve që e rrethojnë.

As Edi Rama dhe as një shërbëtor i tij nuk e ndal dot uraganin e zemërimit popullor, që do t'i ndëshkojë në 14 Maj për dëmet shumë të mëdha që i kanë shkaktuar Shqipërisë dhe shqiptarëve”, ka shkruar Ilir Meta.

“Kur të sulmon shteti, kur të dhunon policia dhe kur vendimet e gjykatave nuk zbatohen atëherë jetojmë në anarshi totale. Biznesi është gjëja më e ndershme në këtë vend, sipërmarrësit janë heronjtë e këtij vendi. Janë ata që punësojnë, janë ata që mbajnë buxhetin e shtetit, buxhet i shqyer nga abuzimi dhe korrupsioni. Kur biznesi goditet ke goditur themelet e tregut dhe pa treg nuk ka zhvillim e demokraci”, tha Arbi Agalliu.

“O Yuri…o zonja ambasadore, perfaqesuese e DASH ne Shqiperi, a ke ndonje fjale per te thene ? Rama me vullnet te plote po sfidon ata qe ti pretendon te perfaqesosh!

Ti qe edhe kur kollitej opozita leshoje rrufe ndaj saj , a ke ndonje fjale per Ramen sot? Po per raportin e DASH a ke ndonje fjale ? Sigurisht qe jo se ti ketu nuk perfaqeson SHBA, sic te pelqen te thuash, ti perfaqeson mc gonigalet dhe detyrimet i ke ndaj tyre e ndaj korruptuesit te tyre. Misioni yt ketu eshte shkatrrimi i opozites qe te mbijetoje Rama edhe pse eshte i zhytur koke e kembe ne korrupsion kunder interesave te vendit qe ti perfaqeson”, shkruan Edi Paloka duke pretenduar se sulmi po vjen pas raportit të DASH./ CNA.al