Komisionerja nën hetim vendos për gjyqtarë dhe prokurorë/ Bie Vettingu, Etleda Çiftja rrezikon dënimin

26 Qershor 2022, 11:08, Vetingu CNA

Komisionerja nën hetim vendos për gjyqtarë dhe prokurorë/

Komisionerja e Vettingut, Etleda Çiftja

Komisionerja e Vettingut, Etleda Çiftja, po hetohet nga Prokuroria e Posaçme Kundër Korrupsionit dhe Krimit të Organizuar.

Çiftja është zyrtarisht tashmë e pandehur me akuzat për deklarim të rremë dhe falsifikim.

Deklarimi i rremë, dyshohet se është kryer nga Çiftja përballë komisioneve të përzgjedhjes së saj për t’u bërë anëtare e Komisionit të Pavarur të Kualifikimit.

Me 10 qershor 2021, Çiftja është paraqitur në SPAK për t’u njohur me akuzat, ndërkohë që vazhdon punën.

Nga njëra anë po hetohet nga SPAK-u dhe nga ana tjetër ajo po heton gjyqtarë dhe prokurorë, duke e bërë kështu edhe më të dyshimtë procesin e Vettingut.

Në vend që të pezullohej, ajo firmos konfirmime apo shkarkime për gjyqtarë dhe prokurorë.

Pasuria që “rrëzon” komisioneren e Vettingut

Në korrik 2017, anëtarja e Komisionit të Pavarur të Kualifikimit, Etleda Çiftja, në deklaratën fillestare të pasurisë, thotë se ka në pronësi tokë arë, me sipërfaqe 3440 m2 në Qerret të Kavajës, blerë në 10 korrik 2006, me vlerë 50 mijë euro.

Për këtë pasuri, ajo deklaron si burim financiar 15 mijë euro të kursimeve nga paga si juriste në kompaninë private “Egnatia O. Albania” dhe 35 mijë euro të tjera kredi, të cilën duhet ta shlyejë për 20 vjet deri në vitin 2026.

Deklarata fillestare e pasurisë

Në dritë ka dalë kontrata e shitblerjes me nr. 2138 Rep, nr. 1490 Kol, dt. 10 korrik 2016, nënshkruar pranë noteres publike Luljeta Kongoli në Tiranë, ku rezulton se Etleda Çiftja e ka blerë këtë tokë për vetëm 300 mijë lekë të rinj.

Komisionerja nën hetim vendos për gjyqtarë dhe prokurorë/

Çiftja dyshohet se ka kryer falsfikim të dokumenteve për blerjen e tokës me sipërfaqe 3440 m2.

Sipas njërës kontratë vlera e blerjes është 300 mijë lekë të rinj dhe sipas një kontrate të dytë që ka dorëzuar pranë një banke të nivelit të dytë, vlera është 50 mijë euro.

Komisionerja nën hetim vendos për gjyqtarë dhe prokurorë/

Sipas këtyre të dhënave, Çiftja duket se ka paraqitur në bankë një kontratë me të dhëna të rreme, për të siguruar një kredi prej 35 mijë eurosh, e cila i është disbursuar në shtator 2006, pra rreth tre muaj pas nënshkrimit të kontratës së shitblerjes.

Kujtojmë se Etleda Çiftja është anëtarja e tretë e institucioneve të vetingut që procedohet penalisht dhe merret e pandehur nga SPAK-u.

Më parë janë proceduar anëtarët e Kolegjit të Posaçëm të Apelimit, KPA, Ardian Hajdari dhe Luan Daci, ky i fundit i shkarkuar pasi u dënua me vendim të formës së prerë për falsifikim të formularit të aplikimit që mundësoi zgjedhjen e tij si anëtar i Kolegjit./CNA.al