Tirana, mes plehrave/ Qytetarët i hedhin mbeturinat jashtë koshave

31 Maj 2022, 17:46, Sociale CNA
Tirana, mes plehrave/ Qytetarët i hedhin mbeturinat jashtë koshave
Mbeturinat e hedhura jashtë koshave te rruga e "Elbasanit"

Duke qenë një nga mediat që flet me zërin e së vërtetës, CNA.al ka publikuar me fakte probleme nga më të ndryshmet që shqetësojnë qytetarët, e ndërsa sot po sjell sërish në vëmendje një tjetër shqetësim.

Koshat e tejmbushur të mbeturinave që kundërmojnë apo plehrat e hallakatura në rrugën apo lagjen ku jetoni, janë një fenomen i përhapur për qytetarët e Tiranës dhe jo vetëm.

Sot CNA.al ka sjellë disa pamje të shkrepura në rrugën e Elbasanit, pranë këndit të lojërave tek ish 7-Xhuxhat.

Qytetarët kanë hedhur qeset plastike me mbeturina në cep të koshave, ndonëse vihet re që koshat kanë ende hapësirë.

E njëjta gjë ka ndodhur edhe në lagjen e "ish-Tregut Elektrik" pranë dyqaneve, ku pavarësisht se janë tre kosha, banorët i kanë hedhur mbeturinat në tokë.

Këto janë dy shembuj aktualë të mungesës së përgjegjësisë si nga qytetarët edhe nga bashkia, e cila nuk merr asnjë masë ndëshkuese ndaj këtyre personave që ndotin ambientin.

Krahas masave që duhet të ndërmarrë pushteti vendor, edhe sjellja qytetare është ajo që duhet kritikuar për ndotjen e ambientit.

Nëse dalin në Europë, të gjithë qytetarët shqiptarë i mbajnë plehrat në makinë dhe i hedhin në vendet përkatëse, madje edhe duke i ndarë ato sipas kategorive.

Por sapo mbërrijnë në tokën shqiptare, të gjithë i hedhin plehrat në rrugë, pavarësisht punës së punonjësve që merren me pastrimin.

Kompanitë e pastrimit i mbledhin mbeturinat dy herë në ditë, e ndërsa sjellja e qytetarëve lë shumë për të dëshiruar, pasi jashtë shtetit u tremben gjobave e në Shqipëri nuk i përmbahen rregullave të etikës dhe të bashkëjetesës në komunitet.

CNA.al bën thirrje për ndërgjegjësim, ndërsa paralajmëron se do të vazhdojë të denoncojë fenomene të tilla dita-ditës./ B.A. – CNA.al

Lajmet e fundit nga