web counter
LEXO PA REKLAMA!

SHKARKO APP

App Store
Google Play

E fundit!

x

Nga simptomat te rrugët e infektimit/ Dasho: Çfarë duhet të dini për linë e majmunëve

28 Maj 2022, 19:13, Sociale CNA
Nga simptomat te rrugët e infektimit/ Dasho: Çfarë duhet
Eksperti i Shëndetit Publik, Erion Dasho

Eksperti i Shëndetit Publik, Erion Dasho, ka dhënë disa informacione të vlefshme për qytetarët lidhur me linë e majmunëve, teksa janë konfirmuar rastet e para edhe në Greqi, shtetin fqinj me Shqipërinë.

Në një intervistë për CNA.al, Dasho  tha se qytetarët duhet të tregohen të kujdeshëm dhe të jenë të vëmendshëm.

“Nuk do të thosha “të rrezikuar”, por sigurisht duhet të kemi kujdes. Në rreth 40 vjet që kjo sëmundje ndiqet kanë qenë raportuar rreth 400 raste në gjithë botën, ndërkohë që gjatë shpërthimit të fundit kemi mbi 200 raste të konfirmuara ose të dyshuara në pak javë. Kjo situatë kërkon vëmendje për të kuptuar nëse ka ndryshuar diçka në strukturën e virusit që e bën atë më të përhapshëm”, u shpreh ai, ndërsa tregoi simptomat e virusit.

Eksperti deklaroi se simptomat e para përfshijnë ethe, lodhje, dhimbje muskujsh dhe ënjtje të nyjeve limfatike, ndërsa pas disa ditësh shfaqen dëmtimet në lëkurë.

“Sëmundja ka një periudhë inkubimi nga një deri në dy javë, por mund të shtrihet deri tri javë. Simptomat e para përfshijnë ethe, lodhje, dhimbje muskujsh dhe ënjtje të nyjeve limfatike. Pas disa ditësh shfaqen dëmtimet karakteristike në lëkurë, në fillim puçrrat e kuqe të cilat më vonë shndërrohen në flluska që çahen dhe cikatrizohen. Sëmundja zakonisht zgjat nga 2 javë deri në një muaj, por raportohen raste me ecuri deri 3 ose 4-mujore. Nga e kaluara njihen dy forma të virusit, një tipike për Afrikën Qendrore dhe një tipike për Afrikën Perëndimore, ku forma e dytë është më e rëndë dhe ka edhe vdekshmëri më të lartë. Fatmirësisht, forma që po qarkullon tani i përket variantit të Afrikës Qendrore, pra formës më të lehtë”, theksoi Dasho.

Më tej, ai theksoi se personat që kanë risk më të lartë për të zhvilluar forma më të rënda janë ata që kanë imunitet të dobësuar.

“Virusi transmetohet nëpërmjet ekpozimit direkt ndaj lëngjeve biologjike të një kafshe apo personi të infektuar (përfshi edhe spërklat e pështymës) dhe depërton kryesisht nëpërmjet mukozave apo lëkurës së dëmtuar. Edhe ekspozimi dytësor ndaj veshjeve apo çarçafëve të infektuar është i njohur pasi virusi është shumë rezistent në mjedis. Nuk kam hasur në literaturë një moshë më të prekshme, por raportohen disa kategori që kanë risk më të lartë për të zhvilluar forma të rënda, p.sh., personat me imunitet të dobësuar, si ata të prekur nga HIV/AIDS apo në kimioterapi, fëmijët me moshë nën 8 vjeç, gratë shtatzana, etj.”, vijoi Dasho.

I pyetur nga CNA.al për rrugët e infektimit, eksperti i Shëndetit Publik tha se janë ekspozimet ndaj lëngjeve biologjike, përfshi edhe spërklat e pështymës.

“Përmenda më lart kontaktin e ngushtë, që mundëson ekspozimin ndaj lëngjeve biologjike, përfshi edhe spërklat e pështymës. Lëkura e dëmtuar dhe sidomos mukozat, ajo e hundës, gojës e syve, gjenitale dhe anale janë vendet ku virusi rrezikon të hyjë në organizëm”, u shpreh ai, teksa kërkoi që autoritetet tona shëndetësore të jenë më të përgatitura se në kohën kur në Shqipëri shpërtheu pandemia e COVID-19.

“Përvoja me COVID-in tregoi se autoritetet tona shëndetësore nuk janë të afta për të përballuar siç duhet shpërthimet epidemike. Uroj që kësaj here të merren masa profesionale. Në radhë të parë, janë masat parandaluese që nisin me informimin dhe edukimin e popullatës për të mos lejuar që njerëzit të bien në panik apo të bëhen pre e teorive konspirative. Kjo duhet të vazhdojë me trajnimin e personelit mjekësor për identifikimin e hershëm dhe raportimin e rasteve të mundshme dhe për të përfunduar me sigurimin e medikamenteve që janë provuar të efektshme në të kaluarën. CDC në SHBA rekomandon disa medikamente që mund të përdoren për të trajtuar format e rënda të sëmundjes ku hyjnë tecovirimat, cidofovir apo edhe antitrupa monoklonalë. Të paktën autoritetet shëndetësore duhet të kenë kontakt me prodhuesit e këtyre medikamenteve për të siguruar një rrugë të shpejtë për blerjen e tyre në rast shfaqjesh të rasteve edhe në vendin tonë”, theksoi eksperti i Shëndetit Publik për CNA.al.

Në fund, Dasho dha edhe një mesazh për të gjithë qytetarët, në mënyrë që të mos keqinformohen.

“Qytetarët duhet t’u drejtohen burimeve të besueshme të informacionit ku veçohen faqe interneti të organizmave si CDC në SHBA apo Organizatës Botërore të Shëndetësisë. Të aplikojnë masat parandaluese që rekomandohen në këto burime informacioni. Për informacion të personalizuar t’u drejtohen mjekëve apo specialistëve të shëndetit publik. Në rast dyshimi sidomos kur shfaqen dëmtimet në lëkurë tipike për linë, të cilat unë edhe i përmenda më lart, të drejtohen menjëherë te mjeku i familjes për kujdes shëndetësor”, përfundoi ai./ CNA.al

 





Lajmet e fundit nga