LEXO PA REKLAMA!

SHKARKO APP

E fundit!

x

Dasho, mesazh për qytetarët/ Drejtojuni burimeve të besueshme për lijën e majmunëve

28 Maj 2022, 18:34, Sociale CNA
Dasho, mesazh për qytetarët/ Drejtojuni burimeve të besueshme
Eksperti i Shëndetit Publik, Erion Dasho

Eksperti i Shëndetit Publik, Erion Dasho, ka treguar simptomat  dhe rrugët e infektimit të qytetarëve me linë e majmunëve.

Në një prononcim për CNA.al, Dasho tha se simptomat e para përfshijnë ethe, lodhje, dhimbje muskujsh dhe ënjtje të nyjeve limfatike, ndërsa pas disa ditësh shfaqen dëmtimet në lëkurë.

Ai deklaroi se sëmundja zakonisht zgjat nga 2 javë deri në një muaj, por ka raste që zgjasin edhe deri në 3 ose 4 muaj, ndërsa periudha e inkubimit është 2 deri në 3 javë

“Sëmundja ka një periudhë inkubimi nga një deri në dy javë, por mund të shtrihet deri tri javë. Simptomat e para përfshijnë ethe, lodhje, dhimbje muskujsh dhe enjtje të nyjeve limfatike. Pas disa ditësh shfaqen dëmtimet karakteristike në lëkurë, në fillim puçrrat e kuqe të cilat më vonë shndërrohen në flluska që çahen dhe cikatrizohen. Sëmundja zakonisht zgjat nga 2 javë deri në një muaj, por raportohen raste me ecuri deri 3 ose 4-mujore. Nga e kaluara njihen dy forma të virusit, një tipike për Afrikën Qendrore dhe një tipike për Afrikën Perëndimore, ku forma e dytë është më e rëndë dhe ka edhe vdekshmëri më të lartë. Fatmirësisht, forma që po qarkullon tani i përket variantit të Afrikës Qendrore, pra formës më të lehtë”, u shpreh ai për CNA.al.

I pyetur për rrugët e infektimit, eksperti i Shëndetit Publik tha se janë ekspozimet ndaj lëngjeve biologjike, përfshi edhe spërklat e pështymës.

Përmenda më lart kontaktin e ngushtë, që mundëson ekspozimin ndaj lëngjeve biologjike, përfshi edhe spërklat e pështymës. Lëkura e dëmtuar dhe sidomos mukozat, ajo e hundës, gojës e syve, gjenitale dhe anale janë vendet ku virusi rrezikon të hyjë në organizëm”, theksoi Dasho, ndërsa dha edhe një mesazh për shqiptarët.

Qytetarët duhet t’u drejtohen burimeve të besueshme të informacionit ku veçohen faqe interneti të organizmave si CDC në SHBA apo Organizatës Botërore të Shëndetësisë. Të aplikojnë masat parandaluese që rekomandohen në këto burime informacioni. Për informacion të personalizuar t’u drejtohen mjekëve apo specialistëve të shëndetit publik. Në rast dyshimi sidomos kur shfaqen dëmtimet në lëkurë tipike për linë, të cilat unë edhe i përmenda më lart, të drejtohen menjëherë tek mjeku i familjes për kujdes shëndetësor”, nënvizoi ai./ CNA.al

 

Lajmet e fundit nga