E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Përkujtohet 35-vjetori i martirit të demokracisë, Pëllumb Pëllumbi

16 Qershor 2025, 15:56, Qyteti im CNA

Përkujtohet 35-vjetori i martirit të demokracisë, Pëllumb

Edhe këtë 16 qershor është përkujtuar në qytetin e Shkodrës vrasja e 17-vjeçarit, martirit të demokracisë, Pëllumb Pëllumbi. Ai u vra me 16 qershor të vitit 1990 në kufi.

Motra e tij, Lula Pëllumbi, kërkoi që ata të cilët kanë kontribuuar në demokracinë e vendit të kujtohen, ndërsa tha se drejtësia më e madhe për këto viktima është të punohet për të ardhmen e vendit e të rinisë.

"Sot është 35-vjetori i vrasjes së vëllait tonë Pëllumbit, është edhe 35-vjetori i demonstratës revolucionare. Të rinjtë e Shkodrës në atë kohë e kanë marrë kufomën e vëllait tim të shoqëruar me parullat 'poshtë komunizmi'. Dua të kërkoj ndryshim sepse ata që dhanë jetën për demokraci ne nuk i kujtojmë sa duhet. Te ne ka qenë ndër sistemet më të egra. Dhe sot duhet të ecim përpara, nuk kërkoj hakmarrje, por dua të ecim përpara", u shpreh motra e Pëllumb Pëllumbit.

Kryetari i shoqatës së të përndjekurve politikë në Shkodër, Zenel Drangu, ka një apel për qeverinë që të gjenden eshtrat për të vrarët në Kuç.

"Përkujtojmë Pëllumb Pëllumbin e shumë të tjerë që kanë rënë gjatë regjimit të Ramiz Alisë. Ai regjim urdhëroi komandantët e postave se ata që i kapin duke kaluar kufirin t'i torturojnë. Apeli im nga Shkodra është për qeverinë, që të gjejë eshtrat e atyre që nuk jetojnë më dhe familjarët ende nuk dinë se ku i kanë varret", u shpreh Drangu.

Për sa u përket punimeve në ish-burgun e Spaçit, Drangu tha se nuk kanë të drejtë ta tjetërsojnë dhomën e takimit duke e bërë dhomë moderne.

"Mund të bëjnë riparime, por jo të tjetersojnë dhomat duke i bërë moderne, këtë nuk kanë të drejtë ta bëjnë”, tha Drangu.

35 vite më parë, Pëllumb Pëllumbi po tentonte të kalonte kufirin në kërkim të një jete më të mirë, por ai u ekzekutua në mënyrë barbare nga persona që i qëndronin ende besnikë regjimit./ CNA