"From West to East" / Orkestra Simfonike e Shkodrës, një pikë referimi për artin dhe muzikën klasike

8 Qershor 2025, 11:46, Qyteti im CNA

"From West to East" / Orkestra Simfonike e Shkodrës, një

Orkestra Simfonike e Shkodrës, pas procesit të riformatimit dhe tashmë nën drejtimin artistik të Elda Laros, është rikthyer në skenën e teatrit “Migjeni”.

Në këtë koncert, të titullar “From West to East, së bashku me orkestrën, performoi sopranoja e njohur Ana Naqe, e cila, nën dirigjimin e Elda Laros dhe orkestrës simfonike, solli për publikun shkodran një repertor të zgjedhur me vepra të autorëve të njohur shqiptar dhe të huaj.

"Njeriu ka gjithmonë emocione, por Shkodra është emocion. Emri im është Ana Naqe,që në Shkodër naqe është shpirt.Nuk kishte si të ndodhte ndryshe, kam emocione të mira. Është një emocion i madh të performosh me Elda Laron sepse është një nga artistet më të mëdha që unë njoh në jetën time.Gjithë bota e njeh dhe e nderon është fantastike.Artistëve të rinj u jep krah dhe ka një zemer të madhe dhe të shoqëron si askush tjetër. Orkestrës i them të japë maksimumin e të bashkëpunojnë gjithmonë.Bashkëpunojnë e dëgjojnë janë shumë të mirë", tha sopranoja Ana Naqe.

Për Drejtuesen Artistike të Orkestrës Simfonike të Shkodrës, Elda Laro, ky ishte koncerti i parë në drejtimin e saj. Ajo theksoi se do të vijojnë përgatitjet për të sjellë në skenën shkodrane emra të mëdhenj të muzikës shqiptare, të cilët do të performojnë krah orkestrës simfonike të qytetit. Laro iu përgjigj edhe pyetjes “Kush e drejton orkestrën kur ajo është në Gjermani?

"Nuk është hera e parë që dirigjoj këtë orkestër. Si drejtoreshë artistike është një tjetër ndjesi, akoma më shumë përgjegjësi dhe më shumë punë që të bëjma një koncert sa më të mirë për publikun.Doli mirë sepse orkestra përgjigjet goxha mirë.Zemra rreh më shumë se kudo tjetër por në mënyrë pozitive për të motivuar për më shumë punë.Unë kam një asistent që është Eri Daja, ai e dirixhon kur nuk jam unë këtu. Koncerti i ardhshëm do jetë edhe më i madh do jetë një tenor si Sajmir Pirgu dhe një pianist si Klevis Gjergji dhe orkestra do të jetë në nivel akoma më të", tha Elda Laro, Drejtuese Artistike e Orkestrës Simfonike të Shkodrës.

Ky koncert i Orkestrës Simfonike të Shkodrës solli për publikun emocione të veçanta dhe duke dëshmuar edhe një herë potencialin e madh artistik që Shkodra ka për të ofruar. Me përkushtimin e drejtueses artistike Elda Laro dhe bashkëpunimin me emra të njohur të muzikës shqiptare, orkestra simfonike e Shkodrës ka si synim të kthehet në një pikë referimi për artin dhe muzikën klasike në Shkodër./ CNA