Thethi turistik/Turistë nga e gjithë bota vizitojnë alpet

4 Qershor 2025, 16:52, Qyteti im CNA

Fshati turistik i Thethit në Shkodër, në zemër të alpeve të veriut të Shqipërisë ka nisur që të mbipopullohet nga turistët që vijnë nga e gjithë bota. Të huajt tregojnë se bukuritë natyrore ende të paeksploruara të Thethit si dhe mikpritja e vendasve janë dy arsye të forta që i tërheqin për ta vizituar.

“Nga Gjermania vij. Këtu në Theth është hera e parë kurse në Shqipëri vij për herë të dytë. Kemi ardhur për të parë alpet e veriut sepse herën e kaluar kemi qenë në parqet e jugut. Këtu po më pëlqen shumë natyra, peisazhi dhe njerëzit shumë të këndshëm dhe miqësor”, u shpreh një turiste.

“Jo nuk është e vështirë ecja këtu, çdo gjë është e parapërgatitur për turistët dhe është një ecje e rehatshme. Natyra shumë e bukur këtu në Theth dhe njerëz shumë të mirë. Për herë të parë isha para 14 vitesh në Shqipëri atëherë kur thuajse nuk vinte askush dhe nuk ishte as në internet e njohur. Unë thashe asokohe një vend i paeskploruar dhe më tërhoqi të vij. Sot pas 14 vitesh ka ndryshime të mëdha, turistë shumë herë më shumë”, tha një turist.

“Jam nga Amerika por jetoj në Skoci. Është hera e parë në Shqipëri, një vend shumë i bukur dhe njerëz shumë miqësor. Vendin tuaj ma sugjeruan disa miq dhe vendosa që të vij”, u shpreh një tjetër turiste.

Syri i Kaltër në Theth i zhytur mes maleve dhe gjelbërimit, një shteg që duhet bërë në këmbë për afro 1 orë është një prej pikave më të preferuara. Disa prej turistëve guxojnë që të futen në ujin e ftohtë prej 5 gradë celcius.

“Shumë bukur këtu por shumë i ftohtë uji. Vij nga Australia dhe jam për herë të parë në Shqipëri. Si dëgjova për Thethin? Në Instagram dhe Tik Tok. Do ja sugjeroj miqve të mi që të vijnë këtu”, tha një turiste.

“Është shumë ftohtë në ujë por duhet që ta provoni këtë ndjesi. Unë për vete ndihem i mbrojtur, jam mirë. Sa më gjatë që të rrish në ujë, trupi aq më i ngrohtë bëhet edhe pse fillimisht duke shumë ftohtë. Nuk është e rrezikshme nëse noton këtu afër bregut. Jam nga Irani dhe e dashura ime planifikoi pushimet tona këtu në Shqipëri dhe erdhëm sëbashku. Më pëlqen ky vend, natyrë e bukur, njerëz mikpritës dhe çmime të lira gjithashtu”, u shpreh turistja për Thethin.

Operatorët turistikë ndryshe nga vitet e tjera shprehen se këtë herë ka një numër të lartë turistësh nga Franca dhe Spanja. Ajo që mbetet shqetësim janë disa probleme infrastrukturore.

"Këtë vit sezoni ka nisur më herët turistët janë kryesisjt nga Franca dhe Spanja. Probleme ka, rruga brenda Thethit është shqetësim e po ashtu edhe shkëputjet e energjisë elektrike", tha një nga operatorët turistikë, Leo Gjeloshi.

Shoferët që e bëjnë çdo ditë Thethin tregojnë se rrugët në qendër të fshatit kërkojnë një rikonstruksion sa më të shpejtë…

"Turistë ka shumë por rruga në qender nuk është e mirë, duhet rikonstrukruar", u shpreh një shofer.

Thethi pritet që përgjatë muajve qershor, korrik dhe gusht të ketë një fluks edhe më të madh turistësh të huaj se sa vitet e mëparshme ndërsa mbetet një prej pikave turistike në Shqipëri më të preferuara./ CNA