web counter
LEXO PA REKLAMA!

SHKARKO APP

App Store
Google Play

E fundit!

x

Dita Ndërkombëtare Kundër Shfrytëzimit të Fëmijëve për Punë/ Apeli: Duhet më shumë ndërgjegjësim qytetar

12 Qershor 2025, 16:03, Qyteti im CNA

Dita Ndërkombëtare Kundër Shfrytëzimit të

Në kuadër të 12 Qershorit, Ditës Ndërkombëtare Kundër Shfrytëzimit të Fëmijëve për Punë, Bashkia Shkodër zhvilloi një aktivitet sensibilizues në qytet. Në fjalën e saj, nënkryetarja e Bashkisë Shkodër, Teuta Qyteza, u bëri thirrje qytetarëve që të rrisin ndërgjegjësimin dhe të kontribuojnë në luftën kundër këtij fenomeni shqetësues që prek të ardhmen e fëmijëve, sidomos në formën e lypjes në rrugë.

 “Fëmijët që shfrytëzohen për punë dhe për lypje, duhet të jetë e dënueshme nga i gjithë opinioni shoqëror. Ne duhet t’i mbrojmë fëmijët, t’i lëmë ata të lirë të bëjnë jetën e tyre. Kanë moshën për të mësuar, për t’u argëtuar, për të kaluar kohën e lirë me njëri-tjetrin dhe jo për të punuar dhe aq më pak për të lypur. Bashkia Shkodër ka mbledhur drejtuesit e të gjitha institucioneve që kanë të bëjnë apo që kanë impakt në këtë fushë, Policinë Bashkiake, Policinë e Rendit, doganat dhe të gjitha institucionet e tjera që kanë të bëjnë me monitorimin e këtij fenomeni. U bëjmë thirrje edhe atyre që i shfrytëzojnë, edhe atyre që i drejtojnë drejt atyre pikave, se po verifikohen, po monitorohen nga Policia e Shtetit dhe nga i gjithë stafi i bashkisë. I lutemi që ta ndërpresin këtë fenomen. Mos shfrytëzoni fëmijët, janë njësoj si fëmijët e çdokujt, edhe tuajt!” - tha Teuta Qyteza, nënkryetare e Bashkisë Shkodër.

Dita Ndërkombëtare Kundër Shfrytëzimit të

Në fokus të aktivitetit ishte nxitja e bashkëpunimit ndërinstitucional, sensibilizimi i komunitetit dhe ndërgjegjësimi mbi pasojat që sjell shfrytëzimi i fëmijëve, një praktikë që u mohon atyre të drejtën për një fëmijëri të sigurt dhe të lumtur.

Dita Ndërkombëtare Kundër Shfrytëzimit të

Broshura informuese e shpërndarë gjatë aktivitetit përfshinte udhëzime të qarta për qytetarët mbi hapat që mund të ndërmerren për të mbrojtur fëmijët, duke filluar nga raportimi i rasteve të shfrytëzimit, mbështetja përmes institucioneve, mosdhënia e parave në rrugë, e deri te sensibilizimi dhe mbështetja për arsimin cilësor dhe përfshirës.

"Një fëmijë që punon, humbet të drejtën për të qenë fëmijë" – është mesazhi që shoqëron këtë fushatë ndërgjegjësimi, për t’i kujtuar çdo anëtari të shoqërisë rolin e tij në mbrojtjen e më të vegjëlve./CNA





Lajmet e fundit nga